മദ്രാസിൽ ജോലിക്കെന്നു പറഞ്ഞ് പോയി, അന്ന് അമ്മ 9 മാസം ഗർഭിണി; അച്ഛൻ ഉപേക്ഷിച്ചുപോയതിനെക്കുറിച്ച് മായ കൃഷ്‍ണ

'അച്ഛൻ വേറേ കല്യാണം കഴിച്ചെന്ന് അറിയാം, അതിൽ മക്കളൊന്നും ഇല്ല'.

മിനി സ്ക്രീൻ പ്രക്ഷകർക്ക് സുപരിചിതയായ താരമാണ് മായാ കൃഷ്‍ണ. കോമഡി ഫെസ്റ്റിവൽ ആയിരുന്നു മായയ്ക്ക് അഭിനയത്തിലേക്കുള്ള വേദി ഒരുക്കിയത്. ടെലിവിഷൻ പരമ്പരകളിലൂടെയും സ്റ്റേജ് ഷോകളിലൂടെയും മായ പിന്നീട് പ്രേക്ഷകരുടെ ഇഷ്ടം കവരുകയായിരുന്നു. ഐഡിയ സ്റ്റാർ സിംഗർ പരിപാടിയിൽ ബാക്ക്ഗ്രൗണ്ട് ഡാൻസ് കളിച്ചുകൊണ്ടാണ് മായയുടെ ടെലിവിഷനിലെ തുടക്കം. ഇപ്പോളിതാ ജീവിതത്തിലെ പ്രതിസന്ധികളും കടന്നു വന്ന കനൽ വഴികളുമെല്ലാം പങ്കുവെയ്ക്കുകയാണ് മായ. മൈൽസ്റ്റോൺ മേക്കേഴ്സിനു നൽകിയ അഭിമുഖത്തിലാണ് താരം മനസു തുറന്നത്.

അച്ഛൻ ഉപേക്ഷിച്ചു പോയതിനെക്കുറിച്ചും മായ അഭിമുഖത്തിൽ സംസാരിക്കുന്നുണ്ട്. ''അച്ഛന്റെയും അമ്മയുടെയും പ്രണയവിവാഹം ആയിരുന്നു. ഒന്നര വർഷമാണ് അവർ ഒന്നിച്ചു ജീവിച്ചത്. സന്തോഷത്തോടെ ആയിരിക്കുന്ന അവസ്ഥയിലാണ് അച്ചൻ അമ്മയെ ഇട്ടിട്ടു പോയത്. അച്ഛന് അന്ന് ബാങ്കിൽ ജോലിയുണ്ടായിരുന്നു.  മദ്രാസിലേക്ക് ബാങ്ക് മാറി, അവിടേക്ക് പ്രൊമോഷൻ കിട്ടി എന്നു പറഞ്ഞാണ് പോയത്. അന്ന് അമ്മ ഒൻപതു മാസം ഗർഭിണിയായിരുന്നു.

ഗർഭിണിയായതു കൊണ്ട് അമ്മയെ കൊണ്ടുപോകാൻ പറ്റില്ലെന്നും നിന്നെ എങ്ങനെ ഈ അവസ്ഥയിൽ ഇവിടെ നിർത്തിയിട്ടു പോകും, എനിക്കു നോക്കാൻ പറ്റുന്നില്ലല്ലോ എന്നോക്കെ ചോദിച്ച് അച്ഛൻ പോകുന്നതിന്റെ തലേദിവസം കരഞ്ഞെന്നും എന്നോട് അമ്മ പറഞ്ഞിട്ടുണ്ട്. അച്ഛൻ ഇങ്ങനെ പോകുന്നതാണെന്ന് അന്നൊന്നും ആരും വിചാരിക്കില്ലല്ലോ, അമ്മക്ക് വലിയ പഠിപ്പൊന്നും ഉണ്ടായിരുന്നില്ല, ലോകവിവരവും ഇല്ല'', മായാ കൃഷ്‍ണ പറഞ്ഞു.

''അച്ഛനെ കുറിച്ച് പിന്നെ ഒരു വിവരവും ഇല്ല. അച്ഛൻ വേറേ കല്യാണം കഴിച്ചെന്ന് അറിയാം, അതിൽ മക്കളൊന്നും ഇല്ല. രണ്ടു വർഷം മുൻപു വരെ അച്ഛൻ മരിച്ചിട്ടില്ല എന്നറിയാം. രണ്ടു വർഷത്തിനിടെയുള്ള കാര്യം അറിയില്ല. അച്ഛനെ കാണണം എന്ന് ഇതുവരെ തോന്നിയിട്ടില്ല. പക്ഷേ, കണ്ടാൽ അമ്മയെ എന്തിനാണ് ഇട്ടിട്ടു പോയത് എന്നു ചോദിക്കണം. അമ്മക്ക് അച്ഛനെ ഇപ്പോഴും ഇഷ്ടമാണ്, എനിക്ക് വിധിയില്ലായിരിക്കാം എന്നാണ് ഇപ്പോഴും പറയുന്നത്'', മായ കൃഷ്‍ണ കൂട്ടിച്ചേർത്തു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക