മകളെക്കുറിച്ച് ഗോസിപ്പ്; ശക്തമായി പ്രതികരിച്ച് ദിലീപ്

കൊച്ചി: കാവ്യാമാധവനുമായുള്ള വിവാഹബന്ധം സംബന്ധിച്ച മാധ്യമങ്ങള്‍ പടച്ചുവിടുന്ന ഗോസിപ്പില്‍ മകളേയും വലിച്ചിഴച്ച വാര്‍ത്ത സൃഷ്ടിക്കുന്ന മാധ്യമപ്രവര്‍ത്തനത്തിനെതിരേ സാമൂഹ്യമാധ്യമങ്ങളില്‍ രൂക്ഷ  പ്രതികരണവുമായി ദിലീപ്. കേവലം ഗോസിപ്പ് വായനയ്ക്കായി കാവ്യാമാധവനെയും തന്നെയും ചേര്‍ത്ത് വാര്‍ത്ത നിരത്തുന്നത് ആടിനെ പട്ടിയാക്കുന്ന മാധ്യമപ്രവര്‍ത്തനം ആണെന്നും അതില്‍ മകളെ കൂടി വലിച്ചിഴച്ചാല്‍ നിയമ വഴി തേടുമെന്നുമാണ് ദിലീപിന്റെ മുന്നറിയിപ്പ്.

വാര്‍ത്ത എഴുതിയ മന്ദബുദ്ധിയായ പത്ര പ്രവര്‍ത്തകന്‍ താനും മകളും തമ്മിലുള്ള ബന്ധത്തെക്കുറിച്ച് ഒന്നും അറിയില്ലെന്നും ജീവിതത്തില്‍ ഏറെ അനുഭവിച്ച മകളെക്കുറിച്ച് മഞ്ഞപ്പത്രക്കാരന് മിണ്ടാന്‍ പോലും അധികാരമില്ലെന്നും ദിലീപ് പറയുന്നു. പ്രായപൂര്‍ത്തിയാവാത്ത തന്‍റെ മകളുടെ പേരില്‍ വ്യാജവാര്‍ത്തകള്‍ പടച്ചു വിടുന്ന എല്ലാവര്‍ക്കും ഇതൊരു മുന്നറിയിപ്പാണെന്നും ആവര്‍ത്തിച്ചാല്‍ നിയമത്തിന്‍റെ വഴി തേടുമെന്നും ദിലീപ് പറയുന്നു. താന്‍ വിവാഹം കഴിക്കുന്നെങ്കില്‍ അത് രഹസ്യമായിട്ടായിരിക്കില്ല എന്നും എല്ലാവരേയും അറിയിച്ച് തന്നെയായിരിക്കുമെന്നും പറഞ്ഞിട്ടുണ്ട്.