'നോ, ഗോ, ടെല്‍'; ശിശുദിനത്തിൽ ആ ബോധവല്‍ക്കരണ വീഡിയോ വീണ്ടും പങ്കുവച്ച് നിവിൻ പോളി

ശിശുദിനത്തോടനുബന്ധിച്ച്, കുട്ടികളുടെ സുരക്ഷയെക്കുറിച്ചുള്ള ഒരു പൊതു സേവന പ്രഖ്യാപനം നിവിൻ പോളി വീണ്ടും പങ്കുവച്ചു

ദേശീയ ശിശുദിനത്തോടനുബന്ധിച്ച്, കുട്ടികളുടെ സുരക്ഷയെക്കുറിച്ചുള്ള ശക്തമായ ഒരു പൊതു സേവന പ്രഖ്യാപനം ഇൻസ്റ്റാഗ്രാമിൽ വീണ്ടും പങ്കുവച്ചുകൊണ്ട് നിവിൻ പോളി. ഒരു സുപ്രധാന സന്ദേശം ആണ് ഇതിലൂടെ അദ്ദേഹം വീണ്ടും ശ്രദ്ധയിൽ കൊണ്ട് വന്നത്. 2017 ഏപ്രിലിൽ പുറത്തിറങ്ങിയ ഈ വീഡിയോ, "നല്ല സ്പർശനവും മോശം സ്പർശനവും" എന്ന സെൻസിറ്റീവ് വിഷയത്തെ അഭിസംബോധന ചെയ്യുന്ന ഒന്നാണ്. ഇന്നത്തെ സാമൂഹിക സാഹചര്യത്തിൽ വളരെ പ്രസക്തമായ ഒന്ന് കൂടിയാണിത്.

ജൂഡ് ആന്റണി ജോസഫ് സംവിധാനം ചെയ്ത ഈ ഹ്രസ്വചിത്രം, ബോധിനി എന്ന എൻ‌ജി‌ഒയും കേരള സ്റ്റേറ്റ് കമ്മിഷൻ ഫോർ പ്രൊട്ടക്ഷൻ ഓഫ് ചൈൽഡ് റൈറ്റ്സും സഹകരിച്ചാണ് നിർമ്മിച്ചിരിക്കുന്നത്. സുരക്ഷിതമല്ലാത്ത സാഹചര്യങ്ങൾ തിരിച്ചറിയാനും അവയിൽ നിന്ന് രക്ഷപ്പെടാനും വിശ്വസ്തനായ ഒരു മുതിർന്ന വ്യക്തിയോട് കാര്യങ്ങൾ തുറന്നു പറയാനും കുട്ടികളെ പ്രാപ്തരാക്കുന്ന, "നോ, ഗോ, ടെല്‍" എന്ന അത്യാവശ്യ സുരക്ഷാ നിയമങ്ങളിലൂടെ ഒരു കൂട്ടം കുട്ടികളെ നിവിൻ പോളി നയിക്കുന്ന രീതിയിലാണ് ഈ വീഡിയോ ഒരുക്കിയിരിക്കുന്നത്. ദുരിതത്തിലായ കുട്ടികൾക്ക് സഹായം നൽകുന്ന ഒരു പ്രധാന ഇടമായ ചൈൽഡ്‌ലൈൻ ഹെൽപ്പ്‌ലൈൻ്റെ നമ്പർ ആയ 1098 ഉം ഈ വീഡിയോയിൽ ഏറ്റവും പ്രാധാന്യത്തോടെ ഉൾപ്പെടുത്തിയിട്ടുണ്ട്.