'സ്‌ക്രീം 7' ട്രെയിലർ പുറത്തിറങ്ങി: സിഡ്നി പ്രെസ്‌കോട്ട് തിരിച്ചെത്തുന്നു

ഹൊറർ പരമ്പരയായ 'സ്‌ക്രീം 7'-ൻ്റെ ട്രെയിലർ പുറത്തിറങ്ങി. നായികയായ സിഡ്നി പ്രെസ്‌കോട്ട് തിരിച്ചെത്തുന്നു എന്നതാണ് ഏറ്റവും വലിയ പ്രത്യേകത. ഇത്തവണ, സിഡ്‌നിയുടെ മകളാണ് ഗോസ്റ്റ്‌ഫേസ് കൊലയാളിയുടെ പ്രധാന ലക്ഷ്യം

നിശബ്ദതയെ കീറിമുറിച്ചുകൊണ്ട് വീണ്ടും ആ ഭീകരമായ ഫോൺ കോൾ എത്തിയിരിക്കുന്നു. എക്കാലത്തെയും വലിയ ഹൊറർ സിനിമാ പരമ്പരകളിലൊന്നായ 'സ്‌ക്രീം' ഫ്രാഞ്ചൈസിയുടെ ഏഴാം ഭാഗമായ 'സ്‌ക്രീം 7'-ൻ്റെ ട്രെയിലർ പുറത്തിറങ്ങിയതോടെ ലോകമെമ്പാടുമുള്ള ഹൊറർ ആരാധകർ ആകാംഷയുടെ മുൾമുനയിലാണ്. സിനിമയുടെ മുഖമുദ്രയായ ഗോസ്റ്റ്‌ഫേസ് കൊലയാളി വീണ്ടും ഇരകളെ തേടി എത്തുമ്പോൾ, തൻ്റെ പേടിസ്വപ്നങ്ങളെ അതിജീവിച്ച നായിക സിഡ്നി പ്രെസ്‌കോട്ട് വീണ്ടും ഈ ഭീകരതയിലേക്ക് മടങ്ങിയെത്തുകയാണ്.

സിഡ്നിയുടെ തിരിച്ചുവരവ്

മുൻ ഭാഗങ്ങളിൽ നിന്ന് മാറി നിന്നതിന് ശേഷം, നടി നീവ് കാംപ്‌ബെൽ വീണ്ടും സിഡ്നി പ്രെസ്‌കോട്ട് എന്ന കഥാപാത്രമായി എത്തുന്നു എന്നതാണ് 'സ്‌ക്രീം 7'-ൻ്റെ ഏറ്റവും വലിയ പ്രത്യേകത. സിഡ്നിയുടെ മാതൃജീവിതത്തിലൂടെയാണ് ഇത്തവണ കഥ മുന്നോട്ട് പോകുന്നത്.

പുതിയ ഭീഷണി

ശാന്തമായ ഒരു പട്ടണത്തിൽ മകൾ ടേറ്റത്തിനൊപ്പം ഒരു പുതിയ ജീവിതം കെട്ടിപ്പടുത്ത സിഡ്നിയെ തേടി ഗോസ്റ്റ്‌ഫേസ് കൊലയാളി വീണ്ടും എത്തുകയാണ്. "നീയുണ്ടാക്കിയ ഈ കൊച്ചുകുടുബവും നിൻ്റെ സുന്ദരിയായ മകളും... നമ്മൾ വളർന്ന സ്ഥലത്തെ ഓർമ്മിപ്പിക്കുന്നു. " എന്ന് കൊലയാളി സിഡ്നിയെ ഫോണിൽ വിളിച്ച് ഭീഷണിപ്പെടുത്തുന്ന രംഗങ്ങൾ ട്രെയിലറിൽ ഉണ്ട്. ഇത്തവണ ഗോസ്റ്റ്‌ഫേസ് കൊലയാളി സിഡ്നിയുടെ മകളെയും ലക്ഷ്യമിടുന്നതായി ട്രെയിലർ സൂചന നൽകുന്നു. 1996-ൽ നടന്ന ആദ്യ 'സ്‌ക്രീം' സിനിമയിൽ ക്രൂരമായി കൊല്ലപ്പെട്ട സിഡ്നിയുടെ സുഹൃത്തായ ടേറ്റത്തിൻ്റെ ഓർമ്മയ്ക്കായാണ് മകൾക്ക് ആ പേര് നൽകിയതെന്നും റിപ്പോർട്ടുകളുണ്ട്.

പഴയ താരങ്ങളും തിരിച്ചെത്തുന്നു

മുൻ 'സ്‌ക്രീം' സിനിമകളിലെ പ്രധാന കഥാപാത്രമായ സാം കാർപെന്ററായി എത്തിയ മെലിസ ബരേര ഈ ഭാഗത്തിൽ ഇല്ലെങ്കിലും, മറ്റ് ചില പരിചിത മുഖങ്ങൾ ട്രെയിലറിൽ കാണാം: റിപ്പോർട്ടർ ഗെയ്ൽ വെതർസ് ആയി കോർട്ട്നി കോക്സ് , കൊല്ലപ്പെട്ടുപോയ കഥാപാത്രങ്ങളായി ഡേവിഡ് ആർക്വെറ്റ് , മാത്യു ലില്ലാർഡ് , സ്‌കോട്ട് ഫോളി എന്നിവരും ട്രെയിലറിൽ പ്രത്യക്ഷപ്പെടുന്നുണ്ട്.

ആദ്യ 'സ്‌ക്രീം' സിനിമയുടെ തിരക്കഥാകൃത്തായ കെവിൻ വില്യംസൺ ആണ് 'സ്‌ക്രീം 7' സംവിധാനം ചെയ്യുന്നത്. 'സ്‌ക്രീം 7' 2026 ഫെബ്രുവരി 27-ന് തിയേറ്ററുകളിൽ എത്തും.