Pushpa Director : കരിയറിലെ വലിയ വിജയം; 'പുഷ്പ' അണിയറ പ്രവര്ത്തകര്ക്ക് ഒരു ലക്ഷം രൂപ വീതം നല്കി സംവിധായകന്
Synopsis
രണ്ട് ഭാഗങ്ങാളായെത്തുന്ന ചിത്രത്തിന്റെ ആദ്യഭാഗത്തിന്റെ പേര് പുഷ്പ ദ റൈസ് എന്നായിരുന്നു. രക്തചന്ദന കടത്തുകാരനായ പുഷ്പരാജായിട്ടാണ് അല്ലു അര്ജുന് എത്തുന്നത്.
അല്ലു അര്ജുന്(Allu Arjun) നായകനായെത്തി തിയറ്ററുകളെ ഇളക്കി മറിച്ച ചിത്രമാണ് പുഷ്പ(Pushpa). സിനിമ പ്രഖ്യാപിച്ചതുമുതല് സോഷ്യല് മീഡിയയിലെ പ്രധാന ചര്ച്ചകളിലൊന്നും പുഷ്പ തന്നെ ആയിരുന്നു. ഡിസംബര് 17ന് റിലീസ് ചെയ്ത സിനിമ 2021ലെ ഏറ്റവുമധികം പണം വാരിയ ചിത്രവുമായി മാറി. ഇപ്പോഴിതാ ഈ വിജയത്തിൽ തനിക്കൊപ്പം നിന്ന അണിയറ പ്രവർത്തകർക്ക് സർപ്രൈസ് നൽകിയിരിക്കുകയാണ് സംവിധായകൻ സുകുമാർ.
അണിയറ പ്രവര്ത്തകര്ക്ക് ഒരു ലക്ഷം രൂപ വീതം പാരിതോഷികമാണ് സുകുമാർ നൽകിയത്. ചിത്രീകരണ വേളയില് നിര്ലോഭമായ പിന്തുണ നല്കിയ എല്ലാ അഭിനേതാക്കളോടും അണിയറപ്രവര്ത്തകരോടും സുകുമാര് തന്റെ നന്ദി പറഞ്ഞു.
റിലീസ് ചെയ്ത ആദ്യദിനം തന്നെ കൊവിഡിന് ശേഷമുള്ള ഇന്ത്യയിലെ ഏറ്റവും വലിയ ഓപ്പണിംഗ് ഗ്രോസര് എന്ന റെക്കോര്ഡ് പുഷ്പ നേടിയിരുന്നു. ഈ വര്ഷം ഏറ്റവും വലിയ ഓപ്പണിംഗ് ലഭിച്ച മാസ്റ്ററിന്റേയും സ്പൈഡര്മാന്റേയും റെക്കോര്ഡ് തകര്ത്തെറിഞ്ഞാണ് പുഷ്പ നേട്ടം സ്വന്തമാക്കിയത്. ലോകമാകമാനം വമ്പന് ഹൈപ്പുമായെത്തിയ ‘സ്പൈഡര്മാന് നോ വേ’ ഹോമുമായുള്ള ക്ലാഷിനിടയിലും മികച്ച പെര്ഫോമന്സാണ് പുഷ്പ തിയേറ്ററുകളില് കാഴ്ചവെച്ചത്. വടക്കേ ഇന്ത്യയിലാകെ പരിമിതമായ തിയേറ്ററുകളില് മാത്രമാണ് റിലീസ് ചെയ്തതെങ്കിലും ഒരു ദിവസം കൊണ്ട് 3.5 കോടിയാണ് പുഷ്പ നേടിയത്.
രണ്ട് ഭാഗങ്ങാളായെത്തുന്ന ചിത്രത്തിന്റെ ആദ്യഭാഗത്തിന്റെ പേര് പുഷ്പ ദ റൈസ് എന്നായിരുന്നു. രക്തചന്ദന കടത്തുകാരനായ പുഷ്പരാജായിട്ടാണ് അല്ലു അര്ജുന് എത്തുന്നത്. ഇതുവരെ കാണാത്ത ലുക്കിലും മാനറിസത്തിലുമാണ് അല്ലു അര്ജുന് പുഷ്പയില് എത്തുന്നത്. 250 കോടി രൂപ ചെലവിട്ടാണ് ചിത്രം ഒരുക്കുന്നത്. സുകുമര് സംവിധാനം ചെയ്ത പുഷ്പ മൈത്രി മൂവി മേക്കേഴ്സിന്റെയും മുട്ടംസെട്ടി മീഡിയയുടെയും ബാനറില് നവീന് യെര്നേനിയും വൈ. രവിശങ്കറും ചേര്ന്നാണ് നിര്മിച്ചത്. മലയാളത്തിന്റെ സ്വന്തം ഫഹദ് ഫാസിലായിരുന്നു ചിത്രത്തിലെ പ്രധാന വില്ലന് വേഷത്തില് എത്തിയത്. ചിത്രത്തിന്റെ രണ്ടാം ഭാഗം ഉടൻ പ്രേക്ഷകർക്ക് മുന്നിലെത്തും.