'ചരിത്ര മുഹൂര്ത്തം', 'ആര്ആര്ആര്' ഗാനം ഓസ്കര് ചുരുക്ക പട്ടികയില് ഇടംനേടിയതിനെ കുറിച്ച് രാം ചരണ്
Synopsis
മൊത്തം ഇന്ത്യൻ സിനിമ ഇൻഡസ്ട്രിക്ക് ഇത് ചരിത്ര മുഹൂര്ത്തമാണ് എന്ന് രാം ചരണ്.
തൊണ്ണൂറ്റിയഞ്ചാമത് ഓസ്കര് അവാര്ഡിനുള്ള ചുരുക്ക പട്ടികയില് ആര്ആര്ആറും തെരഞ്ഞെടുക്കപ്പെട്ടിരുന്നു. 'നാട്ടു നാട്ടു' എന്ന ഗാനമാണ് ഓസ്കാര് അവാര്ഡിനുള്ള പരിഗണനാ പട്ടികയില് ഇടംപിടിച്ചത്. ഒറിജിനല് സ്കോര് കാറ്റഗറിയിലാണ് രാജമൗലി ചിത്രത്തിലെ ഗാനം ഇടംനേടിയത്. ഇപ്പോഴിതാ അഭിമാന നേട്ടത്തില് സന്തോഷം പ്രകടിപ്പിച്ച് രംഗത്ത് എത്തിയിരിക്കുകയാണ് രാം ചരണ്.
മൊത്തം ഇന്ത്യൻ സിനിമ ഇൻഡസ്ട്രിക്ക് ഇത് ചരിത്ര മുഹൂര്ത്തമാണ്. അക്കാദമി അവാര്ഡിനായുള്ള ചുരുക്ക പട്ടികയില് ഇടംനേടുന്ന ആദ്യ ഇന്ത്യൻ ഗാനമാകുക എന്നത് വലിയ അഭിമാനമാണ്. എം എം കീരവാണിയുടെയും എസ് എസ് രാജമൗലിയുടെയും ഭാവനയും മാജിക്കുമാണ് നേട്ടത്തിന് കാരണം എന്നും രാം ചരണ് എഴുതിയിരിക്കുന്നു. ആര്ആര്ആര് ഓസ്കറിനായി എന്ന് അര്ഥം വരുന്ന ഹാഷ്ടാഗും രാം ചരണ് ട്വീറ്റില് പങ്കുവെച്ചിരിക്കുന്നു.
'നാട്ടു നാട്ടു' എന്ന ഗാനം ചിത്രത്തിന്റെ റിലീസിനു മുന്നേ ഹിറ്റായിരുന്നു. എം എം കീരവാണിയാണ് ചിത്രത്തിലെ ഗാനത്തിന് സംഗീത സംവിധാനം ചെയ്തിരിക്കുന്നത്. ചന്ദ്രബോസിന്റെ വരികള് രാഹുല് കാല ഭൈരവ എന്നിവര് ചേര്ന്നാണ് പാടിയിരിക്കുന്നത്. ചിത്രത്തില് പ്രധാന കഥാപാത്രങ്ങളെ അവതരിപ്പിച്ച ജൂനിയര് എൻടിആറും രാം ചരണും 'നാട്ടു നാട്ടു' ഗാനത്തിന് ചെയ്ത നൃത്തച്ചുവടുകളും തരംഗമായിരുന്നു.
അജയ് ദേവ്ഗണ്, ആലിയ ഭട്ട്, ഒലിവിയ മോറിസ്, റേ സ്റ്റീവെന്സണ്, അലിസണ് ഡൂഡി തുടങ്ങിയ താരങ്ങളും 'ആര്ആര്ആറി'ല് അഭിനയിച്ചിരുന്നു. രാജമൗലിയുടെ അച്ഛൻ കെ വി വിജയേന്ദ്ര പ്രസാദ് ആണ് ചിത്രത്തിന് തിരക്കഥയെഴുതിയത്.1920കള് പശ്ചാത്തലമായ ചിത്രം അല്ലൂരി സീതാരാമ രാജു, കോമരം ഭീം എന്നീ സ്വാതന്ത്ര്യ സമര സേനാനികളുടെ കഥയാണ് പറയുന്നത്. യഥാര്ഥ ജീവിതത്തില് നേരിട്ട് കണ്ടിട്ടില്ലാത്ത ഇവര് പരസ്പരം കണ്ടിരുന്നെങ്കിലോ എന്ന ഭാവനയിലാണ് ചിത്രത്തിന്റെ കഥ രാജമൗലി എഴുതിയിരിക്കുന്നത്. ഡിവിവി എന്റര്ടൈന്മെന്റിന്റെ ബാനറില് ഡിവിവി ദാനയ്യയാണ് ചിത്രം നിര്മ്മിച്ചത്. 1200 കോടി രൂപയില് അധികം ചിത്രം കളക്ഷൻ നേടിയിരുന്നു. അടുത്തിടെ ജപ്പാനിലും റിലീസ് ചെയ്ത ചിത്രം മികച്ച പ്രതികരണമാണ് നേടിയത്.
Read More: 'കാന്താര' രണ്ടാം ഭാഗമുണ്ടാകുമെന്ന് ഉറപ്പായി