'വണ്‍ മോര്‍ ടേക്ക്' വിളിക്കുന്ന മമ്മൂട്ടി; റോഷാക്ക് മേക്കിംഗ് വീഡിയോ

മമ്മൂട്ടി കരിയറില്‍ ഇതുവരെ അവതരിപ്പിക്കാത്ത തരത്തിലുള്ള കഥാപാത്രമായിരുന്നു ചിത്രത്തിലെ ലൂക്ക് ആന്‍റണി

സിനിമകളുടെ തെരഞ്ഞെടുപ്പില്‍ മലയാളത്തില്‍ സമീപകാലത്ത് ഏറ്റവുമധികം പരീക്ഷണങ്ങള്‍ക്ക് തയ്യാറായ സൂപ്പര്‍താരം മമ്മൂട്ടിയാണ്. അതിന്‍റെ ഏറ്റവും മികച്ച തെളിവായിരുന്നു അദ്ദേഹത്തിന്‍റെ ഏറ്റവും ഒടുവിലത്തെ റിലീസ് റോഷാക്ക്. സൈക്കോളജിക്കല്‍ റിവെഞ്ച് ഡ്രാമ വിഭാഗത്തില്‍ പെടുന്ന ചിത്രത്തിന്‍റെ പ്ലോട്ടും അവതരണവുമൊക്കെ മമ്മൂട്ടി ഇതുവരെ ചെയ്യാത്ത തരത്തിലുള്ളതായിരുന്നു. വലിയ പ്രേക്ഷക സ്വീകാര്യതയുമാണ് ചിത്രത്തിന് ലഭിച്ചത്. ഇപ്പോഴിതാ ചിത്രത്തിന്‍റെ മേക്കിംഗ് വീഡിയോ പുറത്തുവിട്ടിരിക്കുകയാണ് അണിയറക്കാര്‍.

ക്യാമറയ്ക്കു മുന്നില്‍ എപ്പോഴും പെര്‍ഫെക്ഷനു വേണ്ടി ശ്രമിക്കുന്ന മമ്മൂട്ടി എന്ന അഭിനേതാവിനെ ഈ വീഡിയോയില്‍ കാണാം. ലൂക്ക് ആന്‍റണി എന്ന കഥാപാത്രത്തിലേക്ക് പകര്‍ന്നാട്ടം നടത്തുന്ന മമ്മൂട്ടിയെയും. നാല് മിനിറ്റോളം ദൈര്‍ഘ്യമുള്ള വീഡിയോയാണ് അണിയറക്കാര്‍ പുറത്തുവിട്ടിരിക്കുന്നത്. ഒക്ടോബര്‍ 7 ന് തിയറ്ററുകളില്‍ എത്തിയ ചിത്രം പിന്നീട് ഒടിടി റിലീസ് ആയി ഡിസ്നി പ്ലസ് ഹോട്ട്സ്റ്റാറിലൂടെയും എത്തിയിരുന്നു. നവംബര്‍ 11 ന് ആയിരുന്നു ഒടിടി റിലീസ്.

മമ്മൂട്ടി കരിയറില്‍ ഇതുവരെ അവതരിപ്പിക്കാത്ത തരത്തിലുള്ള കഥാപാത്രമായിരുന്നു ചിത്രത്തിലെ ലൂക്ക് ആന്‍റണി. യുകെ പൌരത്വമുള്ള, ദുബൈയില്‍ ബിസിനസ് ഉള്ള ലൂക്ക് അവിചാരിതമായി ഒരു നാട്ടില്‍പുറ പ്രദേശത്ത് എത്തിപ്പെടുകയാണ്. വനപാതയില്‍ തന്‍റെ കാര്‍ അപകടത്തില്‍ പെട്ടതിനെത്തുടര്‍ന്ന് ഭാര്യയെ കാണ്മാനില്ലെന്ന പരാതിയുമായി പൊലീസ് സ്റ്റേഷനിലെത്തുന്ന ലൂക്കിനെയാണ് പ്രേക്ഷകര്‍ ആദ്യം കാണുന്നത്. എന്നാല്‍ പോകെപ്പോലെ ഈ പ്രദേശത്ത് അവിചാരിതമായി എത്തിയതല്ലെന്നും അയാള്‍ക്കൊരു മിഷന്‍ ഉണ്ടെന്നും പ്രേക്ഷകര്‍ മനസിലാക്കുന്നു.

മമ്മൂട്ടിക്കൊപ്പം ബിന്ദു പണിക്കര്‍, ജഗദീഷ്, കോട്ടയം നസീര്‍ തുടങ്ങിയ മറ്റ് അഭിനേതാക്കളുടെ പ്രകടനങ്ങളും കൈയടി നേടിയിരുന്നു.  കെട്ട്യോളാണെന്റെ മാലാഖ എന്ന ചിത്രത്തിന് ശേഷം നിസാം ബഷീര്‍ സംവിധാനം ചെയ്‍ത ചിത്രമാണിത്. മമ്മൂട്ടി കമ്പനിയുടെ ബാനറില്‍ മമ്മൂട്ടി നിര്‍മ്മിച്ച രണ്ടാമത്തെ ചിത്രവുമാണ് റോഷാക്ക്. ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെറര്‍ ഫിലിംസാണ് ചിത്രം തീയറ്ററുകളില്‍ എത്തിച്ചത്. പറഞ്ഞ വിഷയത്തിനൊപ്പം സാങ്കേതിക മേഖലകളില്‍ പുലര്‍ത്തിയ മികവിന്‍റെ പേരിലും ചിത്രം കൈയടി നേടിയിരുന്നു. മിഥുന്‍ മുകുന്ദന്‍ ആണ് ചിത്രത്തിന്‍റെ സംഗീത സംവിധായകന്‍.