സിജു വിത്സൻ നായകനാകുന്ന പുതിയ സിനിമ വയനാട്ടില്‍ തുടങ്ങി

'പത്തൊമ്പതാം നൂറ്റാണ്ടി'ന് ശേഷം സിജു വിത്സൻ നായകനാകുന്ന ചിത്രം തുടങ്ങി.

'പത്തൊമ്പതാം നൂറ്റാണ്ടി'ന് ശേഷം സിജു വിത്സൻ നായകനാകുന്ന സിനിമയുടെ ചിത്രീകരണം വയനാട്ടിൽ ആരംഭിച്ചു.  പി ജി പ്രേംലാല്‍ ആണ് ചിത്രം സംവിധാനം ചെയ്യുന്നത്.  'തൊണ്ടിമുതലും ദൃക്സാക്ഷിയും ' എന്ന ചിത്രത്തിലൂടെ ശ്രദ്ധേയനായ സജീവ് പാഴൂർ തിരക്കഥയും സംഭാഷണവുമെഴുതുന്നു. ടൈറ്റിൽ ലോഞ്ച് ഉടനെയുണ്ടാകുമെന്ന്  സിജു ചിത്രത്തിന്റെ പ്രവര്‍ത്തകര്‍ അറിയിച്ചു.

'ന്നാ താൻ കേസ് കൊട് ' എന്ന ചിത്രത്തിലെ മജിസ്ട്രേറ്റിന്റെ വേഷത്തിലൂടെ പ്രേക്ഷക പ്രീതി നേടിയ പി പി കുഞ്ഞികൃഷ്‍ണൻ ഒരു പ്രധാനവേഷം കൈകാര്യം ചെയ്യുന്നുണ്ട്. പുതുമുഖം കൃഷ്ണേന്ദു എ മേനോനാണ് നായിക. ഛായാഗ്രഹണം ആൽബി ആണ് നിർവ്വഹിക്കുന്നത്. നിഷ സാരംഗ്, ഹരീഷ് പേങ്ങൻ, സിബി തോമസ്, ജോളി ചിറയത്ത്, ലാലി മരക്കാർ തുടങ്ങിയവരും ചിത്രത്തിന്റെ ഭാഗമാണ്.  കിച്ചാപ്പൂസ് എന്റർടെയ്ൻമെന്റ്സിന്റെ ബാനറിൽ കെ ജി അനിൽകുമാർ ചിത്രം നിർമ്മിക്കുന്നു. സംഗീതം ഷാൻ റഹ്‍മാൻ ആണ്. ചിത്രത്തിന്റെ ഗാനരചന റഫീഖ് അഹമ്മദ്.

ആറാട്ടുപുഴ വേലായുധ പണിക്കർ എന്ന ചരിത്ര നായകൻ ആയിട്ടായിരുന്നു സിജു വില്‍സണ്‍ 'പത്തൊമ്പതാം നൂറ്റാണ്ട്' എന്ന ചിത്രത്തില്‍ അഭിനയിച്ചത്. സിജുവിന്റെ കരിയര്‍ഗ്രാഫ് ഒറ്റയടിക്ക് കുതിച്ചുയര്‍ത്തുന്ന പ്രകടനമായിരുന്നു 'പത്തൊമ്പതാം നൂറ്റാണ്ടി'ലേത്. വിനയൻ ആയിരുന്നു ചിത്രത്തിന്റെ സംവിധായകൻ.  ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലാനായിരുന്നു നിര്‍മാണം.

വിനയൻ തന്നെയായിരുന്നു ചിത്രത്തിന്റെ തിരക്കഥയും.  കയാദു ലോഹര്‍ ആയിരുന്നു നായിക. അനൂപ് മേനോൻ, ചെമ്പൻ വിനോദ്, സുദേവ് നായര്‍, ഗോകുലം ഗോപാലൻ, വിഷ്‍ണു വിനയൻ, സുന്ദര പാണ്ഡ്യൻ തുടങ്ങി ഒട്ടേറെ താരങ്ങള്‍ വേഷമിട്ടു. 'പത്തൊമ്പതാം നൂറ്റാണ്ടിന്റെ' പശ്ചാത്തല സംഗീത സംവിധാനം തമിഴിലെ പ്രമുഖ സംഗീതജ്ഞൻ സന്തോഷ് നാരായണനായിരുന്നു.