ഒരു നല്ല വര്‍ഷമായിരിക്കും എന്ന പ്രതീക്ഷയില്‍ ജന്മദിന പോസ്റ്റുമായി സാമന്ത

സാമന്ത നായികയായ ചിത്രമായി 'ശാകുന്തള'മാണ് ഒടുവില്‍ പ്രദര്‍ശനത്തിനെത്തിയത്.

തെന്നിന്ത്യൻ പ്രേക്ഷകരുടെ പ്രിയപ്പെട്ട താരങ്ങളില്‍ ഒരാളാണ് സാമന്ത. എണ്ണംപറഞ്ഞ ഒട്ടേറെ കഥാപാത്രങ്ങളിലുടെ ഇന്ത്യൻ സിനിമയില്‍ സ്വയം അടയാളപ്പെടുത്തി സാമന്ത. നിരവധി ഹിറ്റ് സിനിമകളില്‍ സാമന്ത ഇതിനകം നായികയായിട്ടുണ്ട്. തന്റെ ജന്മദിന ആഘോഷത്തിനു മുന്നോടിയായി സാമന്ത പോസ്റ്റ് ചെയ്‍ത ഇൻസ്‍റ്റാഗ്രാം സ്റ്റോറിയില്‍ പങ്കുവയ്‍ക്കുന്നത് പുതിയ വര്‍ഷത്തെ പ്രതീക്ഷകളാണ്.

നടി സാമന്ത തന്റെ ജന്മദിനം ആഘോഷിക്കുകയാണ് ഇന്ന്. ഒരു നല്ല വര്‍ഷമായിരിക്കും ഇതെന്നാണ് സാമന്ത ഇന്നലെ ഇൻസ്റ്റാഗ്രാം സ്റ്റോറിയായി പോസ്റ്റ് ചെയ്‍തത്. സാമന്തയ്‍ക്ക് ജന്മദിന ആശംസകള്‍ നേര്‍ന്ന് ഒട്ടേറെ പേരാണ് എത്തിയിരിക്കുന്നത്. സാമന്ത മികച്ച സിനിമകളുമായി ഇനിയുമെത്തും എന്ന പ്രതീക്ഷയിലാണ് ആരാധകരും.

'ശാകുന്തളം' എന്ന ചിത്രമാണ് സാമന്തയുടേതായി ഒടുവില്‍ പ്രദര്‍ശനത്തിന് എത്തിയത്. കാളിദാസന്റെ 'അഭിജഞാന ശാകുന്തളം' ആസ്‍പദമാക്കിയുള്ള സിനിമയില്‍ സാമന്ത 'ശകുന്തള'യായപ്പോള്‍ 'ദുഷ്യന്തൻ' മലയാളത്തിന്റെ യുവ താരം ദേവ് മോഹനായിരുന്നു. സാമന്ത നായികയായ ചിത്രം 'ശാകുന്തള'ത്തിന് തിയറ്ററില്‍ മികച്ച പ്രതികരണം നേടാനായിരുന്നില്ല. ഗുണശേഖര്‍ ആണ് ചിത്രത്തിന്റെ സംവിധാനം.

വിജയ് ദേവെരകൊണ്ടയുടെ നായികയായി തെലുങ്കിലും ഒരു പ്രധാന പ്രൊജക്റ്റ് സാമന്തയുടേതായിട്ടുണ്ട്. ശിവ നിര്‍വാണ സംവിധാനം ചെയ്‍ത 'ഖുഷി' എന്ന ചിത്രമാണ് സാമന്തയുടേതായി ചിത്രീകരിക്കാനുള്ളത്. 'ഖുഷി' എന്ന ചിത്രത്തിന്റെ തിരക്കഥയും ശിവ നിര്‍വാണയുടേത് തന്നെ. സാമന്തയ്‍ക്ക് ഏറെ പ്രതീക്ഷയുള്ള ചിത്രമാണ് ഇത്. ജയറാമും വിജയ് ദേവെരകൊണ്ടയ്‍ക്കൊപ്പം പ്രധാന കഥാപാത്രമായി എത്തുന്നു. സച്ചിൻ ഖെഡേക്കര്‍, മുരളി ശര്‍മ, വെണ്ണെല കിഷോര്‍, രാഹുല്‍ രാമകൃഷ്‍ണ, ശ്രീകാന്ത് അയ്യങ്കാര്‍ തുടങ്ങിയവരും ചിത്രത്തില്‍ വേഷമിടുന്നു. 'ഹൃദയം' എന്ന ചിത്രത്തിലൂടെ പ്രിയങ്കരനായി മാറിയ ഹിഷാം അബ്‍ദുല്‍ വഹാബാണ് സംഗീത സംവിധാനം. ഹിഷാം അബ്‍ദുള്‍ വഹാബ് ആദ്യമായി സംഗീത സംവിധാനം നിര്‍വഹിക്കുന്ന തെലുങ്ക് ചിത്രവുമാണ് ഇതെന്ന പ്രത്യേകതയുമുണ്ട്.