'സ്പൈഡർ മാന്‍റെ' റോമിയോ ആൻഡ് ജൂലിയറ്റ് ഷോ ആദ്യദിവസം മുടങ്ങി

ഈ പ്രൊഡക്ഷന്‍റെ സെറ്റ് തയ്യാറാക്കാന്‍ ഷോ മേക്കർമാർക്ക് കൂടുതൽ സമയം ആവശ്യമാണെന്നാണ് റിപ്പോർട്ട്. 

ലണ്ടന്‍: ബ്രിട്ടീഷ് സംവിധായകൻ ജാമി ലോയിഡ് സംവിധാനം ചെയ്യുന്ന റോമിയോ ആൻഡ് ജൂലിയറ്റ് തീയറ്റര്‍ പ്രൊഡക്ഷന്‍ റദ്ദാക്കി. ഡെഡ്‌ലൈൻ റിപ്പോര്‍ട്ട് അനുസരിച്ച് ലണ്ടനിലെ ഡ്യൂക്ക് ഓഫ് യോർക്ക് തിയേറ്ററില്‍  ശനിയാഴ്ച രാത്രി നടത്താനിരുന്ന പ്രീമിയർ ചില സാങ്കേതിക കാരണങ്ങളാല്‍ റദ്ദാക്കുകയായിരുന്നു.

ഈ പ്രൊഡക്ഷന്‍റെ സെറ്റ് തയ്യാറാക്കാന്‍ ഷോ മേക്കർമാർക്ക് കൂടുതൽ സമയം ആവശ്യമാണെന്നാണ് റിപ്പോർട്ട്. വ്യാഴാഴ്ചയാണ് ഷോ റദ്ദാക്കിയ വിവരം ഷോയ്ക്ക് ടിക്കറ്റ് എടുത്തവരെ അറിയിച്ചത്. മെയ് 23-നാണ് ഷോയുടെ അടുത്ത തീയതി നിശ്ചയിച്ചിരിക്കുന്നത്. ഈ ഷോയില്‍ റോമിയോയായി സ്പൈഡർ മാൻ താരം ടോം ഹോളണ്ട് അഭിനയിക്കും എന്നതാണ് ഈ ഷോയ്ക്ക് വലിയ പ്രധാന്യം നല്‍കിയത്. ഇതില്‍ ജൂലിയറ്റായി കോമഡി സിറ്റ്കോമിന് പേരുകേട്ട ഫ്രാൻസെസ്ക അമേവുദ-റിവേഴ്സും അഭിനയിക്കും.

ഫെബ്രുവരിയിൽ ജാമി ലോയ്ഡ് കമ്പനി ഷേക്സ്പിയറിന്‍റെ പ്രശസ്ത നാടകം അവതരിപ്പിക്കുന്ന കാര്യം പ്രഖ്യാപിച്ചത്. ഈ ഷോയുടെ എല്ലാ ടിക്കറ്റുകളും റിലീസ് ചെയ്ത് രണ്ട് മണിക്കൂറിനുള്ളിൽ വിറ്റുതീർന്നതായി റിപ്പോർട്ട് വന്നിരുന്നു. ഡെഡ്‌ലൈൻ അനുസരിച്ച്, ഏകദേശം 60,000 ആളുകൾ ഷോയ്‌ക്കായി വെർച്വൽ ടിക്കറ്റ് വാങ്ങിയിരുന്നു. ഷേക്സ്പിയറിന്‍റെ പ്രണയ നാടകം മെയ് 11 മുതൽഓഗസ്റ്റ് 3 വരെയാണ് നിശ്ചയിച്ചിരുന്നത്. ഇതിലെ ആദ്യത്തെ ഷോയാണ് ഇപ്പോള്‍ റദ്ദാക്കിയത്. 

അതേ സമയം  ഒരു ബ്ലാക് നടിയായ ഫ്രാൻസെസ്ക അമേവുദ-റിവേഴ്‌സിനെ ജൂലിയറ്റായി കാസ്റ്റ് ചെയ്തത് പ്രഖ്യാപിച്ചതിന് ശേഷം വംശീയമായി അവര്‍ അധിക്ഷേപം നേരിട്ടത് വാര്‍ത്തയായിരുന്നു. ഇതിനെ തുടര്‍ന്ന് നാടകത്തിന്‍റെ നിര്‍മ്മാതാക്കള്‍ നിന്ദ്യമായ വംശീയ അധിക്ഷേപത്തെ അപലപിച്ചുകൊണ്ട് ഒരു പ്രസ്താവന പുറത്തിറക്കിയിരുന്നു. നടിയുടെ പേര് പറയാതെയാണ് ഇവര്‍ പ്രതികരിച്ചത്.