സൂപ്പര്‍സ്റ്റാര്‍ എന്ന് വിളിക്കപ്പെടാൻ ആളായിട്ടില്ല: വിജയ് ദേവെരകൊണ്ട

സൂപ്പര്‍സ്റ്റാര്‍ എന്ന് വിളിക്കപ്പെടാൻ സമയമായിട്ടില്ലെന്ന് വിജയ് ദേവെരകൊണ്ട.  

ആരാധകര്‍ ആകാംക്ഷയോടെ കാത്തിരിക്കുന്ന സിനിമയാണ് 'ലൈഗര്‍'. വിജയ് ദേവെരകൊണ്ടയാണ് ചിത്രത്തില്‍ നായകൻ. 'ലൈഗറി'ന്റെ പ്രമോഷണല്‍ തിരക്കുകളിലാണ് ഇപ്പോള്‍ വിജയ് ദേവെരകൊണ്ട. തന്നെ സൂപ്പര്‍ സ്റ്റാര്‍ എന്ന് വിളിക്കാൻ സമയമായിട്ടില്ല എന്ന് വിജയ് ദേവെരകൊണ്ട ഒരു പ്രമോഷണല്‍ ചടങ്ങിനിടെ പറഞ്ഞു.

ആളുകൾ എന്നെ 'സൂപ്പർസ്റ്റാർ' എന്ന് വിളിക്കുമ്പോള്‍ എനിക്ക് ലജ്ജ തോന്നും. ഞാൻ വളരെ ചെറുപ്പമാണ്, സൂപ്പർ സ്റ്റാർ എന്ന് വിളിക്കപ്പെടാൻ താൻ ഒരുപാട് നേട്ടങ്ങൾ കൈവരിക്കേണ്ടതുണ്ട് എന്നും വിജയ് ദേവെരകൊണ്ട പറഞ്ഞു. യുഎ സര്‍ട്ടിഫിക്കറ്റാണ് 'ലൈഗര്‍' എന്ന ചിത്രത്തിന് ലഭിച്ചിരിക്കുന്നത്. രണ്ട് മണിക്കൂറും 20 മിനുട്ടുമുള്ള ചിത്രത്തില്‍ ആറ് പാട്ടുകളും ഏഴ് ആക്ഷൻ രംഗങ്ങളുമുണ്ട് എന്നാണ് റിപ്പോര്‍ട്ട്. ലാസ് വെഗാസിലെ 'മിക്സഡ് മാര്‍ഷല്‍ ആര്‍ട്‍സ്' (എംഎംഎ) ചാമ്പ്യനാകാൻ നടത്തുന്ന ശ്രമങ്ങളുടെ ശ്രമങ്ങളാണ് ചിത്രത്തില്‍ പറയുന്നത്. പുരി ജ​ഗന്നാഥ് ആണ് ചിത്രം സംവിധാനം ചെയ്യുന്നത്. യുഎസിലായിരുന്നു 'ലൈഗര്‍' എന്ന ചിത്രത്തിന്റെ ചില രംഗങ്ങള്‍ ചിത്രീകരിച്ചത്. ചിത്രത്തിന്റേതായി ഇതിനകം തന്നെ പുറത്തുവന്ന ഗാനങ്ങള്‍ ശ്രദ്ധ നേടിയിരുന്നു.

വിജയ് ദേവരകൊണ്ട നായകനാകുന്ന ചിത്രം കൊവിഡ് കാരണായിരുന്നു പൂര്‍ത്തിയാകാൻ വൈകിയത്. ഓഗസ്റ്റ് 25ന് ആണ് ചിത്രം പ്രദര്‍ശനത്തിന് എത്തുക. തിയറ്ററുകളില്‍ തന്നെയാണ് 'ലൈഗര്‍ എന്ന ചിത്രം പ്രദര്‍ശനത്തിനെത്തുക. മണി ശര്‍മയാണ് ചിത്രത്തിന്റെ സംഗീത സംവിധാനം നിര്‍വഹിക്കുന്നത്. യാഷ് രാജ് ഫിലിംസാണ് ചിത്രത്തിന്റെ വിതരണം.

മിക്സഡ് മാർഷ്യൽ ആർട്‍സ് താരമായാണ് വിജയ് ദേവെരകൊണ്ട 'ലൈഗറില്‍' വേഷമിടുന്നത്. 'ലൈഗര്‍' എന്ന ചിത്രം ഹിന്ദി, തെലുങ്ക് ഭാഷകളിലാണ് 'ലൈഗര്‍' എന്ന ചിത്രം  പ്രദര്‍ശനത്തിന് എത്തുക. തമിഴിലും കന്നഡയിലും മലയാളത്തിലും ചിത്രം മൊഴിമാറ്റിയും പ്രദര്‍ശനത്തിന് എത്തും. അനന്യ പാണ്ഡെ ആണ് ചിത്രത്തില്‍ നായികയായി എത്തുക. വിജയ് ദേവെരകൊണ്ടയ്‍ക്ക് ഏറെ പ്രതീക്ഷയുള്ള ഒരു ചിത്രമാണ് 'ലൈഗര്‍' ‍.  സംവിധാകൻ പുരി ജഗനാഥ് തന്നെയാണ് ചിത്രത്തിന്റെ തിരക്കഥ എഴുതുന്നതും.