യാഷും നയൻതാരയും ഒന്നിക്കുന്നു; ഗീതു മോഹൻദാസ് ചിത്രം 'ടോക്സിക്' ക്യാരക്ടർ പോസ്റ്റർ പുറത്ത്

ഗീതു മോഹൻദാസ് സംവിധാനം ചെയ്യുന്ന യാഷ് ചിത്രം 'ടോക്സികി'ലെ നയൻതാരയുടെ ക്യാരക്ടർ പോസ്റ്റർ പുറത്ത്

യാഷ്- ഗീതു മോഹൻദാസ് കൂട്ടുകെട്ടിൽ പുറത്തിറങ്ങുന്ന 'ടോക്സിക്' എന്ന ചിത്രത്തിന് വേണ്ടി പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററിന് വമ്പൻ സ്വീകാര്യതയായിരുന്നു ലഭിച്ചിരുന്നത്. രക്തരൂക്ഷിതമായ ബാത്ത് ടബ്ബിൽ പരുക്കൻ ലുക്ക് അവതരിപ്പിക്കുന്ന യാഷ് പോസ്റ്ററിൽ ഉണ്ട്. മുഖം ദൃശ്യമല്ലെങ്കിലും, ഒരു പ്രകാശരേഖയാൽ പ്രകാശിതനായി അദ്ദേഹം പുറത്തേക്ക് നോക്കുന്നു. അദ്ദേഹത്തിന്റെ ശരീരം ടാറ്റൂകളാൽ അലങ്കരിച്ചിരിക്കുന്നു, അദ്ദേഹത്തിന്റെ കഥാപാത്രത്തെ സൂചിപ്പിക്കുന്ന ഒരു തികഞ്ഞ ബാഡാസ് വൈബ് നൽകുന്നു ഈ പോസ്റ്റർ.

നേരത്തെ ചിത്രത്തിലെ കിയാര അദ്വാനിയുടെ ക്യാരക്ടർ പോസ്റ്റർ പുറത്തുവിട്ടിരുന്നു. ഇപ്പോഴിതാ നയൻതാരയുടെ ക്യാരക്ടർ പോസ്റ്റർ പുറത്തുവിട്ടിരിക്കുകയാണ് അണിയറപ്രവർത്തകർ. ഗംഗ എന്ന കഥാപാത്രമായാണ് ചിത്രത്തിൽ നയൻ‌താര എത്തുന്നത്. അതേസമയം നാദിയ എന്ന കഥാപാത്രമായാണ് ചിത്രത്തിൽ കിയാര എത്തുന്നത്. വമ്പൻ താരനിര അണിനിരക്കുന്ന ടോക്സികിന് വേണ്ടി പ്രതീക്ഷയോടെയാണ് ആരാധകർ കാത്തിരിക്കുന്നത്. മാർച്ച് 19 നാണ്ചിത്രം തിയേറ്ററുകളിൽ എത്തുന്നത്. ദേശീയ അവാർഡ് ജേതാവ് രാജീവ് രവിയാണ് ചിത്രത്തിന്റെ ഛായാഗ്രഹണം നിർവഹിക്കുന്നത്. കെജിഎഫ് ചിത്രത്തിൽ യാഷുമായി മുൻകാല സഹകരണത്തിന് പേരുകേട്ട രവി ബസ്രൂർ ആണ് സംഗീതം ഒരുക്കിയിരിക്കുന്നത്.

എഡിറ്റിംഗ് ഉജ്വൽ കുൽക്കർണിയാണ്, പ്രൊഡക്ഷൻ ഡിസൈനിന്റെ ചുമതല ടി പി ആബിദിനാണ്. ജോൺ വിക്കിലെ പ്രവർത്തനത്തിന് പ്രശസ്തനായ ഹോളിവുഡ് ആക്ഷൻ ഡയറക്ടർ ജെ ജെ പെറിയും ദേശീയ അവാർഡ് ജേതാവായ ആക്ഷൻ ഡയറക്ടർ അൻബറിവും ചേർന്ന് ചിത്രത്തിന്റെ ഏറ്റവും പ്രധാനപ്പെട്ട ചില ആക്ഷൻ സീക്വൻസുകൾ ഒരുക്കിയിട്ടുണ്ട്.

ഗീതു മോഹൻദാസ് സംവിധാനം ചെയ്യുന്ന മൂന്നാമത്തെ ചിത്രമാണ് ടോക്സിക്. നേരത്തെ നിവിൻ പോളിയെ നായകനാക്കി ഒരുക്കിയ 'മൂത്തോൻ' മികച്ച പ്രേക്ഷക- നിരൂപക പ്രശംസകൾ നേടുകയും അന്താരാഷ്ട ഫിലിം ഫെസ്റ്റിവലുകളിൽ പ്രദർശിപ്പിക്കുകയും ചെയ്ത ചിത്രമായിരുന്നു. 2014 ൽ നവാസുദ്ധീൻ സിദ്ധിഖി, ഗീതാഞ്ജലി ഥാപ്പ എന്നിവരെ പ്രധാന കഥാപാത്രങ്ങളായി ഒരുക്കിയ 'ലയേഴ്‌സ് ഡൈസ്' ആയിരുന്നു ഗീതു മോഹൻദാസിന്റെ ആദ്യ ഫീച്ചർ സിനിമ.