ജഗതി ശ്രീകുമാറിന് ജന്മദിന ആശംസകളുമായി മോഹൻലാലും മമ്മൂട്ടിയും

മോഹൻലാലും മമ്മൂട്ടിയും ജഗതി ശ്രീകുമാറിനൊപ്പമുള്ള ഫോട്ടോയും പങ്കുവെച്ചിട്ടുണ്ട്.

മലയാളത്തിന്റെ എക്കാലത്തെയും പ്രിയപ്പെട്ട ചലച്ചിത്ര താരമായ ജഗതി ശ്രീകുമാറിന്റെ ജന്മദിനമാണ് ഇന്ന്. മോഹൻലാലും മമ്മൂട്ടിയും ജഗതിക്ക് ജന്മദിന ആശംസകളുമായി രംഗത്ത് എത്തിയിരിക്കുകയാണ്. പ്രിയപ്പെട്ട അമ്പിളി ചേട്ടന് ജന്മദിന ആശംസകള്‍ എന്നാണ് മോഹൻലാല്‍ എഴുതിയിരിക്കുന്നത്. പ്രിയപ്പെട്ട ജഗതി ശ്രീകുമാറിന് ജന്മദിന ആശംസകള്‍ എന്ന് എഴുതി മമ്മൂട്ടിയും ഫോട്ടോ പങ്കുവെച്ചിരിക്കുന്നു.

മകള്‍ക്കൊപ്പം പാട്ടുപാടുന്ന ജഗതിയുടെ ഒരു വീഡിയോ അടുത്തിടെ സാമൂഹ്യമാധ്യമങ്ങളില്‍ ശ്രദ്ധയാകര്‍ഷിച്ചിരുന്നു.'ക്യാഹൂവാ തേരാവാദ്' എന്ന പ്രശസ്‍തമായ റാഫി ഗാനമാണ് മകള്‍ പാര്‍വതിയും ജഗതി ശ്രീകുമാര്‍ പാടുന്നത്. ജഗതിയുടെ ശബ്‍ദം കേള്‍ക്കാൻ കഴിഞ്ഞതിന്റെ സന്തോഷം ആരാധകരും സാമൂഹ്യ മാധ്യമത്തില്‍ അറിയിച്ചിരുന്നു. 2022ല്‍ 'സിബിഐ' സിനിമയുടെ അഞ്ചാം ഭാഗത്തിലൂടെ ജഗതി വെള്ളിത്തിരയിലേക്ക് മികച്ച തിരിച്ചുവരവ് നടത്തിയിരുന്നു.

വാഹനാപകടത്തില്‍ പരുക്കേറ്റതിന് ശേഷം ആരോഗ്യപ്രശ്‍നങ്ങള്‍ കാരണം ജഗതിക്ക് വര്‍ഷങ്ങളായി അഭിനയരംഗത്ത് ഇല്ലായിരുന്നു. എന്നാല്‍ കഴിഞ്ഞ വര്‍ഷം ചില സിനിമകളില്‍ ജഗതി അഭിനയിച്ചുതുടങ്ങി. സിബിഐ' സീരിസിലെ ചിത്രത്തില്‍ ജഗതി വേണമെന്ന് മമ്മൂട്ടി തന്നെ ആവശ്യപ്പെടുകയായിരുന്നു. 'സിബിഐ' പുതിയ ചിത്രത്തില്‍ ഏതെങ്കിലും സീനിലെങ്കിലും ജഗതിയുടെ സാന്നിധ്യം വേണമെന്നായിരുന്നു മമ്മൂട്ടി ആവശ്യപ്പെട്ടത്. എന്തായാലും മികച്ച രംഗത്തില്‍ തന്നെ ചിത്രത്തില്‍ ജഗതി അഭിനയിക്കുകയും 'സിബിഐ ദ ബ്രെയിനി'ല്‍ തന്റെ ഭാഗം അവിസ്‍മരണീയമാക്കുകയും ചെയ്‍തിരുന്നു.

'വിക്രം' എന്ന കഥാപാത്രമായിട്ടായിരുന്നു ജഗതി മമ്മൂട്ടി നായകനായ 'സിബിഐ' സിനിമയില്‍ ഉണ്ടായിരുന്നത്.  കഥാഗതിയില്‍ 'സേതുരാമയ്യര്‍'ക്ക് കേസ് അന്വേഷണത്തില്‍ ഒരു തുമ്പു നല്‍കുന്ന ഭാഗമായിരുന്നു  'സിബിഐ ദ ബ്രെയിൻ'  ജഗതിക്ക് അഭിനയിക്കേണ്ടിയിരുന്നത്. ശരീരത്തിന്റെ ചലനത്തിന് ബുദ്ധിമുട്ടുകള്‍ ഉണ്ടെങ്കിലും കഥാ സന്ദര്‍ഭത്തിന് ആവശ്യമായ തരത്തില്‍ ഭാവങ്ങള്‍ ജഗതി അവതരിപ്പിച്ചു. ജഗതി ശ്രീകുമാര്‍ പരസ്യ ചിത്രങ്ങളുടെയും ഭാഗമായി അഭിനയത്തില്‍ സജീവമാകുകയാണ്.