അന്ന് 16 കോടി മുടക്കി 400 കോടി തൂക്കി ! രണ്ടാം ഭാ​ഗത്തിന് 125 കോടി ചെലവ്, 1000 കോടി കിട്ടുമോ? ഒപ്പം കൂടി പൃഥ്വിരാജ്

2022 സെപ്റ്റംബര്‍ 30ന് ആയിരുന്നു കാന്താരയുടെ ആദ്യഭാ​ഗം റിലീസ് ചെയ്തത്.

ചില സിനിമകൾ അങ്ങനെയാണ് സൈലന്റായി വന്ന് ഹിറ്റടിച്ചങ്ങ് പോകും. അത്തരത്തിലൊരു സിനിമ 2022ൽ റിലീസ് ചെയ്തിരുന്നു. ഋഷഭ് ഷെട്ടി സംവിധായകനാകും നടനും തകർത്താടിയ കാന്താര. കേരളത്തിലടക്കം വൻ പ്രതികരണം നേടിയ ഈ കന്ന‍‍ഡ ചിത്രത്തിന്റെ പ്രീക്വൽ റിലീസിന് ഒരുങ്ങുകയാണ്. ചിത്രം ഒക്ടോബർ 2ന് തിയറ്ററുകളിൽ എത്തും. വൻ ദൃശ്യവിസ്മയം തീർത്ത കാന്താരയുടെ പ്രീക്വൽ എന്താണ് ഒരുക്കി വച്ചിരിക്കുന്നതെന്നറിയാൻ പ്രതീക്ഷയോടെ കാത്തിരിക്കുകയാണ് പ്രേക്ഷകരും.

ഈ അവസരത്തിൽ കാന്താര ചാപ്റ്റർ 1ന്റെ കേരള വിതരണാവകാശം സംബന്ധിച്ച വിവരങ്ങൾ പുറത്തുവരികയാണ്. പൃഥ്വിരാജിന്റെ ഉടമസ്ഥതയിലുള്ള പൃഥ്വിരാജ് പ്രൊഡക്ഷൻസിനാണ് കാന്താര 2വിന്റെ വിതരണാവകാശം വിറ്റു പോയിരിക്കുന്നത്. ഇക്കാര്യം ഔദ്യോ​ഗികമായി പ‍ൃഥ്വിരാജും ടീമും അറിയിച്ചിട്ടുണ്ട്. 125 കോടി മുടക്കിയാണ് കാന്താര നിർമിച്ചിരിക്കുന്നത്. പ്രമോഷൻ മെറ്റീരിയലുകൾ പുറത്തുവന്നതിന് പുറമെ കാന്താര 2 ആയിരം കോടി രൂപ കളക്ട് ചെയ്യുമെന്നാണ് സിനിമാസ്വാദകരുടെ വാദം.

2022 സെപ്റ്റംബര്‍ 30ന് ആയിരുന്നു കാന്താരയുടെ ആദ്യഭാ​ഗം റിലീസ് ചെയ്തത്. 16 കോടി ആയിരുന്നു സിനിമയുടെ നിർമ്മാണ ചെലവ്. കർണാടകത്തിൽ വൻ പ്രതികരണവും മൗത്ത് പബ്ലിസിറ്റിയും നേടിയ ചിത്രത്തിന്റെ ഡബ് വെർഷൻ മലയാളത്തിലും റിലീസ് ചെയ്തു. ഇവിടെയും മികച്ച പ്രകടനം കാഴ്ചവച്ച സിനിമയുടെ ആ​ഗോള ബോക്സ് ഓഫീസ് കളക്ഷൻ 407.82 കോടി രൂപയാണെന്ന് ട്രാക്കിം​ഗ് സൈറ്റായ സാക്നിൽക് റിപ്പോർട്ട് ചെയ്യുന്നു. ഇന്ത്യനെറ്റ് കളക്ഷന്‍ 309.64 കോടിയും 363.82 ഗ്രോസ് കളക്ഷനുമാണ്. 44 കോടിയാണ് കാന്താരയുടെ ഓവര്‍സീസ്‍ കളക്ഷന്‍. ഋഷബ് ഷെട്ടി എഴുതി സംവിധാനം ചെയ്ത് ചിത്രം തന്നെയാണ് കാന്താര പ്രീക്വലും.