മൂന്നാം ദിവസം വൻ ഇടിവ്, മണ്‍ഡേ ടെസ്റ്റില്‍ കിതച്ച് പരാശക്തി, തമിഴ് സിനിമയ്‍ക്ക് ഇതെന്ത് പറ്റി?

തമിഴ് സിനിമയ്‍ക്ക് ഇതെന്ത് പറ്റി?.

തമിഴ്‍നാട്ടില്‍ വിജയ്‍യുടെ പകരക്കാരനായി കണക്കാക്കുന്ന താരമാണ് ശിവകാര്‍ത്തികേയൻ. ശിവകാര്‍ത്തികേയന്റെ പരാശക്തിയും വിജയ്‍യുടെ ജനനായകനും നേര്‍ക്കുനേര്‍ ബോക്സ് ഓഫീസ് പോരാട്ടത്തിന് കളമൊരുങ്ങിയതായിരുന്നു. എന്നാല്‍ സെൻസര്‍ സര്‍ട്ടിഫിക്കറ്റ് ലഭിക്കാത്തതിനാല്‍ ജനനായകന്റെ റിലീസ് മാറ്റിവയ്‍ക്കേണ്ടിവന്നു. വിജയ്‍ നായകനായ ജനനായകൻ പിൻമാറിയത് കളക്ഷനില്‍ പരാശക്തിക്ക് നേട്ടമുണ്ടാക്കുമെന്ന് കരുതിയെങ്കിലും വൻ കുതിപ്പ് നടത്താൻ സാധിച്ചില്ല എന്നാണ് കളക്ഷൻ കണക്കുകള്‍ സൂചിപ്പിക്കുന്നത്.

തമിഴ്‍നാട്ടില്‍ മാത്രം ആദ്യ ദിനം 12.5 കോടി രൂപയാണ് പരാശക്തിക്ക് നേടാനായത്. രണ്ടാം ദിനമായ ഞായറാഴ്‍ച 10.15 കോടി രൂപയും നേടിയപ്പോള്‍ ആദ്യ തിങ്കളാഴ്‍ചയായ ഇന്നലെ മൂന്ന് കോടി മാത്രമാണ് നേടാനായത്. ഇന്ത്യ ഗ്രോസ് 30.43 കോടി രൂപയാണ്. ആഗോളതലത്തില്‍ പരാശക്തി നേടിയിരിക്കുന്ന്ത് 48.03 കോടി രൂപയാണ്. വിദേശത്ത് നിന്ന് മാത്രം 17.6 കോടി നേടിയെന്നും പ്രമുഖ ട്രേഡിംഗ് അനലിസ്റ്റുകളായ സാക്നില്‍ക്ക് റിപ്പോര്‍ട്ട് ചെയ്യുമ്പോള്‍ തമിഴ് സിനിമയ്‍ക്ക് സമീപകാലത്ത് എന്താണ് സംഭവിക്കുന്നത് എന്ന ചോദ്യമുയര്‍ത്തുകയാണ് ആരാധകര്‍. സാധാരണ വൻ കളക്ഷനുമായി തമിഴ് സിനിമ മുന്നേറുന്ന കാഴ്‍ചയാണ് റിപ്പോര്‍ട്ട് ചെയ്യപ്പെടാറുള്ളത്. എന്നാല്‍ സമീപ കാലത്ത് വൻ ഹൈപ്പിലെത്തിയ പല ചിത്രങ്ങളും ബോക്സ് ഓഫീസില്‍ തകര്‍ന്നടിയുന്ന കാഴ്‍ചയാണ് കാണുന്നത്.

ശിവകാർത്തികേയനും രവി മോഹനും പ്രധാന വേഷത്തിലെത്തുന്ന ‘പരാശക്തി’ യുടെ കേരളാ വിതരണാവകാശം ശ്രീ ഗോകുലം ഗോപാലന്റെ ശ്രീ ഗോകുലം മൂവീസിനാണ്. സുധ കൊങ്കര സംവിധാനം ചെയ്യുന്ന പരാശക്തി പീരിയഡ് ഡ്രാമയാണ് ഒരുക്കിയിരിക്കുന്നത്. അഥർവയും ശിവകാർത്തികേയനും സഹോദരന്മാരായാണ് ചിത്രത്തില്‍ എത്തുന്നത്. തെലുങ്ക് താരം ശ്രീലീലയും പ്രധാന വേഷത്തില്‍ ചിത്രത്തില്‍ എത്തുന്നു. ശ്രീ ഗോകുലം മൂവീസിന്റെ ഒഫീഷ്യൽ ഡിസ്ട്രിബൂഷൻ പാർട്ട്നറായ ഡ്രീം ബിഗ് ഫിലിംസാണ് ചിത്രം കേരളത്തിലെ തിയേറ്ററുകളിലേക്കെത്തിക്കുന്നത്.

ചിത്രത്തിന്റെ മറ്റു അണിയറപ്രവർത്തകർ ഇവരാണ്. സംഗീതസംവിധാനം : ജി.വി. പ്രകാശ്, ഛായാഗ്രഹണം: രവി കെ. ചന്ദ്രൻ, തിരക്കഥ: സുധാ കോങ്കര, അർജുൻ നദേശൻ, ആക്ഷൻ: സുപ്രീം സുന്ദർ എഡിറ്റിംഗ്: സതീഷ് സുരിയ, കലാ സംവിധാനം: എസ്. അണ്ണാദുരൈ, നൃത്തസംവിധാനം: ബ്രിന്ദ, കൃതി മഹേഷ്, അനുഷ വിശ്വനാഥൻസൗണ്ട് ഡിസൈൻ: സുരേൻ ജി. എസ്, അളഗിയകൂത്തൻ, പിആർഒ പ്രതീഷ് ശേഖർ ആണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക