കൊരടാല ശിവയ്ക്കൊപ്പം ജൂനിയര് എൻടിആര്, ചിത്രത്തിന്റെ റിലീസ് പ്രഖ്യാപിച്ചു
Synopsis
'എൻടിആര് 30' എന്ന വിളിപ്പേരുള്ള ചിത്രത്തിന്റെ റിലീസ് പ്രഖ്യാപിച്ചു.
കൊരട്ടാല ശിവ സംവിധാനം ചെയ്യുന്ന ചിത്രത്തില് ജൂനിയര് എൻടിആര് നായകനാകുന്നുവെന്ന വാര്ത്ത ആരാധകര് ഏറ്റെടുത്തതാണ്. 'ജനതാ ഗാരേജ്' എന്ന ഹിറ്റ് ചിത്രത്തിനു ശേഷം ഇരുവരും ഒന്നിക്കുന്നതാണ് 'എൻടിആര് 30'. 'എൻടിആര് 30' എന്ന് വിളിപ്പേരുള്ള ചിത്രത്തിന്റെ വിശേഷങ്ങള്ക്ക് ഓണ്ലൈനില് വലിയ സ്വീകാര്യത ലഭിക്കാറുണ്ട്. ചിത്രത്തിന്റെ റിലീസ് തിയ്യതി പ്രഖ്യാപിച്ചതാണ് പുതിയ വാര്ത്ത.
'എൻടിആര് 30' 2024 ഏപ്രില് അഞ്ചിനാണ് റിലീസ് ചെയ്യുക. ഫെബ്രുവരിയില് ജൂനിയര് എൻടിആര് ചിത്രത്തിന്റെ ചിത്രീകരണം തുടങ്ങും. രത്നവേലുവാണ് ചിത്രത്തിന്റെ ഛായാഗ്രാഹണം നിര്വഹിക്കുന്നത്. ചിത്രത്തിനായി അനിരുദ്ധ് രവിചന്ദര് സംഗീത സംവിധാനം നിര്വഹിക്കുമ്പോള് സാബു സിറിലാണ് പ്രൊഡക്ഷൻ ഡിസൈൻ.
കരുത്തുറ്റ കഥകളാല് വെള്ളിത്തിരയില് വിസ്മയം തീര്ക്കുന്ന തമിഴ് സംവിധായകൻ വെട്രിമാരനുമായി ജൂനിയര് എൻടിആര് കൈകോര്ക്കുന്നുവെന്നും റിപ്പോര്ട്ട് വന്നിരുന്നു. വെട്രിമാരൻ സംവിധാനം ചെയ്യുന്ന ചിത്രത്തിന് ജൂനിയര് എൻടിആര് സമ്മതം മൂളി എന്നാണ് റിപ്പോര്ട്ടുകള്. ഇക്കാര്യത്തില് ജൂനിയര് എൻടിആര് ഔദ്യോഗിക സ്ഥിരീകരണം നല്കിയിട്ടില്ല. എന്തായാലും കൊരടാല ശിവ, പ്രശാന്ത് നീല് എന്നിവരുടെ ചിത്രങ്ങള്ക്കൊപ്പം വെട്രിമാരന്റെ സംവിധാനത്തിലും ഒരു പാൻ ഇന്ത്യൻ സിനിമയില് ജൂനിയര് എൻടിആര് അഭിനയിച്ചേക്കുമെന്ന വാര്ത്ത ആരാധകര് ഏറ്റെടുത്തിട്ടുണ്ട്.
ജൂനിയര് എൻടിആറിന്റെ ജന്മദിനത്തോട് അനുബന്ധിച്ചായിരുന്നു പ്രശാന്ത് നീലിന്റെ ചിത്രത്തിന്റെ പ്രഖ്യാപനം. ഇതാദ്യമായിട്ടാണ് ജൂനിയര് എൻടിആറും പ്രശാന്ത് നീലും ഒന്നിക്കുന്നത്. ഒരു പാൻ ഇന്ത്യൻ ചിത്രമാണ് ജൂനിയര് എൻടിആറിനെ നായകനാക്കി പ്രശാന്ത് നീല് ഒരുക്കുക. ചിത്രത്തിന്റെ പ്രമേയം എന്തായിരിക്കും എന്ന് പുറത്തുവിട്ടിട്ടില്ല. മൈത്രി മൂവി മേക്കേഴ്സും എൻടിആര് ആര്ട്സും ചേര്ന്നാണ് ചിത്രം നിര്മിക്കുന്നത്. ഓർക്കേണ്ട ഒരേയൊരു മണ്ണ് രക്തത്തിൽ കുതിർന്ന മണ്ണാണ് എന്ന ടാഗ്ലൈനോടെയായിരുന്നു ചിത്രത്തിന്റെ പ്രഖ്യാപന പോസ്റ്റര്. എപ്പോഴായിരിക്കും പുതിയ ചിത്രങ്ങളുടെ ചിത്രീകരണമെന്നും ഇതുവരെ അറിയിച്ചിട്ടില്ല.
Read More: 'ചോദിക്കേണ്ടത് അയാളോട് ഞാൻ ചോദിച്ചോളാം', ആകാംക്ഷ വര്ദ്ധിപ്പിച്ച് 'എലോണ്' ട്രെയിലര്