'ബഹിഷ്കരണ ഭ്രാന്തന്മാരേ ശ്ശ്.....'; പഠാന് ആശംസയുമായി പ്രകാശ് രാജ്

പഠാനിലെ ​ഗാനത്തിനും നായിക ദീപികാ പദുകോൺ ​ഗാനരം​ഗത്തിൽ ഉപയോ​ഗിച്ച ബിക്കിനിയുടെ നിറത്തിനുമെതിരെ ചിത്രത്തിന്റെ ട്രെയ്ലറും ​ഗാനവും പുറത്തിറങ്ങിയപ്പോൾ മുതൽ പ്രതിഷേധമുയർന്നിരുന്നു.

ഷാരൂഖ് ഖാന്റെ പുതിയ ചിത്രമായ പഠാന് ആശംസയുമായി നടൻ പ്രകാശ് രാജ്. ബഹിഷ്കരണ ഭ്രാന്തന്മാരേ ശ്...എന്നാണ് പ്രകാശ് രാജ് ട്വീറ്റ് ചെയ്തത്. ചിത്രത്തിന്റെ വിജയത്തിന് ആശംസകളെന്നും അദ്ദേഹം ട്വീറ്റ് ചെയ്തു. പഠാനിലെ ​ഗാനത്തിനും നായിക ദീപികാ പദുകോൺ ​ഗാനരം​ഗത്തിൽ ഉപയോ​ഗിച്ച ബിക്കിനിയുടെ നിറത്തിനുമെതിരെ ചിത്രത്തിന്റെ ട്രെയ്ലറും ​ഗാനവും പുറത്തിറങ്ങിയപ്പോൾ മുതൽ പ്രതിഷേധമുയർന്നിരുന്നു. ബിക്കിനിയുടെ നിറം കാവിയാണെന്നായിരുന്നു ആരോപണം. ​ഗാനരം​ഗത്തിനെതിരെയും വിമർശനമുയർന്നു. തുടർന്ന് ​ഗാനരം​ഗത്തിലെ ചില ഭാ​ഗങ്ങൾ സെൻസർ ചെയ്താണ് ചിത്രം പുറത്തിറങ്ങിയത്. ചിത്രത്തിനെതിരെയുള്ള ബഹിഷ്കരാണാഹ്വാനത്തെ മറികടന്ന് ചിത്രം വൻ വിജയമാകുമെന്ന സൂചനയാണ് ബോക്സോഫീസിൽ നിന്നും വരുന്നത്. 

നാല് വർഷത്തിന് ശേഷം റിലീസ് ചെയ്ത ഷാരൂഖ് ഖാൻ ചിത്രം പഠാന് ഉ​ഗ്രൻ വരവേൽപ്പ്. പോസിറ്റീവ് റിവ്യൂസുമായി മുന്നേറുന്ന ചിത്രം പുതു ഉണർവാണ് ബോളിവുഡിന് നൽകിയത്. ഷാരൂഖിനൊപ്പം ജോൺ എബ്രഹാമും ദീപികയും സൽമാൻ ഖാനും തകർത്തഭിനയിച്ച ചിത്രത്തിന്റെ കളക്ഷൻ റിപ്പോർട്ടും പുറത്തുവരികയാണ്. പാൻ ഇന്ത്യൻ ഹിറ്റ് ചിത്രമായ കന്നഡ സിനിമ കെജിഎഫ്-2 ന്റെ കളക്ഷൻ റെക്കോർഡും തകർത്തുവെന്ന് മാർക്കറ്റ് അനലിസ്റ്റുകൾ പറയുന്നു. ബോക്‌സ് ഓഫീസ് റിപ്പോർട്ടുകൾ അനുസരിച്ച് പഠാന്റെ ഹിന്ദി പതിപ്പ് മാത്രം ആദ്യദിവസം ഏകദേശം 51 കോടി രൂപയാണ് കളക്ട് ചെയ്തത്. വിദേശത്തു നിന്നടക്കം ചിത്രം 70-80 കോടി രൂപയാണ് ചിത്രം നേടിയത്. 2019ൽ പുറത്തിറങ്ങിയ വാർ 50 കോടിയും കെജിഎഫ് 2 (ഹിന്ദി) പതിപ്പ് 52 കോടിയും നേടിയിരുന്നു. പ്രവൃത്തി ദിനമായിട്ട് പോലും എക്കാലത്തെയും മികച്ച ഓപ്പണിങ്ങാണ് ചിത്രത്തിന് ലഭിച്ചത്.