'കണ്ടോളൂ.. ചിരിച്ചോളൂ.. പക്ഷേ പഴയ ഗുണ്ടകളെ കളിയാക്കരുതേ'; അപേക്ഷാപൂർവ്വം സൈജു കുറുപ്പ്

ജയൻ എന്ന കഥാപാത്രമായി നിന്ന്,  താൻ ഒരു പഴയ ഗുണ്ട ആണെങ്കിലും പാവമാണ് എന്നും, തനിക്കു ബന്ധുക്കളും സുഹൃത്തുക്കളും തന്ന ഒരു പണിയാണ് ഒരു കല്യാണം നടത്തികൊടുക്കുക എന്നതെന്നും സൈജു കുറുപ്പ് പറയുന്നു. 

നടൻ സൈജു കുറുപ്പിന്റെ കരിയറിലെ നൂറാം ചിത്രം വരുന്ന ഫെബ്രുവരി ഇരുപത്തിയഞ്ചിന് റിലീസ് ചെയ്യുകയാണ്. ഗുണ്ട ജയൻ(Upacharapoorvam Gunda Jayan) എന്ന ടൈറ്റിൽ കഥാപാത്രത്തെ ആണ് സൈജു കുറുപ്പ് അവതരിപ്പിച്ചിരിക്കുന്നത്. ദുൽഖർ സൽമാൻ ആണ് ചിത്രത്തിന്റെ നിർമ്മാതാവ്. അരുൺ വൈഗ സംവിധാനം ചെയ്ത ഈ കോമഡി എന്റെർറ്റേനർ രചിച്ചിരിക്കുന്നത് രാജേഷ് വർമ്മയാണ്. ഇപ്പോഴിതാ സൈജു സോഷ്യൽ മീഡിയയിൽ പോസ്റ്റ് ചെയ്ത പുതിയ വീഡിയോയാണ് ശ്രദ്ധ നേടുന്നത്.

ജയൻ എന്ന കഥാപാത്രമായി നിന്ന്,  താൻ ഒരു പഴയ ഗുണ്ട ആണെങ്കിലും പാവമാണ് എന്നും, തനിക്കു ബന്ധുക്കളും സുഹൃത്തുക്കളും തന്ന ഒരു പണിയാണ് ഒരു കല്യാണം നടത്തികൊടുക്കുക എന്നതെന്നും സൈജു കുറുപ്പ് പറയുന്നു. കണ്ടോളൂ.. ചിരിച്ചോളൂ.. പക്ഷേ പഴേ ഗുണ്ടകളെ കളിയാക്കരുതേ, ഇതൊരു അപേക്ഷയാണ് എന്നും സൈജു കുറുപ്പ് പറയുന്നുണ്ട്. 

വേഫെയര്‍ ഫിലിംസിന്റെ ബാനറില്‍ ദുല്‍ഖര്‍ സല്‍മാനും മൈ ഡ്രീംസ് എന്റര്‍ടൈന്‍മെന്റിന്റെ ബാനറില്‍ സെബാബ് ആനിക്കാടും ചേർന്നാണ് ചിത്രം നിർമ്മിച്ചിരിക്കുന്നത്. സൈജു കുറുപ്പിനെ കൂടാതെ സിജു വില്‍സണ്‍, ശബരീഷ് വര്‍മ്മ, ജോണി ആന്റണി, സാബുമോന്‍, സുധീര്‍ കരമന, ജാഫര്‍ ഇടുക്കി, ബിജു സോപാനം, വിജിലേഷ്, ബൈജു എഴുപുന്ന, തട്ടിം മുട്ടിം ഫെയിം സാഗര്‍ സൂര്യ, വൃന്ദ മേനോന്‍, നയന, പാര്‍വതി എന്നിവരും അഭിനയിച്ചിരിക്കുന്ന ഈ ചിത്രം ഒരു കല്യാണത്തെ ചുറ്റിപ്പറ്റിയാണ് കഥ പറയുന്നത് എന്നാണ് ട്രെയിലറും ​ഗാനങ്ങളും സൂചിപ്പിക്കുന്നത്.

‘സാധാരണ സിനിമ തുടങ്ങി കുറച്ച് കഴിയുമ്പോള്‍ ഞാന്‍ വടിയാകും', പക്ഷേ: സന്തോഷ് കീഴാറ്റൂര്‍

മികച്ച കഥാപാത്രങ്ങളിലൂടെ മലയാള സിനിമാസ്വാദകരുടെ മനസ്സിൽ ഇടംനേടിയ താരമാണ് സന്തോഷ് കീഴാറ്റൂര്‍(Santhosh Keezhattoor). ഒട്ടേറെ സിനിമകൾ അദ്ദേഹം ചെയ്തിട്ടുണ്ടെങ്കിലും പല സിനിമകളിലും മരിക്കാനായിരുന്നു അദ്ദേഹത്തിന്റെ കഥാപാത്രങ്ങളുടെ വിധി. വിക്രമാദിത്യന്‍, പുലിമുരുകന്‍, കമ്മാരസംഭവം, കാവല്‍ എന്നിവ ഉദാഹരണമാണ്. ഇപ്പോഴിതാ മരിക്കാത്ത കഥാപാത്രത്തെ ലഭിച്ച സന്തോഷത്തിലാണ് നടനിപ്പോൾ. 

സൗബിന്‍ ഷാഹിര്‍ നായകനായ കള്ളന്‍ ഡിസൂസയിലാണ് മുഴുനീളെ കഥാപാത്രമായി സന്തോഷ് കീഴാറ്റൂർ എത്തുന്നത്. സുരഭി ലക്ഷ്മി പങ്കുവച്ച വീഡിയോയിലാണ് താരം ഇക്കാര്യം പറയുന്നത്. ‘സാധാരണ ഭാര്യയുമായി സിനിമ കാണാന്‍ പോകുമ്പോള്‍ ഇച്ചിരി സങ്കടമാവും. സിനിമ തുടങ്ങി കുറച്ച് കഴിയുമ്പോഴേക്കും ആള് വടിയാവും. സിനിമ തുടങ്ങി തീരുന്നതുവരെ ഒരു നടന്റെ സാന്നിധ്യം സിനിമയിലുണ്ടെന്ന് പറയുന്നത് ഭയങ്കര സന്തോഷം തരുന്ന കാര്യമാണ്,’ സന്തോഷ് പറയുന്നു. സന്തോഷേട്ടന്‍ മരിക്കാത്ത സിനിമ കണ്ടിട്ട് വരികയാണെന്നും ട്രെയ്‌ലര്‍ വന്നപ്പോഴും താഴെ ‘ഒരു മരണം ഉറപ്പ്’ എന്ന കമന്റ് ഉണ്ടായിരുന്നുവെന്നും സുരഭി പറയുന്നു. 

ദുല്‍ഖര്‍ സല്‍മാന്‍ നായകനായ സൂപ്പര്‍ഹിറ്റ് ചിത്രം ചാര്‍ലിയില്‍ സൗബിന്‍ അവതരിപ്പിച്ച കഥാപാത്രമായിരുന്നു കള്ളന്‍ ഡിസൂസ. ഈ കഥാപാത്രത്തിന്‍റെ സ്‍പിന്‍ ഓഫ് ചിത്രമാണ് ഇത്. സൗബിനൊപ്പം ദിലീഷ് പോത്തന്‍, സുരഭി ലക്ഷ്‍മി, ഹരീഷ് കണാരന്‍, വിജയരാഘവന്‍, ശ്രീജിത്ത് രവി, സന്തോഷ് കീഴാറ്റൂര്‍, റോണി ഡേവിഡ്, പ്രേംകുമാര്‍, രമേഷ് വര്‍മ്മ, വിനോദ് കോവൂര്‍, കൃഷ്‍ണകുമാര്‍, അപര്‍ണ നായര്‍ എന്നിവരും അഭിനയിച്ചിരിക്കുന്നു.