Paappan : വീണ്ടും 'പാപ്പന്റെ' കുപ്പായത്തിലേക്ക് സുരേഷ് ഗോപി; ജോഷി ചിത്രത്തിന്റെ രണ്ടാം ഷെഡ്യൂള് തുടങ്ങുന്നു
Synopsis
പൊറിഞ്ചു മറിയം ജോസിനു ശേഷമുള്ള ജോഷി ചിത്രം
സുരേഷ് ഗോപിയെ (Suresh Gopi) നായകനാക്കി ജോഷി (Joshiy) സംവിധാനം ചെയ്യുന്ന 'പാപ്പന്റെ' (Paappan) രണ്ടാം ഷെഡ്യൂള് ഡിസംബര് 13ന് ആരംഭിക്കും. കോട്ടയം ഈരാറ്റുപേട്ടയിലാണ് പുതിയ ഷെഡ്യൂള് തുടങ്ങുന്നത്. 'സലാം കാശ്മീരി'നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രത്തില് 'മാത്യൂസ് പാപ്പന് ഐപിഎസ്' എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്. ഗോകുല് സുരേഷും ചിത്രത്തില് ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇരുവരും ആദ്യമായി ഒരുമിച്ചെത്തുന്ന ചിത്രമാണിത്.
ഡേവിഡ് കാച്ചപ്പിള്ളി പ്രൊഡക്ഷന്സ് നിര്മ്മിക്കുന്ന ചിത്രത്തില് ഇഫാര് മീഡിയ കൂടി നിര്മ്മാണ പങ്കാളികളാവുന്നു എന്നതാണ് ചിത്രത്തെ സംബന്ധിച്ചുള്ള മറ്റൊരു അപ്ഡേറ്റ്. സുരേഷ് ഗോപിയുടെ കരിയറിലെ 252-ാം ചിത്രവുമാണിത്. ക്രൈം ത്രില്ലര് വിഭാഗത്തില് പെടുന്ന ചിത്രത്തില് നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്, ടിനി ടോം, ഷമ്മി തിലകന് തുടങ്ങിയവരും അഭിനയിക്കുന്നു.
റേഡിയോ ജോക്കിയും തിരക്കഥാകൃത്തുമായ ആര് ജെ ഷാനിന്റേതാണ് ചിത്രത്തിന്റെ രചന. ഛായാഗ്രഹണം അജയ് ഡേവിഡ് കാച്ചപ്പിള്ളി. എഡിറ്റിംഗ് ശ്യാം ശശിധരന്. സംഗീതം ജേക്സ് ബിജോയ്. സൗണ്ട് ഡിസൈൻ വിഷ്ണു ഗോവിന്ദ്, ശ്രീശങ്കർ, കലാസംവിധാനം നിമേഷ് എം താനൂർ, മേക്കപ്പ് റോണെക്സ് സേവ്യർ, വസ്ത്രാലങ്കാരം പ്രവീൺ വർമ, പ്രൊഡക്ഷൻ കൺട്രോളർ എസ് മുരുകൻ, ചീഫ് അസോസിയേറ്റ് ഡയറക്ടർ സിബി ജോസ് ചാലിശ്ശേരി, സ്റ്റിൽസ് നന്ദു ഗോപാലകൃഷ്ണൻ, ഡിസൈൻസ് ഓൾഡ് മങ്ക്സ്, പിആർഒ വാഴൂർ ജോസ്, മഞ്ജു ഗോപിനാഥ്, ഡ്രീം ബിഗ് ഫിലിംസ് പ്രദര്ശനത്തിനെത്തിക്കും.