വിവാഹം ഇറ്റലിയിലാക്കല്ലേയെന്ന് പാപ്പരാസി, ചിരിയടക്കാനാകാതെ ബോളിവുഡ് നടി പരിനീതി

വിവാഹം ഇറ്റലിയിലാക്കരുതെന്ന് പറഞ്ഞതിന്റെ കാരണമറിഞ്ഞപ്പോള്‍ താരത്തിന് ചിരിയടക്കാനായില്ല.

ബോളിവുഡ് നടി പരിനീതി ചോപ്രയുടെ വിവാഹ നിശ്ചയം അടുത്തിടെയാണ് നടന്നത്. രാഘവ് ഛദ്ദയാണ് പരിനീതിയുടെ വരൻ. പരിനീതി ചോപ്രയുടെയും രാഘവ് ഛദ്ദയുടെയും വിവാഹം എന്നായിരിക്കുമെന്ന് വ്യക്തമാക്കിയിട്ടില്ല. പരിനീതി ചോപ്രയുടെ വിവാഹത്തിന് പങ്കെടുക്കണമെന്ന് പറഞ്ഞ പാപ്പരാസിക്ക് നടി നല്‍കിയ മറുപടിയാണ് ഇപ്പോള്‍ ചര്‍ച്ചയാകുന്നത്.

ഞങ്ങള്‍ക്ക് താങ്കളുടെ വിവാഹത്തില്‍ പങ്കെടുക്കണമെന്ന് പറയുകയായിരുന്നു പാപ്പരാസി നടിയോട്. വരൂ എന്നായിരുന്നു ചോദ്യമുന്നയിച്ച പാപ്പരാസിക്ക് താരം നല്‍കിയ മറുപടി. വിവാഹം ഇറ്റലിയില്‍ വെച്ച് ആകല്ലേയെന്ന് താരത്തോട് പാപ്പരാസി നിര്‍ദ്ദേശിച്ചു. അനുഷ്‍ക ശര്‍മ- വിരാട് കോലി, ദീപിക പദുക്കോണ്‍- രണ്‍വീര്‍ സിംഗ് തുടങ്ങിയവരുടെ വിവാഹം ഇറ്റലിയില്‍ വെച്ച് നടന്നതും അവിടെ പ്രവേശനം ലഭിക്കാതിരുന്നതും സൂചിപ്പിച്ച് പാപ്പരാസി പറഞ്ഞത് കേട്ട് പരിനീതി ചോപ്രയും പൊട്ടിച്ചിരിച്ചു.

പരിനീതി ചോപ്രയുടെയും രാഘവ് ഛദ്ദയുടെയും വിവാഹ നിശ്ചയത്തിന് ഒട്ടേറെ പ്രമുഖര്‍ പങ്കെടുത്തിരുന്നു. ദില്ലി മുഖ്യമന്ത്രി അരവിന്ദ് കെജ്‍രിവാള്‍, പഞ്ചാബ് മുഖ്യമന്ത്രി ഭഗവന്ത് മൻ, പരിനീതിയുടെ ബന്ധുവും നടിയുമായ പ്രിയങ്ക ചോപ്രയ്‍ക്കുമൊപ്പം രാഷ്‍ട്രീയ- സിനിമാ രംഗത്തെ മറ്റ് പ്രമുഖരും ചടങ്ങില്‍ പങ്കെടുത്തു. മനീഷ് മല്‍ഹോത്രയാണ് ചോപ്രയുടെ ഡിസൈനര്‍. ദില്ലിയില്‍ ആയിരുന്നു വിവാഹ നിശ്ചയം.

'ലേഡീസ് വേഴ്‍സസ് റിക്കി ബാല'യിലൂടെയാണ് പരിനീതി ചോപ്രവെള്ളിത്തിരയില്‍ എത്തുന്നത്. രണ്‍വീര്‍ സിംഗും അനുഷ്‍ക ശര്‍മയും പ്രധാന വേഷങ്ങളില്‍ എത്തിയ 'ലേഡീസ് വേഴ്‍സസ് റിക്കി ബാല'യില്‍ സഹ കഥാപാത്രമായിട്ടാണ് പരിനീതി ചോപ്ര വേഷമിട്ടത്. 'നമസ്‍തേ ഇംഗ്ലണ്ട്', 'സന്ദീപ് ഓര്‍ പിങ്കി ഫരാര്‍', 'ദ ഗേള്‍ ഓണ്‍ ഓണ്‍ ദ ട്രെയിൻ', 'സൈന', 'ദാവത്ത് ഇ ഇഷ്‍ക്', 'കോഡ് നെയിം തിരംഗ' തുടങ്ങിയവയില്‍ വേഷമിട്ട പരിനീതി ചോപ്രയുടേതായി ഇനി പ്രദര്‍ശനത്തിന് എത്താനുള്ളത് 'ചംകീല' ആണ്. 'കാപ്‍സൂള്‍ ഗില്‍' ചോപ്രയുടേതായി ചിത്രീകരിക്കുന്നുമുണ്ട്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക