രജനികാന്തിന്റെ 'ജയിലറി'ല് കന്നഡ താരവും, ശിവ രാജ്കുമാര് അഞ്ച് ദിവസംകൊണ്ട് ചിത്രീകരണം പൂര്ത്തിയാക്കും
Synopsis
ശിവ രാജ്കുമാര് ചിത്രത്തില് ഒരു പ്രധാന വേഷത്തില് അഭിനയിക്കുമെന്നാണ് റിപ്പോര്ട്ട്.
രജനികാന്ത് നായകനാകുന്ന ചിത്രം 'ജയിലര്' ആരാധകര് ആകാംക്ഷയോടെ കാത്തിരിക്കുന്നതാണ്. നെല്സണ് ആണ് ചിത്രം സംവിധാനം ചെയ്യുന്നത്. നെല്സണ് തന്നെയാണ് ചിത്രത്തിന്റെ തിരക്കഥ എഴുതുന്നത്. രജനികാന്ത് നായകനാകുന്ന ചിത്രത്തിന്റെ പുതിയൊരു അപ്ഡേറ്റ് വന്നിരിക്കുകയാണ്.
കന്നഡയുടെ പ്രിയ താരം ശിവ രാജ്കുമാര് 'ജയിലറി'ല് ഒരു പ്രധാന കഥാപാത്രത്തെ അവതരിപ്പിക്കുന്നുവെന്നുവെന്ന് നേരത്തെ വാര്ത്തകള് വന്നിരുന്നു. നാലോ അഞ്ചോ ദിവസങ്ങളിലായി ശിവരാജ്കുമാര് തന്റെ ഭാഗത്തിന്റെ ചിത്രീകരണം പൂര്ത്തീകരിക്കുമെന്നാണ് ഏറ്റവും ഒടുവിലത്തെ റിപ്പോര്ട്ട്. രമ്യാ കൃഷ്ണനും ചിത്രത്തില് കരുത്തുറ്റ കഥാപാത്രമായി എത്തും. അടുത്ത വര്ഷമാകും ചിത്രം റിലീസ് ചെയ്യുക.
പേര് സൂചിപ്പിക്കുന്നതുപോലെ ചിത്രത്തില് ഒരു ജയിലറുടെ വേഷത്തിലാണ് രജനി എത്തുക. അനിരുദ്ധ് രവിചന്ദര് സംഗീതം പകരുന്ന ചിത്രത്തിന് ഛായാഗ്രഹണം നിര്വ്വഹിക്കുന്നത് വിജയ് കാര്ത്തിക് കണ്ണന് ആണ്. സ്റ്റണ്ട് ശിവയാണ് ചിത്രത്തിന്റെ ആക്ഷൻ കൊറിയോഗ്രാഫര്. റാമോജി റാവു ഫിലിം സിറ്റിയിലും ഒരു കൂറ്റന് സെറ്റ് ചിത്രത്തിനുവേണ്ടി ഒരുക്കിയിരുന്നു. 'അണ്ണാത്തെ'യ്ക്കു ശേഷം എത്തുന്ന രജനികാന്ത് ചിത്രമാണിത്. രജനി ചിത്രം ആയതുകൊണ്ടു തന്നെ കോളിവുഡ് കാത്തിരിക്കുന്ന പ്രധാന പ്രോജക്റ്റുകളുടെ നിരയില് 'ജയിലര്' ഇതിനകം തന്നെ ഇടംപിടിച്ചിട്ടുണ്ട്. സണ് പിക്ചേഴ്സിന്റെ ബാനറില് കലാനിധി മാരനാണ് ചിത്രം നിര്മിക്കുന്നത്.
തിരക്കഥയില് തന്റേതായ സ്വാതന്ത്ര്യമെടുക്കാന് നെല്സണിന് രജനികാന്ത് അനുവാദം നല്കിയിരുന്നുവെന്ന് നേരത്തെ റിപ്പോര്ട്ടുകള് എത്തിയിരുന്നു. അരങ്ങേറ്റമായ 'കോലമാവ് കോകില'യിലൂടെത്തന്നെ ശ്രദ്ധിക്കപ്പെട്ട സംവിധായകനാണ് നെല്സണ്. കരിയര് ബ്രേക്ക് നല്കിയത് ശിവകാര്ത്തികേയന് നായകനായ 'ഡോക്ടര്' ആയിരുന്നു. ഏറ്റവും ഒടുവില് നെല്സണിന്റെ സംവിധാനത്തില് പുറത്തിറങ്ങിയത് വിജയ് ചിത്രമായ 'ബീസ്റ്റ്' ആയിരുന്നു. 'ബീസ്റ്റ്' എന്ന ചിത്രം തിയറ്ററില് പരാജയമായിരുന്നു. 'ജയിലറി'ലൂടെ വൻ തിരിച്ചുവരവ് നടത്താമെന്ന പ്രതീക്ഷയിലാണ് നെല്സണ്. 'ജയിലറു'ടെ പ്രഖ്യാപനം ഓണ്ലൈനില് ചര്ച്ചയായിരുന്നു.
Read More: സിനിമയ്ക്കൊപ്പം ജയന്റെ മരണ വാര്ത്ത ചേര്ത്തു, വിശ്വസിക്കാതെ ആരാധകര്