ഈ വരവ് വെറുതെയാവില്ല, പ്രിയ ജോഡികൾ ഒരുമിച്ചെത്തുന്നു; രസിപ്പിച്ച് 'ക്വീൻ എലിസബത്ത്' ട്രെയിലര്‍

ഒരിടവേളയ്ക്ക് ശേഷം മകള്‍ എന്ന സിനിമയിലൂടെയാണ് മീര ജാസ്മിന്‍ തിരിച്ചുവന്നത്.

എവർഗ്രീൻ കോംബോ ആയ മീര ജാസ്മിനും നരേനും ഒന്നിച്ചെത്തുന്ന "ക്വീൻ എലിസബത്ത് ” എന്ന  ചിത്രത്തിന്റെ ട്രെയിലര്‍ പുറത്തിറങ്ങി. കർക്കശക്കാരിയായ ഒരു ലേഡി ബോസും അവരെ പ്രണയിക്കുന്ന യുവാവും ആയാണ് മീരയും നരെയ്നും ചിത്രത്തിൽ എത്തുന്നത്. എം പത്മകുമാർ സംവിധാനം ചെയ്യുന്ന ചിത്രം ഡിസംബർ 29ന് റിലീസിനെത്തും

ഒരു റൊമാൻറിക് കോമഡി എന്റർടെയിനറായിരിക്കും ചിത്രമെന്നാണ് ട്രെയിലർ നൽകുന്ന സൂചന. ശ്വേതാ മേനോൻ, രമേശ് പിഷാരടി, വി കെ പ്രകാശ്, ശ്യാമ പ്രസാദ്, ജോണി ആന്റണി, മല്ലികാ സുകുമാരൻ, ജൂഡ് ആന്റണി ജോസഫ്, ആര്യ, ശ്രുതി രജനികാന്ത്, സാനിയ ബാബു, നീനാ കുറുപ്പ്, മഞ്ജു പത്രോസ്, വിനീത് വിശ്വം, രഞ്ജി കാങ്കോൽ, ചിത്രാ നായർ എന്നിവരും ചിത്രത്തിൽ പ്രധാന കഥാപാത്രങ്ങളായുണ്ട്. 'അച്ചുവിന്റെ അമ്മ', 'മിന്നാമിന്നിക്കൂട്ടം' എന്നീ ചിത്രങ്ങൾക്ക് ശേഷം മീരയും നരേനും ഒന്നിക്കുന്ന ചിത്രം കൂടിയാണിത്.  

'പടച്ചോനെ നിങ്ങള് കാത്തോളീ', വെള്ളം' തുടങ്ങിയ ഹിറ്റുകള്‍ സമ്മാനിച്ച ബ്ലൂ മൗണ്ട് പ്രൊഡക്‌ഷൻസിന്റെ ബാനറിൽ രഞ്ജിത്ത് മണമ്പ്രക്കാട്ട്, എം പത്മകുമാർ, ശ്രീറാം മണമ്പ്രക്കാട്ട് എന്നിവരാണ് നിര്‍മാണം. പ്രൊഡക്ഷൻ കൺട്രോളർ ശിഹാബ് വെണ്ണലയാണ്. വസ്ത്രാലങ്കാരം ആയീഷാ ഷഫീർ സേട്ട്. കുട്ടിക്കാനം, കൊച്ചി, കോയമ്പത്തൂർ എന്നിവിടങ്ങളിലാണ് ചിത്രത്തിന്റെ ലൊക്കേഷനുകൾ. കലാസംവിധാനം എം ബാവയാണ്. ഉല്ലാസ് കൃഷ്‍ണ ചീഫ് അസ്സോസിയേറ്റ് ഡയറക്ടറും ആണ്. ജിത്തു പയ്യന്നൂർ മേക്കപ്പും നിര്‍വഹിക്കുന്നു. 

ഒരിടവേളയ്ക്ക് ശേഷം മകള്‍ എന്ന സിനിമയിലൂടെയാണ് മീര ജാസ്മിന്‍ തിരിച്ചുവന്നത്. ജയറാം നായകനായി എത്തിയ ചിത്രം സംവിധാനം ചെയ്തത് സത്യന്‍ അന്തിക്കാട് ആയിരുന്നു.