ജോർജും പിള്ളേരും സ്ട്രോങ്ങാ..ഡബിൾ സ്ട്രോങ്ങ്; 'സ്ക്വാഡി'ലെ അഞ്ചാമനെ സ്വന്തമാക്കി മമ്മൂട്ടി

സെപ്റ്റംബർ 28ന് റിലീസ് ചെയ്ത ചിത്രത്തിന് മികച്ച ബുക്കിം​ഗ് ആണ് ലഭിച്ചു കൊണ്ടിരിക്കുന്നത്.

ഇന്നത്തെ കാലത്ത് ഒരു സിനിമയ്ക്ക് ലഭിക്കാവുന്ന ഏറ്റവും വലിയ അം​ഗീകാരം ആണ് മൗത്ത് പബ്ലിസിറ്റി. ആദ്യദിനം ആദ്യഷോ കഴിഞ്ഞിറങ്ങുന്ന പ്രേക്ഷകരിൽ നിന്നും തുടങ്ങുന്നു ആ അം​ഗീകാരം. ഒരു സിനിമയുടെ ഭാവി നിശ്ചയിക്കപ്പെടുന്നത് ഈ പ്രേക്ഷക പ്രതികരണങ്ങളിലൂടെ ആണ്. അത്തരത്തിൽ ആദ്യദിനം മുതൽ പ്രേക്ഷക-നിരൂപക പ്രശംസകൾ ഏറ്റുവാങ്ങിയ സിനിമകൾ സമീപകാലത്ത് മലയാളത്തിൽ വർദ്ധിച്ചു വരികയാണ്. അക്കൂട്ടത്തിൽ ഏറ്റവും ഒടുവിലത്തെ ഉദാഹരണമാണ് കണ്ണൂർ സ്ക്വാഡ്. ജോർജ് മാർട്ടിൻ എന്ന പൊലീസ് ഉദ്യോ​ഗസ്ഥനായി മമ്മൂട്ടി നിറഞ്ഞാടിയ ചിത്രം ബോക്സ് ഓഫീസിലും മികച്ച കളക്ഷൻ നേടുകയാണ്. 

നാല് പേരടങ്ങിയ കണ്ണൂർ സ്ക്വാഡിന്റെ സന്തത സഹചാരിയായ ഒരു വണ്ടിയുണ്ട്. ഈ ടാറ്റാ സുമ വണ്ടിയും ചിത്രത്തിലെ പ്രധാന കഥാപാത്രം തന്നെയാണ്. അവസാന ഭാ​ഗത്ത് ആ വണ്ടി അപകടത്തിൽപ്പെടുമ്പോൾ ജോർജിന് ഉണ്ടാകുന്ന, ആ നാൽവർ സംഘത്തിന് ഉണ്ടാകുന്ന അതേ വേദന പ്രേക്ഷകരും അനുഭവിച്ചു. സ്ക്വാഡിനൊപ്പം ഊണിലും ഉറക്കത്തിലും ഒപ്പം ഉണ്ടായിരുന്ന ആ വണ്ടി സ്വന്തമാക്കിയിരിക്കുകയാണ് മമ്മൂട്ടി. 

കണ്ണൂർ സ്വക്വാഡിന്റെ തിരക്കഥകൃത്തുക്കളിൽ ഒരാളും സ്ക്വാഡിലെ അം​ഗങ്ങളിലും ഒരാളായ റോണി ഡേവിഡ് ആണ് ഇക്കാര്യം പറഞ്ഞത്. "രണ്ട് ടാറ്റാ സുമകളാണ് ഞങ്ങൾ ചിത്രത്തിനായി ഉപയോ​ഗിച്ചത്. ഒരെണ്ണം പോയി കഴിഞ്ഞാൽ അടുത്തത് എന്ന നിലയ്ക്ക് ബാക്ക് പോലെ വച്ചിരുന്നു. റോബി(സംവിധായകൻ) വണ്ടിയും കൊണ്ട് നമ്മളില്ലാതെ പോയി ചില ഷോട്ടുകൾ എടുത്തിട്ടുണ്ട്. അതാണ് വണ്ടിയുടെ ചില കട്ടുകള്‍. നിലവിൽ ആ വണ്ടി മമ്മൂട്ടി കമ്പനിയിൽ ഉണ്ടാകും. അദ്ദേഹം അത് വാങ്ങി. ഇത്രയും ദിവസം ഷൂട്ട് ഉള്ളതല്ലേ. അപ്പോൾ വാങ്ങാത വഴിയില്ലല്ലോ", എന്നാണ് റോണി പറഞ്ഞത്. ക്ലബ് എഫ്എമ്മനോട് ആയിരുന്നു റോണിയുടെ പ്രതികരണം. 

അതേസമയം, സെപ്റ്റംബർ 28ന് റിലീസ് ചെയ്ത ചിത്രത്തിന് മികച്ച ബുക്കിം​ഗ് ആണ് ലഭിച്ചു കൊണ്ടിരിക്കുന്നത്. കാലാവസ്ഥകളൊന്നും ബാധിക്കാതെ അവധി ദിവസങ്ങളിൽ അടക്കം വൻ തിരക്കാണ് തിയറ്ററുകളിൽ അനുഭവപ്പെടുന്നത്. ആവശ്യക്കാർ ഏറെ ആയതിനാൽ ലേറ്റ് നൈറ്റ് ഷോകളുടെ എണ്ണത്തിലും വർദ്ധനവുണ്ട്. നവാ​ഗതനായ റോബി വർ​ഗീസ് രാജ് ആണ് ചിത്രം സംവിധാനം ചെയ്തിരിക്കുന്നത്. 

ഏഷ്യാനെറ്റ് ന്യൂസ് തത്സമയ വാർത്തകൾ..