നിശബ്ദതയാണ് 'വിചിത്ര'ത്തിന്റെ പശ്ചാത്തല സം​ഗീതം: ജുബൈർ മുഹമ്മദ്

ഹൊറർ സിനിമകളിലെ സ്ഥിരം ക്ലീഷേ ശബ്ദങ്ങൾ ഒഴിവാക്കിയാണ് 'വിചിത്ര'ത്തിന് വേണ്ടി പശ്ചാത്തല സം​ഗീതം ഒരുക്കിയതെന്ന് ജുബൈർ മുഹമ്മദ്

മിസ്ട്രി, ഹൊറർ സിനിമയായ വിചിത്രം മികച്ച പ്രേക്ഷക പ്രതികരണമാണ് നേടിയത്. കഥാപാത്രങ്ങളുടെ പ്രകടനമികവിനൊപ്പം സിനിമയുടെ പശ്ചാത്തല സം​ഗീതവും പ്രശംസിക്കപ്പെട്ടു. ശബ്ദമായും നിശബ്ദതയായും പ്രേക്ഷകരെ പിടിച്ചിരുത്തിയ കഥ പറച്ചിലിന്റെ ക്രെഡിറ്റ് വിചിത്രത്തിന്റെ പശ്ചാത്തലം സം​ഗീതവും സം​ഗീത സംവിധാനവും ചെയ്ത ജുബൈർ മുഹമ്മദിന് കൂടെ അവകാശപ്പെട്ടതാണ്. 'വിചിത്ര'ത്തിന്റെ അനുഭവങ്ങൾ പങ്കുവെക്കുകയാണ് ജുബൈർ മുഹമ്മദ്.

എങ്ങനെയാണ് 'വിചിത്ര'ത്തിലേക്ക് വരുന്നത്?

'വിചിത്ര'ത്തിന്റെ സംവിധായകൻ അച്ചു വിജയൻ എന്റെ പഴയ സുഹൃത്താണ്. ഞങ്ങൾ ഒരുമിച്ച് ഒരുപാട് വർക്ക് ചെയ്‍തിട്ടുണ്ട്. ഞാൻ സം​ഗീത സംവിധാനം ചെയ്ത മ്യൂസിക് വീഡിയോകൾ പലതും അച്ചു വിജയൻ എഡിറ്റ് ചെയ്തിട്ടുണ്ട്. ആ സൗഹൃദമാണ് ഈ സിനിമയിലേക്ക് വഴിതുറന്നത്. ഞാൻ മുൻപ് ചെയ്ത പീസ് എന്ന സിനിമയുടെ ഓഡിയോ റൈറ്റ്സ് 'വിചിത്ര'ത്തിന്റെ നിർമ്മാണക്കമ്പനിയുടെ സ്ഥാപനം ജോയ് മ്യൂസിക് ആണ് ഏറ്റെടുത്തത്. അങ്ങനെയൊരു ബന്ധം കൂടെയുണ്ട്.

വിചിത്രം ഒരു മിസ്റ്ററി, ഹൊറർ സിനിമ ആണല്ലോ. ഇത്തരം സിനിമകളിൽ പശ്ചാത്തല സം​ഗീതം വളരെ പ്രധാനമാണ്. ക്ലീഷെകൾ ഒഴിവാക്കി എങ്ങനെയാണ് വിചിത്രത്തിന് വേണ്ടി ബാക്ക്​ഗ്രൗണ്ട് സ്കോർ ചെയ്തത്?

സ്ഥിരം ഹൊറർ പാറ്റേണുകളിൽ വരുന്ന ശബ്ദങ്ങൾ ഒഴിവാക്കുക തന്നെയായിരുന്നു ആദ്യം ചെയ്തത്. ഹോളിവുഡ് സിനിമകൾക്ക് സമാനമായ രീതിയിലുള്ള ശബ്ദങ്ങളാണ് ഉപയോ​ഗിച്ചത്. സത്യത്തിൽ ഈ സിനിമയുടെ പശ്ചാത്തല സം​ഗീതത്തെക്കുറിച്ച് സംവിധായകൻ അച്ചു വിജയന് കൃത്യമായ ധാരണയുണ്ടായിരുന്നു. ശബ്ദത്തിന്റെ ലെയറുകളും എവിടെ അത് ചേർക്കണം എന്നതുമെല്ലാം അദ്ദേഹത്തിന് അറിയാമായിരുന്നു. കൃത്യമായ റഫറൻസുകൾ വച്ച് തന്നെയാണ് പശ്ചാത്തല സം​ഗീതം ചെയ്തത്. അതുകൊണ്ടു തന്നെ എനിക്ക് ജോലി വളരെ എളുപ്പമായിരുന്നു. ഈ സിനിമയിൽ നിശബ്ദതയ്ക്ക് വലിയ പ്രധാന്യമുണ്ട്. സൈലൻസ് തന്നെയാണ് ഈ സിനിമയുടെ പശ്ചാത്തല സം​ഗീതം എന്ന് വേണമെങ്കിൽ പറയാം. എവിടെ നിശബ്ദത കൊണ്ടുവരണം എവിടെ ശബ്ദം കൊണ്ടുവരണം എന്നതെല്ലാം സംവിധായകനോട് ഒപ്പം ഇരുന്ന് സംസാരിച്ചിട്ടാണ് ചെയ്തത്.

വിചിത്രത്തിന് വേണ്ടി സൗണ്ട് ഡിസൈൻ ചെയ്തത് ദേശീയ അവാർഡ് ജേതാവ് വിഷ്ണു ​ഗോവിന്ദ് ആണല്ലോ. എന്തായിരുന്നു ഒരുമിച്ച് പ്രവർത്തിച്ചപ്പോഴുള്ള അനുഭവം?

വിഷ്ണുവിനൊപ്പമുള്ള ജോലി കിടിലം എക്സ്പീരിയൻസ് ആയിരുന്നു! എനിക്ക് ബാക്ക്​ഗ്രൗണ്ട് സ്കോറിന് തരുമ്പോൾ തന്നെ സൗണ്ട് ലെയറുകൾ ഉണ്ടായിരുന്നു. അതിൽ നിന്ന് തന്നെ സിനിമയുടെ മൂഡ് എന്താണെന്ന് തിരിച്ചറിയാൻ പറ്റി. അതിന് സപ്പോർട്ട് ചെയ്യുക എന്നതായിരുന്നു എന്റെ ജോലി. അദ്ദേഹം ചെയ്ത സൗണ്ടും സം​ഗീതവും തമ്മിൽ ക്ലാഷ് ആകാതെ എങ്ങനെ കൈകാര്യം ചെയ്യുക എന്നതായിരുന്നു പ്രധാനം. വിഷ്ണു ​ഗോവിന്ദ് ​ഗംഭീരമായിട്ടാണ് ഇത് ചെയ്തിരിക്കുന്നത്. എനിക്ക് അദ്ദേഹത്തോടൊപ്പം വർക്ക് ചെയ്യണം എന്ന് വലിയ ആ​ഗ്രഹമുണ്ടായിരുന്നു.  ഒരുമിച്ച് ജോലി ചെയ്യാൻ പറ്റിയതിൽ ഒരുപാട് സന്തോഷമുണ്ട്. ഭയങ്കര രസമുള്ള ജോലിയായിരുന്നു എന്നതിനൊപ്പം വിഷ്ണു ​ഗോവിന്ദിൽ നിന്ന് ഒരുപാട് കാര്യങ്ങൾ എനിക്ക് പഠിക്കാനും മനസ്സിലാക്കാനും പറ്റി.

സിനിമ കണ്ടു കഴിഞ്ഞ് ആളുകളുടെ പ്രതികരണം എങ്ങനെയായിരുന്നു?

'വിചിത്ര'ത്തിൽ ഒരുപാട് കണക്ഷനുകളും ലെയറുകളും ഉണ്ട്. ഞാൻ ഈ ജോലി ഏറ്റെടുക്കുമ്പോൾ തന്നെ അച്ചു വിജയനോട് ചോദിച്ചത്, നമ്മൾ ഉദ്ദേശിക്കുന്ന ഈ ഇന്നർ കണക്ഷനുകളും ലെയറുകളും ആളുകൾക്ക് മനസ്സിലാകുമോ എന്നതാണ്. പ്രേക്ഷകർ അത്രയും കഥയിൽ ശ്രദ്ധിച്ചിരുന്നാലെ ഈ കാര്യങ്ങൾ മനസ്സിലാക്കാൻ പറ്റൂ. ആ ഒരു കൺഫ്യൂഷൻ സിനിമ തീയേറ്ററിൽ എത്തിയപ്പോൾ മാറി. കഥയിലെ ആ ഭാ​ഗങ്ങൾ വരുമ്പോൾ ആളുകൾ വളരെ ആസ്വദിക്കുന്നുണ്ടെന്ന് മനസ്സിലായി. അത് അവരുടെ പ്രതികരണത്തിൽ നിന്ന് തന്നെ മനസ്സിലാകുന്നുണ്ടായിരുന്നു. ഞങ്ങൾ ഉദ്ദേശിച്ച കുഞ്ഞുകുഞ്ഞു സാധനങ്ങൾ വരെ ആളുകൾക്ക് ഉൾക്കൊള്ളാൻ പറ്റി.

'വിചിത്ര'ത്തിലെ പാട്ടുകൾ?

ഞാൻ മൂന്ന് പാട്ടുകളാണ് ചെയ്തത്. ഒന്ന് ടൈറ്റിൽ ട്രാക്ക് ആണ്; അത് ഇം​ഗ്ലീഷ് ആണ്. ​ഗായകൻ ദീപക് നായർ ആണ് പാട്ടെഴുതിയത്. ബിന്ദു അനിരുദ്ധൻ എന്ന ​ഗായികയാണ് ടൈറ്റിൽ ട്രാക്ക് പാടിയത്; അവരത് മനോഹരമായി പാടി. രണ്ടാമത്തെ പാട്ട് മനോജ് പരമേശ്വരൻ എന്ന ഒരാൾ എഴുതിയ കവിതയാണ്. സിനിമക്ക് വേണ്ടി എഴുതിയ കവിതയല്ല അത്. പക്ഷേ, കവിത മാറ്റം വരുത്തി ഉപയോ​ഗിക്കുകയായിരുന്നു. മരിയ ജോണി എന്ന ഒരു പുതിയ ​ഗായികയാണ് പാട്ട് പാടിയത്. ആ കവിത സിനിമയിലെ ഒരു പ്രത്യേക ഭാ​ഗത്താണ് വരുന്നത്. വളരെ പ്രധാന്യമുള്ള ഒരു സന്ദർഭമാണത്. അത് അവിടെ ചേർന്നുതന്നെ വന്നു. പിന്നെയുള്ള ഒരു പാട്ട് പടത്തിന്റെ അവസാനമുള്ളതാണ്. ഈ പാട്ട് ഞാൻ അച്ചു വിജയനോട് അങ്ങോട്ട് നിർദേശിച്ചതാണ്. ബിന്ദു അനിരുദ്ധൻ തന്നെയാണ് ഈ പാട്ടിന് വരികളെഴുതിയതും പാടിയതും.

ഇനിയുള്ള പ്രോജക്ടുകൾ?

അഭ്യൂഹം എന്നൊരു സിനിമയാണ് ഇനിയുള്ളത്. അത് കൂടാതെ ഏതാനും പ്രോജക്ടുകളും ചർച്ചയിലുണ്ട്.