അഖണ്ഡ 2വിന് റിലീസിനുമുന്നേ 100 കോടിയോ?, ഒടിടി റൈറ്റ്‍സ് സ്വന്തമാക്കിയത് ആ വമ്പൻ കമ്പനി

അഖണ്ഡ 2വിന്റെ ഒടിടി അപ്‍ഡേറ്റ്.

നന്ദമുരി ബാലകൃഷ്‍ണ നായകനായി വരാനിരിക്കുന്ന ചിത്രമാണ് അഖണ്ഡ 2. ബോയപട്ടി ശ്രീനു സംവിധാനം ചെയ്യുന്ന ഈ ചിത്രം ബാലകൃഷ്‍ണയുടെ കരിയറിലെ ഒരു പ്രധാന നാഴികക്കല്ലായി മാറുമെന്നാണ് ആരാധകർ പ്രതീക്ഷിക്കുന്നത്. അഖണ്ഡ 2ന്റെ ടീസര്‍ ശ്രദ്ധയാകര്‍ഷിച്ചിരുന്നു. അഖണ്ഡ 2വിന്റെ ഒടിടി റൈറ്റ്‍സിന് 100 കോടി രൂപയ്‍ക്കടുത്ത് നിര്‍മാതാക്കള്‍ ആവശ്യപ്പെട്ടിരുന്നുവെന്നതിനാല്‍ ആമസോണ്‍ പ്രൈം വീഡിയോ, നെറ്റ്‍ഫ്ലിക്സ് തുടങ്ങിയ കമ്പനികള്‍ പിൻമാറിയെന്ന് റിപ്പോര്‍ട്ടുണ്ടായിരുന്നു. എന്തായാലും ജിയോ ഹോട്‍സ്റ്റാര്‍ ചിത്രത്തിന്റെ ഒടിടി റൈറ്റ്‍സ് സ്വന്തമാക്കി എന്നതാണ് പുതിയ റിപ്പോര്‍ട്ട്.

ചിത്രത്തിന്റെ റിലീസ് 2025 സെപ്റ്റംബർ 25 ന് പകരം ക്രിസ്‍മസിനോ (ഡിസംബറില്‍ പ്രഭാസിന്റെ ദ രാജാ സാബ് പ്രദര്‍ശനത്തിനെത്തും) പൊങ്കൽ 2026ലേക്ക് മാറ്റിവച്ചേക്കാമെന്ന അഭ്യൂഹമുണ്ട്. പവൻ കല്യാണിന്റെ ദേ കോൾ ഹിം ഒജിയും (2025 സെപ്റ്റംബർ 25) അതേ തീയതിയിൽ റിലീസ് ചെയ്യാൻ ലക്ഷ്യമിടുന്നതിനാനാണ് അഖണ്ഡ 2 വൈകാൻ സാധ്യതയുണ്ടെന്ന് റിപ്പോർട്ടുകൾ പ്രചരിക്കുന്നത്. ഔദ്യോഗിക സ്ഥിരീകരണം ഇതുവരെ വന്നിട്ടില്ല. അഖണ്ഡ 2ല്‍ പ്രജ്ഞ ജയ്‌സ്വാൾ, സംയുക്ത തുടങ്ങിയവര്‍ക്ക് പുറമേ നിരവധി പ്രമുഖ അഭിനേതാക്കൾ വേഷിടുന്നു. 14 റീൽസ് പ്ലസ് ബാനറിൽ റാം അചന്തയും ഗോപിചന്ദും ചേർന്നാണ് ഇത് നിർമ്മിക്കുന്നത്. തമൻ ആണ് ഈ ചിത്രത്തിന്റെ സംഗീതസംവിധായകൻ.

തെലുങ്കു സൂപ്പർതാരം നന്ദമുരി ബാലകൃഷ്‍ണയെ നായകനാക്കി ഗോപിചന്ദ് മലിനേനി ഒരുക്കുന്ന ചരിത്ര ഇതിഹാസ ചിത്രവും പ്രഖ്യാപിച്ചിട്ടുണ്ട്. 'എൻബികെ111' എന്ന് താൽകാലികമായി പേര് നൽകിയിരിക്കുന്ന ഈ ചിത്രം നിർമ്മിക്കുന്നത് വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു ആണ്. ജൂൺ 10 നു ജന്മദിനം ആഘോഷിച്ച ബാലകൃഷ്‍ണയുടെ ജന്മദിനത്തിന് മുന്നോടിയായിട്ടാണ് അദ്ദേഹത്തിന്റെ 111-ാമത് ചിത്രം ഔദ്യോഗികമായി പ്രഖ്യാപിച്ചത്. 'വീര സിംഹ റെഡ്ഡി' എന്ന തകർപ്പൻ ചിത്രത്തിന് ശേഷം നന്ദമുരി ബാലകൃഷ്‍ണ- ഗോപിചന്ദ് മലിനേനി ടീം ഒന്നിക്കുന്ന ചിത്രമാണിത്. "പെദ്ധി" എന്ന പാൻ ഇന്ത്യൻ ചിത്രം നിർമ്മിക്കുന്നതിനൊപ്പം വെങ്കട സതീഷ് കിലാരു വൃദ്ധി സിനിമാസിന്റെ ബാനറിൽ നിർമ്മിക്കുന്ന ബിഗ് ബഡ്‍ജറ്റ് ചിത്രമാണ് 'എൻബികെ111'.

പ്രകോപിതനായ ഒരു സിംഹത്തിന്റെ ഉഗ്രമായ ചിത്രമാണ് ഇതിന്റെ പ്രഖ്യാപന പോസ്റ്ററിൽ ഉൾപ്പെടുത്തിയിരുന്നത്. അതിന്റെ മുഖത്തിന്റെ പകുതി ലോഹ കവചം കൊണ്ട് മൂടപ്പെട്ടിരിക്കുന്നു. മുഖത്തിന്റെ ബാക്കി പകുതി തുറന്നിരിക്കുകയും വന്യമായി തുടരുകയും ചെയ്യുന്നു. ഈ ചിത്രത്തിൽ ബാലകൃഷ്‍ണ അവതരിപ്പിക്കാൻ പോകുന്ന കഥാപാത്രത്തിന്റെ തീവ്രമായ ദ്വൈത സ്വഭാവത്തിന്റെയും വന്യമായ ശക്തിയുടെയും പ്രതീകമാണ് പോസ്റ്ററിലെ ചിത്രം.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക