വരുന്നത് മമ്മൂട്ടിയുടെ മാസ് ആക്ഷന്‍ ചിത്രം; 'ഷൈലോക്കി'ന് പാക്കപ്പ്

കൊച്ചിയും കോയമ്പത്തൂരുമായിരുന്നു ചിത്രത്തിന്റെ പ്രധാന ലൊക്കേഷനുകള്‍. ഗുഡ്‌വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ് ആണ് നിര്‍മ്മാണം.  

മമ്മൂട്ടിയെ നായകനാക്കി അജയ് വാസുദേവ് സംവിധാനം ചെയ്യുന്ന 'ഷൈലോക്കി'ന്റെ ചിത്രീകരണം പൂര്‍ത്തിയായി. രാജാധിരാജ, മാസ്റ്റര്‍പീസ് എന്നീ ചിത്രങ്ങള്‍ക്ക് ശേഷം മമ്മൂട്ടിയും അജയ് വാസുദേവും ഒന്നിക്കുന്ന ചിത്രമാണിത്. രണ്ട് വാസത്തോളം നീണ്ട ചിത്രീകരണത്തിനാണ് പൂര്‍ത്തീകരണം ആയിരിക്കുന്നത്.

ഷൈലോക്ക് ഒരു മാസ്-ആക്ഷന്‍-ഫാമിലി ചിത്രമായിരിക്കുമെന്ന് അജയ് വാസുദേവ് നേരത്തേ ഏഷ്യാനെറ്റ് ന്യൂസ് ഓണ്‍ലൈനിനോട് പറഞ്ഞിരുന്നു. അനീഷ് ഹമീദ്, ബിബിന്‍ മോഹന്‍ എന്നീ നവാഗതരുടേതാണ് ചിത്രത്തിന്റെ തിരക്കഥ. മീന, രാജ്കിരണ്‍, ബിബിന്‍ ജോര്‍ജ്, ബൈജു, സിദ്ദിഖ്, കലാഭവന്‍ ഷാജോണ്‍, ഹരീഷ് കണാരന്‍, ജോണ്‍ വിജയ് എന്നിവര്‍ വിവിധ കഥാപാത്രങ്ങളെ അവതരിപ്പിക്കുന്നു.

കൊച്ചിയും കോയമ്പത്തൂരുമായിരുന്നു ചിത്രത്തിന്റെ പ്രധാന ലൊക്കേഷനുകള്‍. ഗുഡ്‌വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ് ആണ് നിര്‍മ്മാണം. അതേസമയം 'മാമാങ്ക'മാണ് മമ്മൂട്ടിയുടെ അടുത്ത ചിത്രം. എം പത്മകുമാര്‍ സംവിധാനം ചെയ്തിരിക്കുന്ന ബിഗ് ബജറ്റ് ചിത്രം മലയാളത്തിന് പുറമെ തമിഴ്, തെലുങ്ക്, ഹിന്ദി ഭാഷാ പതിപ്പുകളിലും തീയേറ്ററുകളിലെത്തും.