'ഇതെന്തൊരു ഡെഡിക്കേഷനാണ്', ആടുജീവിതം നോട്ടത്തില്‍ തന്നെയുണ്ട്, ഇനി ബോക്സ് ഓഫീസ് തൂക്കാൻ നടൻ പൃഥ്വിരാജ്

പൃഥ്വിരാജിന്റെ ഡെഡിക്കേഷൻ കണ്ട് അമ്പരന്ന് താരത്തിന്റെ ആരാധകര്‍.

പൃഥ്വിരാജിന്റെ ജീവിതത്തിലെ എക്കാലത്തെയും വമ്പൻ ചിത്രമാണ് ആടുജീവിതം. വമ്പൻ മേയ്‍ക്കോവറിലാണ് നായകൻ പൃഥ്വിരാജ് ചിത്രത്തില്‍ എത്തുന്നത്. നജീബായുള്ള പകര്‍ന്നാട്ടത്തില്‍ ഭാരം കുറച്ചാണ് താരം ആടുജീവിത്തില്‍ ഉള്ളത്. ആടുജീവിതത്തിലെ നജീബായുള്ള പൃഥ്വിരാജിന്റെ പുതിയ ഫോട്ടോകളും കണ്ട് അമ്പരന്നിരിക്കുകയാണ് മലയാളി ആരാധകര്‍.

മെലിഞ്ഞ രൂപത്തിലുള്ള നജീബായുള്ള പൃഥ്വിരാജിന്റെ ഫോട്ടോകള്‍ നേരത്തെ പുറത്തുവിട്ടിരുന്നു. എന്നാല്‍ പ്രേക്ഷകര്‍ കാണാത്ത തരത്തിലുള്ള താരത്തിന്റെ രൂപവും ഉണ്ടാകും എന്ന് നേരത്തെ പൃഥ്വിരാജിന്റെ സഹോദരനും നടനുമായ ഇന്ദ്രജിത്ത് വ്യക്തമാക്കിയിരുന്നു. എന്തായാലും പൃഥ്വിരാജ് വിസ്‍മയിപ്പിക്കുന്ന വേഷപകര്‍ച്ചയാണ് ചിത്രത്തില്‍ നടത്തിയിരിക്കുന്ന എന്നത് വ്യക്തമായ ഒന്നാണ്. എന്തൊരു ഡെഡിക്കേഷനാണെന്നാണ് പൃഥ്വിരാജിന്റെ പുതിയൊരു ഫോട്ടോ കണ്ട ആരാധകര്‍ ഒന്നടങ്കം അഭിപ്രായപ്പെടുന്നത്.

നജീബ് ഗള്‍ഫില്‍ നേരിട്ട ദുരിതത്തിന്റെ കഥ മുഴുവൻ പൃഥ്വിരാജിന്റെ നോട്ടത്തില്‍ നിന്നും രൂപത്തില്‍ നിന്നും ഭാവത്തില്‍ നിന്നും വായിച്ചെടുക്കാമെന്നാണ് ആരാധകര്‍ പറയുന്നത്. കണ്ണീര്‍ വറ്റിയ നജീബിന്റെ ദുരിതങ്ങള്‍ ഫോട്ടോകളില്‍ നിന്ന് വ്യക്തമാകുന്നു. സിനിമയായി കാണുമ്പോള്‍ നോവലിനേക്കാളും തീക്ഷ്‍ണത എന്തായാലും ആടുജീവിതത്തിന് ഉണ്ടാകും എന്ന് പ്രേക്ഷകര്‍ പ്രതീക്ഷിക്കുന്നു. മാര്‍ച്ച് 28നാണ് റിലീസ്.

രണ്ടായിരത്തിപതിനെട്ട് ഫെബ്രുവരിയിലാണ് പത്തനംതിട്ടയിലായിരുന്നു 'ആടുജീവിതം' സിനിമ ചിത്രീകരണം നടൻ പൃഥ്വിരാജും ബ്ലസിയും തുടങ്ങിയത്. അതേവര്‍ഷം ജോര്‍ദ്ദാനിലും ചിത്രീകരണം നടന്നു. പിന്നീട് 2020ലും ജോര്‍ദാനില്‍ ചിത്രീകരിച്ചു. എന്നാല്‍ കൊവിഡ് പശ്ചാത്തലത്തില്‍ അന്തര്‍ദേശീയ വിമാന സര്‍വ്വീസുകള്‍ റദ്ദാക്കപ്പെട്ടതോടെ രണ്ട് മാസത്തിലേറെ സിനിമാസംഘം അവിടെ കുടുങ്ങി. 2022 മാര്‍ച്ച് 16ന് സഹാറ, അള്‍ജീരിയ തുടങ്ങിയിടങ്ങളില്‍ അടുത്ത ഘട്ടം ചിത്രീകരണം ആരംഭിച്ചു. കൊവിഡ് പശ്ചാത്തലത്തില്‍ ജോര്‍ദ്ദാനില്‍ പ്രഖ്യാപിക്കപ്പെട്ട കര്‍ഫ്യൂ ഒരിക്കല്‍ക്കൂടി ചിത്രീകരണത്തെ തടസ്സപ്പെടുത്തിയെങ്കിലും ഏപ്രില്‍ 14ന് പുനരാരംഭിച്ചു. ജൂണ്‍ 14ന് ചിത്രീകരണം പൂര്‍ത്തിയായി.  റസൂല്‍ പൂക്കുട്ടിയാണ് സിനിമയുടെ സൗണ്ട് ഡിസൈനര്‍. കെ എസ് സുനിലാണ് ഛായാഗ്രഹണം. എ ആര്‍ റഹ്‍മാനാണ് ചിത്രത്തി്നറെ സംഗീതം നിര്‍വഹിക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക