റിലീസിനു മുന്നേ ടിക്കറ്റിനത്തില് 1.57 കോടി നേടി, യുഎസില് 'ജവാൻ' ആവേശം
Synopsis
ഷാരൂഖ് നായകനാകുന്ന 'ജവാൻ' എന്ന ചിത്രം ആരാധകര് ആകാംക്ഷയോടെയാണ് കാത്തിരിക്കുന്നത്.
ഷാരൂഖ് ഖാൻ ആരാധകര് കാത്തിരിക്കുന്ന ചിത്രമാണ് 'ജവാൻ'. അറ്റ്ലിയാണ് 'ജവാൻ' സംവിധാനം ചെയ്യുന്നത്. അറ്റ്ലിയുടേതാണ് 'ജവാനെ'ന്ന ചിത്രത്തിന്റെ കഥയും. 'ജവാന്റെ' അഡ്വാൻസ് ബുക്കിംഗ് സംബന്ധിച്ച വാര്ത്തയാണ് ഇപ്പോള് ആരാധകരെ ഇപ്പോള് ആവേശത്തിലാക്കുന്നത്.
ചിത്രത്തിന് യുഎസില് ഇതുവരെ 1.57 കോടി രൂപയാണ് അഡ്വാൻസ് ബുക്കിംഗിലൂടെ ലഭിച്ചിരിക്കുന്നത്. 431 പ്രദേശങ്ങളിലായി 1822 ഷോകളിലായി 12340 ടിക്കറ്റുകളാണ് ബുക്കിംഗ് ആയിരിക്കുന്നത്. ജി കെ വിഷ്ണുവാണ് ഷാരൂഖ് ചിത്രത്തിന്റെ ഛായാഗ്രാഹണം. അനിരുദ്ധ് രവിന്ദറിന്റെ സംഗീത സംവിധാനത്തില് ചിത്രത്തിനായി അരിജിത്ത് സിംഗും ശില്പ റാവും ആലപിച്ച ഗാനം അടുത്തിടെ വൻ ഹിറ്റായിരുന്നു.
ഷാരൂഖ് ഖാൻ 'ജവാൻ' എന്ന ചിത്രത്തില് ഇരട്ട വേഷത്തിലാണ് എത്തുന്നത് എന്നാണ് റിപ്പോര്ട്ട്. 'റോ'യിലെ (റിസര്ച്ച് ആന്ഡ് അനാലിസിസ് വിംഗ്) ഒരു മുതിര്ന്ന ഉദ്യോഗസ്ഥനായ അച്ഛനും ഒരു ഗ്യാങ്സ്റ്ററായ മകനുമാണ് ഈ കഥാപാത്രങ്ങളെന്നാണ് റിപ്പോര്ട്ട്. ഒരു അന്വേഷണോദ്യോഗസ്ഥയായി നയന്താര വേഷമിടുന്ന ചിത്രം പ്രദര്ശനത്തിനെത്തുക സെപ്തംബര് ഏഴിന് ആയിരിക്കും. റെഡ് ചില്ലീസ് എന്റര്ടെയ്ന്മെന്റിന്റെ ബാനറില് ഗൗരി ഖാന് ആണ് നിര്മാണം. വിജയ് സേതുപതിയും ഒരു പ്രധാനപ്പെട്ട കഥാപാത്രമായി 'ജവാനി'ലുണ്ട്. നയൻതാര നായികയായിട്ടാണ് ചിത്രത്തില് എത്തുന്നത്. ചിത്രത്തില് സാന്യ മല്ഹോത്ര, പ്രിയാ മണി, സഞ്ജീത ഭട്ടാചാര്യ, സുനില് ഗ്രോവര്, റിദ്ധി ദോഗ്ര, അമൃത അയ്യര് തുടങ്ങിവരും പ്രധാന വേഷങ്ങളിലെത്തുന്ന 'ജവാൻ' ഷാരൂഖ് ഖാന് ഏറെ പ്രതീക്ഷയുള്ള ചിത്രമാണ്.
'പഠാൻ' ആണ് ഷാരൂഖ് ഖാന്റേതായി ഒടുവില് പ്രദര്ശനത്തിന് എത്തിയത്. ദീപിക പദുക്കോൺ ആയിരുന്നു നായിക. ദീപിക പദുക്കോണിന്റെ ബിക്കിനി വിവാദത്തിനിടെ ചിത്രം ബോക്സ് ഓഫീസിൽ ആയിരം കോടിയും പിന്നിട്ട് കുതിച്ചിരുന്നു. ഷാരൂഖ് ഖാന്റേതായി 'ജവാൻ' എന്ന ചിത്രവും വമ്പൻ ഹിറ്റാകും എന്ന പ്രതീക്ഷയിലാണ് എല്ലാവരും.
Read More: മാസാകാൻ ശിവണ്ണ, പാൻ ഇന്ത്യൻ ചിത്രം 'ഗോസ്റ്റ്' റിലീസിന് തയ്യാറായി
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക