'അവസാന ശ്വാസം വരെ ചെയ്യും, നിങ്ങൾ പൊരുത്തപ്പെടുന്നതായിരിക്കും നല്ലത്'; വിമർശനങ്ങളോട് പ്രതികരിച്ച് പേളി

'കാരണം ഞാൻ അവനെ സ്നേഹിക്കുന്നു. അവൻ എന്റെ ലോകമാണ്. നിങ്ങൾ അതിനോട് പൊരുത്തപ്പെടുന്നതായിരിക്കും നല്ലത്'.

നിരവധി വർഷങ്ങളായി മിനിസ്ക്രീനിലും ബിഗ് സ്ക്രീനിലുമൊക്കെ നിറഞ്ഞു നിൽക്കുന്ന മുഖമാണ് പേളി മാണിയുടേത്. ‌അവതാരക, മോട്ടിവേഷണൽ സ്‍പീക്കർ, സംരംഭക, യൂട്യൂബർ എന്നീ നിലകളിലെല്ലാം പ്രശസ്‍തയാണ് താരം. ബിഗ്‌ബോസ് റിയാലിറ്റി ഷോയ്ക്കിടെയിലാണ് മിനിസ്‌ക്രീൻ താരമായ ശ്രീനിഷ് അരവിന്ദുമായി താരം പ്രണയത്തിലായത്. പിന്നാലെ ഇരുവരും വിവാഹിതരുമായി. കേരളത്തിനു പുറത്തും പേളിക്ക് നിരവധി ആരാധകരുണ്ട്. പേളിയുടെ യൂട്യൂബ് ചാനലിൽ വരുന്ന അതിഥികളോട് സംസാരിക്കുന്നതിനിടെയും അല്ലാത്തപ്പോഴുമൊക്കെ ഭർത്താവ് ശ്രീനിഷിനെക്കുറിച്ച് ഇടക്കിടെ സംസാരിക്കുന്നതിനെക്കുറിച്ച് സമൂഹമാധ്യമങ്ങളിൽ ചിലർ വിമർശനങ്ങളുമായി രംഗത്തെത്തിയിരുന്നു. അത്തരം വിമർ‌ശനങ്ങൾക്കുള്ള മറുപടിയെന്നോണമാണ് പേളിയുടെ പുതിയ ഫെയ്സ്ബുക്ക് പോസ്റ്റ്.

''അവൻ എന്റേതാണ്, ഞാൻ അവന്റേതും. ചിലർ പറയും, ഞാൻ അവനെ എപ്പോഴും പ്രോമോട്ട് ചെയ്യുന്നു, പ്രശംസിക്കുന്നു, അവനെക്കുറിച്ച് മാത്രം സംസാരിക്കുന്നു എന്നൊക്കെ. അതെ, ഞാൻ അത് ചെയ്യും, എന്റെ അവസാന ശ്വാസം വരെ, പൂർണഹൃദയത്തോടെ തന്നെ ചെയ്യും. കാരണം ഞാൻ അവനെ സ്നേഹിക്കുന്നു. അവൻ എന്റെ ലോകമാണ്. നിങ്ങൾ അതിനോട് പൊരുത്തപ്പെടുന്നതായിരിക്കും നല്ലത്'', എന്നാണ് ശ്രീനിഷിനൊപ്പുള്ള ചിത്രങ്ങൾ പോസ്റ്റ് ചെയ്ത് പേളി ഇൻസ്റ്റഗ്രാമിൽ കുറിച്ചത്.

നിരവധി ആളുകളാണ് പേളിയും ശ്രീനിഷും ഒന്നിച്ചുള്ള ചിത്രങ്ങൾക്കു താഴെ സ്നേഹം അറിയിച്ചെത്തുന്നത്. നിങ്ങൾ എന്നും ഞങ്ങളുടെ പേളിഷ് ആയിരിക്കുമെന്നും ബിഗ്ബോസിൽ നിന്നും ലഭിച്ച നിധികളാണെന്നും വളരെ വ്യത്യസ്തരായ ദമ്പതികളാണ് ഇരുവരുമെന്നുമാണ് ആരാധകർ കമന്റ് ബോക്സിൽ പറയുന്നത്. അതേസമയം, ഈ പോസ്റ്റിനു താഴെയും പേളിയോടുള്ള വിമർശനത്തിൽ ഉറച്ചു നിൽക്കുന്നവരെ കാണാം. അഭിമുഖങ്ങൾ ഭർത്താവിനെ പുകഴ്ത്താൻ ഉള്ളതാകരുത് എന്നും അവിടെ അതിഥികളായിരിക്കണം കൂടുതൽ സംസാരിക്കേണ്ടത് എന്നുമാണ് വിമർശകർ പറയുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക