സ്ക്രീനില് തീ പടര്ത്താന് കമല്, സേതുപതി, ഫഹദ്; കാത്തിരിപ്പിനൊടുവില് 'വിക്രം' ഫസ്റ്റ് ലുക്ക്
Synopsis
'മാസ്റ്ററി'നു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം
കമല് ഹാസനെ നായകനാക്കി ലോകേഷ് കനകരാജ് സംവിധാനം ചെയ്യുന്ന ആക്ഷന് ത്രില്ലര് ചിത്രം 'വിക്ര'ത്തിന്റെ ഫസ്റ്റ് ലുക്ക് പുറത്തെത്തി. കമലിനൊപ്പം പ്രധാന കഥാപാത്രങ്ങളെ അവതരിപ്പിക്കുന്ന വിജയ് സേതുപതിയും ഫഹദ് ഫാസിലും പുറത്തെത്തിയ ഫസ്റ്റ് ലുക്ക് പോസ്റ്ററിലുണ്ട്. മൂവരുടെയും കഥാപാത്രങ്ങളുടെ ക്ലോസപ്പുകള് അടങ്ങിയതാണ് ബ്ലാക്ക് ആന്ഡ് വൈറ്റിലുള്ള പോസ്റ്റര്.
വിജയ് നായകനായ 'മാസ്റ്ററി'നു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രമാണിത്. കമല് ഹാസന്റെ കഴിഞ്ഞ പിറന്നാള് ദിനത്തിലായിരുന്നു ടൈറ്റില് പ്രഖ്യാപനം. കമല് ഹാസനും ഫഹദ് ഫാസിലിനും വിജയ് സേതുപതിക്കുമൊപ്പം നരെയ്നും ചിത്രത്തില് ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഗിരീഷ് ഗംഗാധരനാണ് ഛായാഗ്രാഹകന്. ലോകേഷ് ചിത്രങ്ങളായ കൈതിയുടെയും മാസ്റ്ററിന്റെയും ഛായാഗ്രാഹകനായ സത്യന് സൂര്യനെയാണ് വിക്രത്തിലും ആദ്യം നിശ്ചയിച്ചിരുന്നതെങ്കിലും അദ്ദേഹത്തിന് മറ്റു പ്രോജക്റ്റുകളുടെ തിരക്കുകള് വന്നതിനാല് പിന്മാറുകയായിരുന്നു.
രാജ്കമല് ഫിലിംസ് ഇന്റര്നാഷണലിന്റെ ബാനറില് കമല്ഹാസന് തന്നെയാണ് വിക്രത്തിന്റെ നിര്മ്മാണം. സംഗീതം അനിരുദ്ധ്. എഡിറ്റിംഗ് ഫിലോമിന് രാജ്. സംഘട്ടന സംവിധാനം അന്പറിവ്. നൃത്തസംവിധാനം ദിനേശ്. പിആര്ഒ ഡയമണ്ട് ബാബു. ശബ്ദ സങ്കലനം കണ്ണന് ഗണ്പത്. ചെന്നൈയില് വൈകാതെ ചിത്രീകരണം ആരംഭിക്കും. 2022ല് തിയറ്ററുകളിലെത്തിക്കാനാണ് പദ്ധതി.
സിനിമകളിൽ നിന്ന് Malayalam OTT Release വരെ, Bigg Boss Malayalam Season 7 മുതൽ Mollywood Celebrity news, Exclusive Interview വരെ — എല്ലാ Entertainment News ഒരൊറ്റ ക്ലിക്കിൽ. ഏറ്റവും പുതിയ Movie Release, Malayalam Movie Review, Box Office Collection — എല്ലാം ഇപ്പോൾ നിങ്ങളുടെ മുന്നിൽ. എപ്പോഴും എവിടെയും എന്റർടൈൻമെന്റിന്റെ താളത്തിൽ ചേരാൻ ഏഷ്യാനെറ്റ് ന്യൂസ് മലയാളം വാർത്തകൾ