സംവിധായകൻ ടോം ഇമ്മട്ടി ഇനി നായകൻ; 'ഈശോയും കള്ളനും'; ഫസ്റ്റ് ലുക്ക് എത്തി

. ടോം ഇമ്മട്ടി ആദ്യമായി അഭിനയിക്കുന്ന ചിത്രം കൂടിയാണ് 'ഈശോയും കള്ളനും'.

സംവിധായകൻ ടോം ഇമ്മട്ടി കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തു. 'ഈശോയും കള്ളനും' എന്നാണ് ചിത്രത്തിന്റെ പേര്. ടോം ഇമ്മട്ടി ആദ്യമായി അഭിനയിക്കുന്ന ചിത്രം കൂടിയാണിത്. നവാഗതനായ കിഷോർ ക്രിസ്റ്റഫർ ആണ് സംവിധായകൻ. 

സംവിധായകൻ തന്നെ കഥയെഴുതി ഛായാഗ്രഹണം നിർവഹിക്കുന്ന ചിത്രത്തിൻ്റെ നിർമ്മാണം മിറർ റോക് പ്രൊഡക്ഷൻസിൻ്റെ ബാനറിൽ സുരേഷ് ഗോപുവാണ്. മാറ്റിനി.ലൈവ് ആണ് സഹ നിർമ്മാണം. ടോം ഇമ്മട്ടിയെ കൂടാതെ ഒരുപിടി പുതുമുഖങ്ങളും ചിത്രത്തിൽ അഭിനയിക്കുന്നുണ്ട്. ചിത്രീകരണം പുരോഗമിക്കുന്ന ചിത്രത്തിൻ്റെ സംഗീതം ഒരുക്കുന്നത് നിനോയ് വർഗീസ് ആണ്. വാർത്ത പ്രചാരണം: പി.ശിവപ്രസാദ്.

ഒരു മെക്സിക്കൻ അപാരത, ദി ഗാംബ്ലർ എന്നീ ചിത്രങ്ങളുടെ സംവിധായകൻ ആണ് ടോം ഇമ്മട്ടി. 2017 മാർച്ചിൽ റിലീസ് ചെയ്ത ചിത്രമാണ് ഒരു മെക്സിക്കൻ അപാരത. ടൊവിനോ തോമസ് നായകനായി എത്തിയ ചിത്രം ആ വർഷത്തെ മികച്ച ചിത്രങ്ങളിൽ ഒന്നു കൂടിയായിരുന്നു. നീരജ് മാധവ്, രൂപേഷ് പീതാംബരൻ, ജിനോ ജോൺ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. 

ചിത്രത്തില്‍ എസ്എഫ് ഐ നേതാവായാണ് ടൊവിനോ തോമസ് പ്രത്യക്ഷപ്പെടുന്നത്. കാലഘട്ടത്തിന്റെ മാറ്റത്തിനനുസരിച്ച് വ്യത്യസ്ത ഗെറ്റപ്പുകളില്‍ ടൊവിനോ പ്രത്യക്ഷപ്പെടുന്നുണ്ട്. എഴുപതുകളിലെ കഥാപാത്രമായ കൊച്ചനിയനായും മകന്‍ പോളായും വേഷമിടുന്നത് ടൊവിനോ ആയിരുന്നു. തന്റെ ആദ്യ സംവിധാന സംരംഭമായ ചിത്രത്തെ അതിമനോഹരമായി തന്നെ സ്ക്രീനിൽ എത്തിക്കാൻ ടോം ഇമ്മട്ടിക്ക് സാധിച്ചിരുന്നു.  ജവാന്‍ ഓഫ് വെള്ളിമല, ഹോംലി മീല്‍സ് എന്നീ ചിത്രങ്ങളുടെ സംവിധായകനായ അനൂപ് കണ്ണനായിരുന്നു ഒരു മെക്‌സിക്കന്‍ അപാരതയുടെ നിർമാണം.