ത്രില്ലറുമായി ജീത്തു വീണ്ടും ബോളിവുഡിലേക്ക്; മോഹന്‍ലാല്‍ ചിത്രം ആരംഭിച്ചതിന് പിന്നാലെ പ്രഖ്യാപനം

ബധായ് ഹോ അടക്കമുള്ള ചിത്രങ്ങളുടെ നിര്‍മ്മാതാക്കളായ ജംഗ്ലീ പിക്ചേഴ്സും ക്ലൌഡ് 9 പിക്ചേഴ്സും ചേര്‍ന്നാണ് ചിത്രം പ്രഖ്യാപിച്ചിരിക്കുന്നത്

ത്രില്ലര്‍ സിനിമ എന്ന് കേട്ടാല്‍ മലയാളികള്‍ പെട്ടെന്ന് ഓര്‍ക്കുന്ന പേരുകളിലൊന്നാണ് ജീത്തു ജോസഫിന്‍റേത്. മെമ്മറീസും 12 ത്ത് മാനുമൊക്കെ ഒരുക്കിയിട്ടുണ്ടെങ്കിലും ദൃശ്യം ഫ്രാഞ്ചൈസി തന്നെയാണ് അതിന് കാരണം. ബഹുഭാഷകളിലേക്ക് റീമേക്ക് ചെയ്യപ്പെട്ട ഫ്രാഞ്ചൈസി ആയതിനാല്‍ അവിടങ്ങളിലെ സിനിമാപ്രേമികള്‍ക്കും പരിചിതനാണ് ജീത്തു. മലയാളത്തിന് പുറമെ തമിഴിലും തെലുങ്കിലും ഹിന്ദിയിലും അദ്ദേഹം ചിത്രങ്ങള്‍ ചെയ്തിട്ടുണ്ട്. ഇപ്പോഴിതാ ബോളിവുഡിലേക്ക് പുതിയ ചിത്രവുമായി വീണ്ടും എത്തുകയാണ് അദ്ദേഹം.

ബധായ് ഹോ അടക്കമുള്ള ചിത്രങ്ങളുടെ നിര്‍മ്മാതാക്കളായ ജംഗ്ലീ പിക്ചേഴ്സും ക്ലൌഡ് 9 പിക്ചേഴ്സും ചേര്‍ന്നാണ് ചിത്രം പ്രഖ്യാപിച്ചിരിക്കുന്നത്. ജീത്തു ഏറ്റവും കഴിവ് തെളിയിച്ചിരിക്കുന്ന ത്രില്ലര്‍ ഡ്രാമ വിഭാഗത്തില്‍ പെടുന്നത് തന്നെയായിരിക്കും ഈ ചിത്രവും. സത്യം വെളിച്ചത്ത് കൊണ്ടുവരാന്‍ ശ്രമിക്കുന്ന ഒരു പൊലീസ് ഓഫീസറുടെ യഥാര്‍ഥ കഥയെ ആസ്പദമാക്കിയുള്ളതാണ് ചിത്രമെന്ന് അറിയുന്നു. ഹിന്ദിയിലെ അടുത്ത ചിത്രത്തിനായി ഒരു മികച്ച തിരക്കഥയ്ക്കായുള്ള കാത്തിരിപ്പിലായിരുന്നു താനെന്നും ഇത് അത്തരത്തില്‍ ഒന്നാണെന്നും ജീത്തു ജോസഫ് പറയുന്നു. 

മലയാളത്തില്‍ മോഹന്‍ലാലിനൊപ്പമുള്ള സിനിമ ചിത്രീകരണ ഘട്ടത്തിലുള്ളപ്പോഴാണ് ബോളിവുഡില്‍ ജീത്തുവിന്‍റെ പുതിയ പ്രഖ്യാപനം എന്നത് ശ്രദ്ധേയമാണ്. ആശിര്‍വാദ് സിനിമാസിന്‍റെ ബാനറില്‍ ആന്‍റണി പെരുമ്പാവൂര്‍ നിര്‍മ്മിക്കുന്ന ചിത്രത്തില്‍ പ്രിയ മണിയാണ് നായിക. അനശ്വര രാജന്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നു. ജീത്തുവിനൊപ്പം ശാന്തി മായാദേവിയും ചേര്‍ന്നാണ് ചിത്രത്തിന്‍റെ രചന നിര്‍വ്വഹിച്ചിരിക്കുന്നത്. ദൃശ്യം 2 ല്‍ അഭിഭാഷക വേഷത്തിലെത്തി ശ്രദ്ധിക്കപ്പെട്ട ആളാണ് ശാന്തി. ചിത്രത്തിന്‍റെ ഛായാഗ്രഹണം സതീഷ് കുറുപ്പ് ആണ്. എഡിറ്റിംഗ് വി എസ് വിനായക്, സംഗീതം വിഷ്ണു ശ്യാം, കലാസംവിധാനം ബോബന്‍, ചീഫ് അസോസിയേറ്റ് ഡയറക്ടര്‍ സുധീഷ് രാമചന്ദ്രന്‍, ഡിസൈന്‍ സേതു ശിവാനന്ദന്‍.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക്ക് ചെയ്യുക