2 മണിക്കൂര്, 41 മിനിറ്റ് ദൈര്ഘ്യം; കാത്തിരിപ്പിനൊടുവില് 'മാലിക്' എത്തി
Synopsis
'ദൃശ്യം 2'നും 'ജോജി'ക്കും ശേഷം മലയാളത്തില് നിന്ന് ഏറ്റവും കാത്തിരിപ്പുയര്ത്തിയ ഡയറക്റ്റ് ഒടിടി റിലീസ്
ഫഹദ് ഫാസിലിനെ ടൈറ്റില് കഥാപാത്രമാക്കി മഹേഷ് നാരായണന് സംവിധാനം ചെയ്ത 'മാലികി'ന്റെ സ്ട്രീമിംഗ് ആമസോണ് പ്രൈം ആരംഭിച്ചു. രാത്രി 10 മണിക്കു ശേഷമാണ് ചിത്രം റിലീസ് ചെയ്യപ്പെട്ടത്. 2 മണിക്കൂര് 41 മിനിറ്റ് (161 മിനിറ്റ്) ആണ് ചിത്രത്തിന്റെ ദൈര്ഘ്യം.
'ദൃശ്യം 2'നും 'ജോജി'ക്കും ശേഷം മലയാളത്തില് നിന്ന് ഏറ്റവും കാത്തിരിപ്പുയര്ത്തിയ ഡയറക്റ്റ് ഒടിടി റിലീസ് ആണ് മാലിക്. ഫഹദിന്റെ കരിയറിലെ ഏറ്റവും വലിയ ബജറ്റ് ചിത്രമായ മാലിക് തിയറ്റര് റിലീസ് ലക്ഷ്യമാക്കി ഡിസൈന് ചെയ്യപ്പെട്ട സിനിമയായിരുന്നു. മെയ് 13 എന്ന റിലീസ് തീയതിയും ആദ്യം പ്ലാന് ചെയ്തിരുന്നു. എന്നാല് കൊവിഡ് പശ്ചാത്തലത്തില് അത് നടക്കാതെപോയി. കൊവിഡ് രണ്ടാംതരംഗം നീണ്ടുപോകുന്ന സാഹചര്യത്തില് സാമ്പത്തികപ്രതിസന്ധിയില് നിന്നു രക്ഷനേടാന് നിര്മ്മാതാവ് ഒടിടി റിലീസിനെ ആശ്രയിക്കുകയായിരുന്നു.
ആന്റോ ജോസഫ് ആണ് മാലിക്കിന്റെ നിര്മ്മാതാവ്. തിരക്കഥ, സംവിധാനം, എഡിറ്റിംഗ് മഹേഷ് നാരായണന്. ചിത്രത്തിലെ കഥാപാത്രത്തിനുവേണ്ടി ഫഹദ് 15 കിലോ ശരീരഭാരം കുറച്ചിരുന്നു. 2019 സെപ്റ്റംബറില് ചിത്രീകരണം ആരംഭിച്ച സിനിമയാണിത്. സാനു ജോണ് വര്ഗീസ് ആണ് ഛായാഗ്രാഹകന്. സംഗീതം സുഷിന് ശ്യാം. നൃത്തസംവിധാനം ഷോബി പോള്രാജ്. ചീഫ് അസോസിയേറ്റ് ഡയറക്ടര് സജിമോന് വി പി. ഫഹദ് ഫാസിലിനൊപ്പം നിമിഷ സജയന്, വിനയ് ഫോര്ട്ട്, ജലജ, ജോജു ജോര്ജ്, ദിലീഷ് പോത്തന്, ഇന്ദ്രന്സ്, സലിം കുമാര്, ദേവകി രാജേന്ദ്രന്, ദിവ്യ പ്രഭ തുടങ്ങി വലിയ താരനിര അണിനിരക്കുന്ന ചിത്രമാണിത്.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ