സാമന്തയ്ക്ക് ഒപ്പം ഉണ്ണി മുകുന്ദൻ; ദീപാവലി ആശംസകളുമായി 'യശോദ' പോസ്റ്റര്
Synopsis
മലയാളി താരം ഉണ്ണി മുകുന്ദനാണ് ചിത്രത്തിലെ നായകന്.
ആരാധകര്ക്ക് ദീപാവലി ആശംസകളുമായി തെന്നിന്ത്യന് താര സുന്ദരി സാമന്ത. ആശംസകൾക്കൊപ്പം സമാന്തയുടെ ഏറ്റവും പുതിയ ചിത്രമായ യശോദയുടെ പോസ്റ്ററും പുറത്തുവിട്ടു. തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിലായി നവംബര് 11ന് ചിത്രം റിലീസ് ചെയ്യും. മലയാളി താരം ഉണ്ണി മുകുന്ദനാണ് ചിത്രത്തിലെ നായകന്.
ശ്രീദേവി മൂവീസ് പ്രൊഡക്ഷന്സിന്റെ ബാനറില് ശിവലെങ്ക കൃഷ്ണ പ്രസാദ് നിര്മ്മിച്ച ചിത്രം, ഹരിയും ഹരീഷും ചേര്ന്നാണ് സംവിധാനം ചെയ്യുന്നത്. ചിത്രം ഒരു ന്യൂജെന് ആക്ഷന് ത്രില്ലറാണെന്നും പ്രേക്ഷകരെ ആകര്ഷിക്കുന്ന ഘടകങ്ങളോട് കൂടിയ നിഗൂഢതയും വികാരങ്ങളും സമതുലിതമാക്കിയിരിക്കുന്നതാണെന്നും ചിത്രത്തിനെ കുറിച്ച് നിര്മ്മാതാവ് ശിവലേങ്ക കൃഷ്ണ പ്രസാദ് പറഞ്ഞു.
സാമന്തയെ കൂടാതെ വരലക്ഷ്മി ശരത്കുമാര്, ഉണ്ണി മുകുന്ദന്, റാവു രമേഷ്, മുരളി ശര്മ്മ, സമ്പത്ത് രാജ്, ശത്രു, മധുരിമ, കല്പിക ഗണേഷ്, ദിവ്യ ശ്രീപാദ, പ്രിയങ്ക ശര്മ്മ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. പുളഗം ചിന്നരായ, ഡോ. ചള്ള ഭാഗ്യലക്ഷ്മി എന്നിവരുടേതാണ് സംഭാഷണം.
മണിശര്മ്മ സംഗീതസംവിധാനവും എം. സുകുമാര് ഛായാഗ്രഹണവും നിര്വഹിക്കുന്നു. വരികള്: ചന്ദ്രബോസ്, രാമജോഗയ്യ ശാസ്ത്രി. ക്രിയേറ്റീവ് ഡയറക്ടര്: ഹേമാംബര് ജാസ്തി. കല: അശോക്. സംഘട്ടനം: വെങ്കട്ട്, യാനിക് ബെന്, എഡിറ്റര്: മാര്ത്താണ്ഡം. കെ വെങ്കിടേഷ്. ലൈന് പ്രൊഡ്യൂസര്: വിദ്യ ശിവലെങ്ക. സഹനിര്മ്മാതാവ്: ചിന്ത ഗോപാലകൃഷ്ണ റെഡ്ഡി. എക്സിക്യൂട്ടീവ് പ്രൊഡ്യൂസര്: രവികുമാര് ജിപി, രാജ സെന്തില്. പി ആര് ഒ : ആതിര ദില്ജിത്ത്.
മോഹന്ലാലും ജൂനിയര് എന്ടിആറും കേന്ദ്ര കഥാപാത്രങ്ങളായി എത്തിയ ജനത ഗാര്യേജിലൂടെയാണ് ഉണ്ണി മുകുന്ദന് തെലുങ്കില് ആദ്യമായി അഭിനയിക്കുന്നത്. പിന്നീട് അനുഷ്ക ഷെട്ടി നായികയായ ഭാഗമതിയിലും നിര്ണായക വേഷത്തിലെത്തി. നന്ദനത്തിന്റെ തമിഴില് റീമേക്കിൽ പൃഥ്വിരാജിന്റെ കഥാപാത്രത്തെ അവതരിപ്പിച്ചത് ഉണ്ണി മുകുന്ദനായിരുന്നു.