ശുഭം: സാമന്ത നിര്‍മ്മിച്ച ഹൊറർ കോമഡി ചിത്രം ഇനി ഒടിടിയിലേക്ക്

നടി സാമന്തയുടെ ആദ്യ നിർമ്മാണ സംരംഭമായ 'ശുഭം' ജിയോ ഹോട്ട്സ്റ്റാറിൽ സ്ട്രീം ചെയ്യാൻ തുടങ്ങും. തിയേറ്ററുകളിൽ മികച്ച പ്രകടനം കാഴ്ചവച്ച ഈ ഹൊറർ കോമഡി ചിത്രം ജൂൺ 13 മുതൽ ലഭ്യമാകും.

ഹൈദരാബാദ്: നടി സാമന്തയുടെ ആദ്യ നിർമ്മാണ സംരംഭമായ 'ശുഭം' ഇപ്പോൾ ഡിജിറ്റൽ റിലീസിന് ഒരുങ്ങുകയാണ്. തിയേറ്ററുകളിൽ മികച്ച പ്രകടനം കാഴ്ചവച്ച ഈ ഹൊറർ കോമഡി ചിത്രം 2025 ജൂൺ 13 മുതൽ ജിയോ ഹോട്ട്സ്റ്റാറിൽ സ്ട്രീം ചെയ്യാൻ തുടങ്ങും. 

ചിത്രം ഇപ്പോൾ തെലുങ്കിൽ മാത്രമായിരിക്കും ലഭ്യമാകുക.  2025 മെയ് 9 ന് തിയേറ്ററുകളിൽ റിലീസ് ചെയ്ത ശുഭത്തിൽ ഹർഷിത് റെഡ്ഡി, ഗവിറെഡ്ഡി ശ്രീനിവാസ്, ചരൺ പെറി, ശ്രിയ കൊന്തം, ശ്രാവണി ലക്ഷ്മി, ശാലിനി കൊണ്ടേപുടി എന്നിവർ പ്രധാന വേഷങ്ങളിൽ അഭിനയിക്കുന്നു. 

ചിത്രത്തിൽ സാമന്തയും ഒരു സുപ്രധാന അതിഥി വേഷത്തിൽ എത്തിയിരുന്നു. കോമഡിയില്‍ അവതരിപ്പിക്കുന്ന ഹൊറര്‍ നിമിഷങ്ങൾ ഇടകലർന്ന ഈ ചിത്രം കുടുംബങ്ങൾക്കിടയില്‍ നല്ല പ്രതികരണം സൃഷ്ടിച്ചിരുന്നു. ശക്തമായ സ്ത്രീ വിഷയം പറയുന്ന ചിത്രം കൂടിയാണ് സിനിമ.

ഒടിടി റിലീസ് അടുത്തുവരുമ്പോൾ, ഓൺലൈൻ പ്രേക്ഷകർ ശുഭാമിനെ എങ്ങനെ സ്വീകരിക്കുമെന്ന് കണ്ടറിയണം. കഴിഞ്ഞ മെയ് 9നാണ് ചിത്രം തീയറ്ററില്‍ എത്തിയത്. കുറഞ്ഞ ബജറ്റില്‍ ഒരുക്കിയ ചിത്രം സാമ്പത്തികമായി പരാജയപ്പെട്ടില്ലെന്നാണ് ട്രാക്കര്‍മാര്‍ പറയുന്നത്. 

ഒരു നാട്ടിലെ  സ്ത്രീകൾ എല്ലാ ദിവസവും രാത്രി 9 മണിക്ക് നടക്കുന്ന ഒരു ടിവി സീരിയല്‍ കാണുന്നതോടെ പ്രേത ബാധ കൂടിയത് പോലെയാകുന്നു. പുരുഷന്മാർക്ക് അവരുടെ മുകളിലുള്ള എല്ലാ നിയന്ത്രണം നഷ്ടപ്പെടുന്നു. അതോടെ നാട്ടിലെ പുരുഷന്മാര്‍‌ ഇതിന് പരിഹാരം തേടി അലയുന്നു. ഇത്തരത്തിലാണ് ശുഭം കഥ വികസിക്കുന്നത്.

നിര്‍മ്മാതാവായ സാമന്തയുടെ വ്യത്യസ്തമായ കോമ‍ഡി റോള്‍ ചിത്രത്തില്‍ കാണാന്‍ സാധിക്കും. ട്രാലാല മൂവിംഗ് പിക്‌ചേഴ്‌സുമായി രംഗത്തേക്ക് ചുവടുവയ്ക്കുന്ന സാമന്ത  മാ ഇൻതി ബംഗാരം എന്ന ചിത്രവുംനിർമ്മിക്കുന്നുണ്ട്, അതില്‍ സാമന്ത പ്രധാന വേഷത്തിലാണ് എത്തുന്നത്. 2023 ലെ ശാകുന്തളം, ഖുശി എന്നീ ചിത്രങ്ങളിലും 2024 ലെ പ്രൈം വീഡിയോ ഷോയായ സിറ്റാഡൽ: ഹണി ബണ്ണിയിലമാണ് സാമന്ത അഭിനയിച്ചത്.