'സിനിമയുടെ ദൈവമാണ് ഷാരൂഖ് ഖാൻ', ബോളിവുഡ് നടി കങ്കണ റണൗട്ടിന്റെ വാക്കുകള്‍

നടൻ ഷാരൂഖ് ഖാൻ ഇന്ത്യൻ സിനിമയുടെ ദൈവമാണ് എന്ന് കങ്കണ റണൗട്ട്.  

നടൻ ഷാരൂഖ് ഖാൻ ഇന്ത്യൻ സിനിമയുടെ ദൈവമാണ് എന്ന് നടി കങ്കണ റണൗട്ട്. ഷാരൂഖ് ഖാൻ നായകനായി എത്തിയ ചിത്രം വൻ വിജയത്തിലേക്ക് കുതിക്കുമ്പോഴാണ് കങ്കണ റണൗട്ട് ഷാരൂഖ് ഖാനെ അഭിനന്ദിച്ച് രംഗത്ത് എത്തിയിരിക്കുന്നത്. ഷാരൂഖ് ഖാന്റെ ജീവിതം രാജ്യത്തെ സിനിമ പ്രവര്‍ത്തകര്‍ക്ക് പാഠമാണെന്നും കങ്കണ റണൗട്ട് അഭിപ്രായപ്പെടുന്നു. യഥാര്‍ഥ ജീവിതത്തിലും ഷാരൂഖ് ഹീറോയാണെന്ന് താരം അഭിപ്രായപ്പെട്ടു.

തൊണ്ണൂറുകളിലെ പ്രണയ നായകനെന്ന നിലയില്‍ സിനിമയില്‍ ശ്രദ്ധയാകര്‍ഷിച്ച അദ്ദേഹം ഒരു ദശാബ്‍ദത്തോളം നീണ്ട പരിശ്രമത്തില്‍ തന്റെ നാല്‍പതുകളുടെ അവസാനത്തിലും അമ്പതുകളുടെ മധ്യത്തിലും പ്രേക്ഷകരുടെ പ്രിയങ്കരനായി. അറുപതാം വയസില്‍ അദ്ദേഹം ഇന്ത്യൻ സിനിമയിലെ മാസ് ഹീറോയായി മാറി. ഒരിക്കലും അത് ചെറിയ കാര്യമല്ല. യഥാര്‍ഥ ജീവിതത്തിലും അദ്ദേഹം സൂപ്പര്‍ഹീറോയാണ്. ഒരുകാലത്ത് ആളുകള്‍ അദ്ദേഹത്തെ എഴുതിത്തള്ളുകയും പരിഹസിക്കുകയും ചെയ്‍തത് ഞാൻ ഓര്‍ക്കുന്നു. എന്നാല്‍ അദ്ദേഹത്തിന്റെ പോരാട്ടം ഇന്ത്യൻ സിനിമാ പ്രവര്‍ത്തകര്‍ക്ക് ഒരു പാഠമാണ്. സിനിമാ ദൈവമാണ് ഷാരൂഖ് ഖാനെന്നും താരം അഭിപ്രായപ്പെട്ടു.

ഹിറ്റ്‍മേക്കര്‍ അറ്റ്‍ലി ഷാരൂഖിനെ നായകനാക്കി സംവിധാനം ചെയ്‍ത ജവാനില്‍ നയൻതാരയാണ് നായികയായി എത്തിയത്. ഷാരൂഖ് ഖാൻ നിറഞ്ഞുനില്‍ക്കുന്ന ഒരു ചിത്രമാണ് ജവാൻ എന്നാണ് പ്രേക്ഷകരുടെ അഭിപ്രായങ്ങള്‍. പൊലീസ് ഓഫീസറായി എത്തിയ നയൻതാര ചിത്രത്തില്‍ മികച്ച പ്രകടനമാണ് നടത്തിയത്. ഒരു അമ്മയുമാണ് ജവാനില്‍ നയൻതാരയുടെ കഥാപാത്രം എന്നാണ് റിപ്പോര്‍ട്ട്.

അറ്റ്‍ലിയും ഷാരൂഖ് ഖാനും ഒന്നിക്കുന്നത് ആദ്യമായിട്ടാണ് എന്ന പ്രത്യേകതയുണ്ട്. നയൻതാര ഷാരൂഖിന്റെ നായികയാകുന്നതും ആദ്യമായിട്ടാണ്. ജവാനായി അനിരുദ്ധ് രവിചന്ദറിന്റെ സംഗീത സംവിധാനത്തിലുള്ള ഗാനങ്ങളും ശ്രദ്ധയാകര്‍ഷിച്ചിരുന്നു. ഷാരൂഖ് ഖാന്റെ ജവാൻ ഏതൊക്കെ കളക്ഷൻ റിക്കോര്‍ഡുകള്‍ തിരുത്തും എന്നാണ് ഇനി വ്യക്തമാകേണ്ടത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക