ജ്യോതികയുടെ പിറന്നാള് ദിനമായ ഒക്ടോബര് 18 ന് ആണ് ഈ ചിത്രം ഔദ്യോഗികമായി പ്രഖ്യാപിച്ചത്
ഒന്നിലധികം കാരണങ്ങളാല് ഇതിനകം പ്രേക്ഷകശ്രദ്ധ നേടിയ ചിത്രമാണ് കാതല്. ദ് ഗ്രേറ്റ് ഇന്ത്യന് കിച്ചണ് സംവിധായകന് ജിയോ ബേബി മമ്മൂട്ടിയെ നായകനാക്കി ഒരുക്കുന്ന ചിത്രം, മമ്മൂട്ടി കമ്പനി നിര്മ്മിക്കുന്ന മൂന്നാമത്തെ ചിത്രം, ജ്യോതികയുടെ മലയാളത്തിലേക്കുള്ള തിരിച്ചുവരവ് ചിത്രം എന്നിവയൊക്കെ അതിനുള്ള കാരണങ്ങള് ആയിരുന്നു. മമ്മൂട്ടിയും ജ്യോതികയും ആദ്യമായാണ് സ്ക്രീനില് ഒരുമിച്ചെത്തുന്നത് എന്നതും പ്രത്യേകതയാണ്. തന്റെ ഭാഗങ്ങളുടെ ചിത്രീകരണം മമ്മൂട്ടി കഴിഞ്ഞ ദിവസം പൂര്ത്തിയാക്കിയിരുന്നു. ഇപ്പോഴിതാ ജ്യോതികയും തന്റെ സീനുകളുടെ ചിത്രീകരണം പൂര്ത്തിയാക്കിയിരിക്കുകയാണ്.
മാത്യു ദേവസി എന്നാണ് ചിത്രത്തില് മമ്മൂട്ടി അവതരിപ്പിക്കുന്ന കഥാപാത്രത്തിന്റെ പേര്. പഞ്ചായത്ത് തെരഞ്ഞെടുപ്പില് ഇടതുപക്ഷ സ്വതന്ത്ര സ്ഥാനാര്ഥിയായി മത്സരിക്കുന്നുണ്ട് ചിത്രത്തില് ഈ കഥാപാത്രം. ജ്യോതികയുടെ പിറന്നാള് ദിനമായ ഒക്ടോബര് 18 ന് ആണ് ഈ ചിത്രം ഔദ്യോഗികമായി പ്രഖ്യാപിച്ചത്. റോഷാക്കിനു ശേഷം മമ്മൂട്ടി കമ്പനിയുടെ ബാനറില് മമ്മൂട്ടി നിര്മ്മിക്കുന്ന ചിത്രം എന്ന പ്രത്യേകതയും ഈ ചിത്രത്തിന് ഉണ്ട്. മമ്മൂട്ടി കമ്പനി നിര്മ്മിക്കുന്ന മൂന്നാമത്തെ ചിത്രമാണ് ഇത്. ലിജോ ജോസ് പെല്ലിശ്ശേരിയുടെ നന്പകല് നേരത്ത് മയക്കം ആയിരുന്നു ആദ്യ ചിത്രം. അതേസമയം ജിയോ ബേബി സംവിധാനം ചെയ്യുന്ന എഴാമത്തെ ചിത്രമാണ് കാതൽ. ദുൽഖർ സൽമാന്റെ വേഫെറെർ ഫിലിംസ് ആണ് ചിത്രത്തിന്റെ വിതരണം നിർവഹിക്കുന്നത്.
ALSO READ : പ്രകടനത്തില് വിസ്മയിപ്പിക്കാന് ഉണ്ണി മുകുന്ദന്; 'ഷെഫീക്കിന്റെ സന്തോഷം' ട്രെയ്ലര്
ലാലു അലക്സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദർശ് സുകുമാരൻ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ തിരക്കഥ നിർവഹിച്ചിരിക്കുന്നത് ആദർഷ് സുകുമാരനും പോൾസൺ സ്കറിയയും ചേര്ന്നാണ്. എക്സിക്യൂട്ടിവ് പ്രൊഡ്യൂസർ ജോർജ് സെബാസ്റ്റ്യൻ, ഛായാഗ്രഹണം സാലു കെ തോമസ്, എഡിറ്റിംഗ് ഫ്രാൻസിസ് ലൂയിസ്, സംഗീതം മാത്യൂസ് പുളിക്കൻ.