തിയറ്ററിലെ പൊട്ടിച്ചിരി, 23-ാം ദിവസം ഒടിടിയില്‍! സ്ട്രീമിംഗ് പ്രഖ്യാപിച്ച് ആ ചിത്രം

കല്യാണം മുടക്കൽ ഒരു മത്സരമായി നടക്കുന്ന ഭാരതക്കുന്ന് എന്ന ഗ്രാമത്തിൻ്റെയും അതിനെ എതിർക്കുന്ന ഒരു കൂട്ടം ചെറുപ്പക്കാരുടെയും കഥയാണ് ചിത്രം പറയുന്നത്. 

മലയാളത്തില്‍ നിന്ന് മറ്റൊരു ചിത്രം കൂടി ആഫ്റ്റര്‍ തിയറ്റര്‍ റിലീസ് ആയി ഒടിടിയിലേക്ക്. കല്യാണം മുടക്കല്‍ ഒരു മത്സരവും ആഘോഷവുമൊക്കെയായി കാണുന്ന ഒരു സാങ്കല്‍പിക ഗ്രാമത്തിന്‍റെ കഥ പറയുന്ന വത്സല ക്ലബ്ബ് എന്ന ചിത്രമാണ് സ്ട്രീമിംഗ് തീയതി പ്രഖ്യാപിച്ചിരിക്കുന്നത്. നവാഗതനായ അനുഷ് മോഹൻ സംവിധാനം ചെയ്ത ചിത്രം സെപ്റ്റംബര്‍ 26 നാണ് തിയറ്ററുകളില്‍ എത്തിയത്. ഇപ്പോഴിതാ 23-ാം ദിവസമാണ് ചിത്രം ഒടിടിയിലേക്ക് എത്തുന്നത്. മനോരമ മാക്സിലൂടെയാണ് ചിത്രത്തിന്‍റെ ഒടിടി റിലീസ്. ഒക്ടോബര്‍ 19 മുതല്‍ കാണാം.

ഫാൽക്കൺ സിനിമാസിൻ്റെ ബാനറിൽ ജിനി എസ് ആണ് ചിത്രത്തിന്‍റെ നിര്‍മ്മാണം. തിരുവനന്തപുരത്തും പരിസരപ്രദേശങ്ങളിലുമായി ചിത്രീകരണം നടത്തിയ സിനിമയാണ് ഇത്. ഭാരതക്കുന്ന് എന്ന സാങ്കൽപ്പിക ഗ്രാമത്തിലാണ് കഥ നടക്കുന്നത്. വർഷങ്ങളായി ഈ ഗ്രാമത്തിൽ നിലനിന്നു പോരുന്ന ഒരു കാര്യമാണ് വിവാഹം മുടക്കൽ. ആൺ, പെൺ വ്യത്യാസമില്ലാതെ തലമുറ കൈമാറി ഈ കാര്യം നിലനിന്നു പോരുന്നു. സ്വന്തം മക്കളുടെ വിവാഹം പോലും മുടക്കുന്നതിൽ ഇവർക്ക് തെല്ലും ദുഃഖമില്ല. ഏറ്റവും കൂടുതൽ കല്യാണം മുടക്കുന്നവർക്ക് മുടക്കു ദണ്ഡ് എന്ന പാരിതോഷികവും നൽകുന്നു. ഇവിടെ വത്സല ക്ലബ്ബ് എന്ന ഒരു ക്ലബ്ബ് പ്രവർത്തിക്കുന്നുണ്ട്. ഈ നാട്ടിൽ നടക്കുന്ന ഈ കല്യാണം മുടക്കിനെ ശക്തമായി എതിർക്കുന്ന ഏതാനും ചെറുപ്പക്കാർ ഈ ക്ലബ്ബിൻ്റെ സജീവ പ്രവർത്തകരാണ്. ഈ പ്രശ്നത്തിൻ്റെ പേരിൽ ക്ലബ്ബ് പ്രവർത്തകരും നാട്ടുകാരും രണ്ടു ചേരികളിലായി. ഇവർക്കിടയിലേക്ക് ഒരു പെൺകുട്ടി കടന്നുവരുന്നതോടെ കഥാഗതിയിൽ വലിയൊരു വഴിത്തിരിവിനു വഴിയൊരുക്കുന്നു. ചിത്രത്തിൻ്റെ പശ്ചാത്തലമാണിത്.

തികച്ചും കൗതുകകരമായ ഒരു പ്രമേയം ഹ്യൂമർ, ഫാൻ്റെസി ജോണറിൽ അവതരിപ്പിക്കുയാണ് ഈ ചിത്രത്തിലൂടെ. സാധാരണക്കാർ താമസിക്കുന്ന ഒരു ഗ്രാമത്തിൻ്റെ പശ്ചാത്തലത്തിലൂടെയാണ് ഈ ചിത്രത്തിൻ്റെ അവതരണം. താരപ്പൊലിമയേക്കാളുപരി കഥയ്ക്കനുയോജ്യമായതും ഒപ്പം സമീപകാല മലയാള സിനിമകളിലൂടെ ശ്രദ്ധ നേടിയവരുമാണ് ഈ ചിത്രത്തിലെ അഭിനേതാക്കൾ. വിനീത് തട്ടിൽ, അഖിൽ കവലയൂർ, കാർത്തിക്ക് ശങ്കർ, രൂപേഷ് പീതാംബരൻ, അരിസ്റ്റോ സുരേഷ്, അംബി, വിശാഖ്, ഗൗരി, മല്ലിക സുകുമാരൻ, ജിബിൻ ഗോപിനാഥ്, അനിൽ രാജ്, അരുൺ പോൾ, ദീപു കരുണാകരൻ, പ്രിയ ശ്രീജിത്ത്, ബിനോജ് കുളത്തൂർ, രാഹുൽ നായർ, ദീപു നാവായിക്കുളം, അനീഷ്, ഗൗതം. ജി. ശശി, അസീന റീന, അരുൺ ഭാസ്കര്‍, ആമി തിലക് എന്നിവരാണ് ഈ ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്. ധ്യാൻ ശ്രീനിവാസൻ ഈ ചിത്രത്തിലെ മറ്റൊരു മുഖ്യമായ കഥാപാത്രത്തെ അവതരിപ്പിക്കുന്നു. രചന ഫൈസ് ജമാൽ, സംഗീതം ജിനി എസ്, ഛായാഗ്രഹണം - ശൗരിനാഥ്, എഡിറ്റിംഗ് - രാകേഷ് അശോക, കലാസംവിധാനം - അജയ് ജി. അമ്പലത്തറ, സ്റ്റിൽസ് - അജി മസ്ക്കറ്റ്, മേക്കപ്പ് സന്തോഷ് വെൺപകൽ, കോസ്റ്റ്യൂം ഡിസൈൻ ബ്യൂസി ബേബി ജോൺ, ഡിസൈൻ - ആനന്ദ് രാജേന്ദ്രൻ, ചീഫ് അസ്സോസ്സിയേറ്റ് ഡയറക്ടർ - അനുരാജ്..ഡി.സി, പ്രൊഡക്ഷൻ മാനേജർ - കുര്യൻ ജോസഫ്, പ്രാഡക്ഷൻ എക്സിക്കുട്ടീവ് - ഹരി കാട്ടാക്കട, പ്രൊഡക്ഷൻ കൺട്രോളർ - മുരുകൻ എസ്.