വന്‍ ചിത്രത്തെ പേടിച്ച് മാറ്റിയതോ; ഇന്ത്യന്‍ 2 റിലീസ് സംബന്ധിച്ച് വന്‍ അപ്ഡേറ്റ്

അതേ സമയം തമിഴ്നാട്ടിലെ ലോക്സഭ തെരഞ്ഞെടുപ്പിന് ശേഷമായിരിക്കും ചിത്രത്തിന്‍റെ പ്രമോഷന്‍ ജോലികള്‍ ആരംഭിക്കുക എന്നാണ് വിവരം.   

ചെന്നൈ: 2024 ല്‍ ഇന്ത്യൻ സിനിമ ലോകം ഏറെ പ്രതീക്ഷ അര്‍പ്പിക്കുന്ന ഒരു ചിത്രമാണ്  ഇന്ത്യൻ 2. കമല്‍ഹാസന്‍റെ ജന്മദിനത്തില്‍ ചിത്രത്തിന്റെ ഫസ്റ്റ് ഇൻട്രോ നേരത്തെ പുറത്തുവിട്ടിരുന്നു. വീണ്ടും ഒരിക്കൽ കൂടി സംവിധായകൻ ഷങ്കറിന്റെ വിസ്മയം കാണാൻ തയ്യാറാകൂ എന്ന് ഉറപ്പിക്കുകയാണ് വീഡിയോ. ഒപ്പം താന്‍ 'സകലകലാവല്ലഭൻ' തന്നെയാണ് വീണ്ടും മകൽഹാസൻ തെളിയിക്കാനും ഒരുങ്ങുന്നു എന്ന് വ്യക്തം.

റെഡ് ജൈന്‍റ് മൂവിസാണ് തമിഴ്നാട്ടില്‍ ഇന്ത്യന്‍ 2 വിതരണത്തിന് എടുത്തിരിക്കുന്നത്. ഇപ്പോഴിതാ ചിത്രത്തിന്‍റെ റിലീസ് ഡേറ്റ് സംബന്ധിച്ച് തമിഴ് മാധ്യമങ്ങള്‍ സുപ്രധാന അപ്ഡേറ്റ് നല്‍കിയിരിക്കുകയാണ്. വരുന്ന മെയ് 24ന് ചിത്രം റിലീസ് ചെയ്തേക്കും എന്നാണ് വിവരം. നേരത്തെ തന്നെ ചിത്രം മെയില്‍ എത്തുമെന്ന് വിവരം ഉണ്ടായിരുന്നു. അതേ സമയം ഔദ്യോഗിക പ്രഖ്യാപനം ഈ മാസം ഉണ്ടാകും എന്നാണ് വിവരം.

എല്ലാ തെന്നിന്ത്യന്‍ ഭാഷകളിലും ചിത്രം റിലീസാകും എന്നാണ് റിപ്പോര്‍ട്ട്. അതേ സമയം തമിഴ്നാട്ടിലെ ലോക്സഭ തെരഞ്ഞെടുപ്പിന് ശേഷമായിരിക്കും ചിത്രത്തിന്‍റെ പ്രമോഷന്‍ ജോലികള്‍ ആരംഭിക്കുക എന്നാണ് വിവരം. 

നേരത്തെ ആഗസ്റ്റ് 15 ആണ് ഇന്ത്യന്‍ 2 റിലീസിനായി ഇവര്‍ കണ്ടുവച്ചിരുന്നത്. ഇന്ത്യന്‍ 2വിന് ഒരു സോളോ റിലീസ് വേണമെന്ന് നേരത്തെ അണിയറക്കാര്‍ തീരുമാനിച്ചതാണ്. എന്നാല്‍ പുഷ്പ 2 ആഗസ്റ്റ് 15നാണ് എത്തുന്നത്. ഇത് ചിത്രത്തിന്‍റെ ദക്ഷിണേന്ത്യന്‍ മാര്‍ക്കറ്റില്‍ ക്ലാഷ് വരുത്തിയേക്കും എന്ന ആശങ്കയില്‍ റിലീസ് തീയതി മെയിലേക്ക് മാറ്റിയത് എന്നും വിവരമുണ്ട്. മെയ് മാസത്തില്‍ സോളോ റിലീസ് ലഭിക്കും എന്നാണ് കണക്കൂകൂട്ടല്‍ അതുപോലെ തന്നെ വേനല്‍ അവധി ആനുകൂല്യവും പടത്തിന് ലഭിക്കും.

അതിനിടെ ഇന്ത്യന്‍  ഒരു മൂന്നാം ഭാഗവും ഉണ്ടാകും എന്ന് കമല്‍ഹാസന്‍ സ്ഥിരീകരിച്ചിട്ടുണ്ട്. ഇന്ത്യന്‍ 3 ചിത്രീകരണം പൂര്‍ത്തിയാക്കിയെന്നും കമല്‍ ഹാസന്‍ പറയുന്നു. ദി ഹിന്ദുവിന് നല്‍കിയ അഭിമുഖത്തിലാണ് കമലിന്‍റെ വെളിപ്പെടുത്തല്‍.

ബിഗ് ബജറ്റില്‍ ഒരുങ്ങുന്ന ഇന്ത്യന്‍ 2 നിര്‍മ്മിക്കുന്നത് സുഭാസ്കരന്‍ അല്ലിരാജയുടെ ലൈക്ക പ്രൊഡക്ഷന്‍സും കമല്‍ ഹാസന്‍റെ രാജ്‍കമല്‍ ഫിലിംസും ഉദയനിധി സ്റ്റാലിന്‍റെ റെഡ് ജയന്‍റ് മൂവീസും ചേര്‍ന്നാണ്. അതേസമയം 1996ല്‍ പുറത്തെത്തിയ ഇന്ത്യന്‍ മികച്ച പ്രേക്ഷകാഭിപ്രായം നേടിയതിനൊപ്പം ബോക്‌സ്ഓഫീസിലും വന്‍ വിജയം നേടിയ ചിത്രമാണ്. കമല്‍ഹാസനൊപ്പം ഊര്‍മിള മണ്ഡോദ്കറും മനീഷ കൊയ്‌രാളയും പ്രധാന കഥാപാത്രങ്ങളെ അവതരിപ്പിച്ചു. കമലിനെ ദേശീയ അവാര്‍ഡും തേടിയെത്തി.