നെഗറ്റീവ് മൗത്ത് പബ്ലിസിറ്റി കളക്ഷനെ ബാധിച്ചോ? വിജയ് സേതുപതിയുടെ 'എയ്സ്' റിലീസ് ദിനത്തില് നേടിയത്
Synopsis
അറുമുഖ കുമാര് രചനയും സംവിധാനവും നിര്മ്മാണവും നിര്വ്വഹിച്ചിരിക്കുന്ന ചിത്രം
തമിഴകത്ത് മാത്രമല്ല, തെന്നിന്ത്യയില് ഒട്ടാകെയും ഉത്തരേന്ത്യയില് പോലും ആരാധകരുള്ള താരമാണ് ഇന്ന് വിജയ് സേതുപതി. താരം എന്നതിനേക്കാള് അദ്ദേഹത്തിലെ പ്രതിഭാധനനായ അഭിനേതാവിനെയാണ് പ്രേക്ഷകര് ആഘോഷിക്കാറ്. മറ്റ് താരങ്ങള്ക്കൊപ്പം ചേരുമ്പോള് അദ്ദേഹം പകരുന്ന ഒരു അധികമൂല്യമുണ്ട്. എന്നാല് സോളോ ഹീറോ ആയി അധികം വിജയചിത്രങ്ങള് ഇല്ല അദ്ദേഹത്തിന്. മഹാരാജ, 96 അടക്കമുള്ള ചില മിന്നും വിജയങ്ങള് ഉണ്ട് എന്നത് ശരി തന്നെ. ഇപ്പോഴിതാ വിജയ് സേതുപതി നായകനാവുന്ന ഏറ്റവും പുതിയ ചിത്രം തമിഴില് തിയറ്ററുകളില് എത്തിയിരിക്കുകയാണ്. അറുമുഖ കുമാര് രചനയും സംവിധാനവും നിര്മ്മാണവും നിര്വ്വഹിച്ചിരിക്കുന്ന എയ്സ് എന്ന ചിത്രമാണ് അത്. റൊമാന്റിക് ക്രൈം കോമഡി വിഭാഗത്തില് പെടുന്ന ചിത്രം ഇന്നലെയാണ് തിയറ്ററുകളില് എത്തിയത്. ഇപ്പോഴിതാ ചിത്രത്തിന്റെ ആദ്യ ദിന ബോക്സ് ഓഫീസ് കളക്ഷന് സംബന്ധിച്ച റിപ്പോര്ട്ടുകള് പുറത്തെത്തിയിരിക്കുകയാണ്.
റിലീസ് ദിനത്തില് പ്രേക്ഷകരില് നിന്ന് സമ്മിശ്രവും നെഗറ്റീവുമായ അഭിപ്രായങ്ങളാണ് ചിത്രത്തിന് ലഭിച്ചത്. നിരൂപകരില് നിന്ന് ഏറെക്കുറെ മോശം അഭിപ്രായങ്ങളും. ഈ നെഗറ്റീവ് മൗത്ത് പബ്ലിസിറ്റി ചിത്രത്തിന്റെ ബോക്സ് ഓഫീസ് പ്രകടനത്തെ സാരമായി ബാധിച്ചുവെന്നാണ് കണക്കുകള് പറയുന്നത്. പ്രമുഖ ട്രാക്കര്മാരായ സിനിട്രാക്കിന്റെ കണക്ക് പ്രകാരം തമിഴ്നാട്ടില് നിന്ന് ആദ്യ ദിനം ചിത്രം 75 ലക്ഷം രൂപ മാത്രമാണ് നേടിയത്. അതേസമയം മറ്റൊരു ട്രാക്കര് ആയ സാക്നില്കിന്റെ കണക്ക് പ്രകാരം ഇന്ത്യയില് നിന്ന് ചിത്രത്തിന് ആദ്യ ദിനം ലഭിച്ച നെറ്റ് കളക്ഷന് ഒരു കോടിയാണ്. വിജയ് സേതുപതിയെപ്പോലെ താരമൂല്യമുള്ള ഒരു തമിഴ് താരത്തെ സംബന്ധിച്ച് ഏറെ മോശം സംഖ്യയാണ് ഇത്.
രുക്മിണി വസന്ത് നായികയാവുന്ന ചിത്രത്തില് യോഗി ബാബു, ബി എസ് അവിനാഷ്, ബബ്ലൂ പൃഥ്വിരാജ്, ദിവ്യ പിള്ള, രമേശ് തിലക് തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. കരണ് ബി റാവത്ത് ആണ് ഛായാഗ്രഹണം. എഡിറ്റിംഗ് ഫെന്നി ഒളിവര്, ഗാനങ്ങള് ജസ്റ്റിന് പ്രഭാകരന്, പശ്ചാത്തല സംഗീതം സാം സി എസ്. ശനി, ഞായര് ദിനങ്ങളില് ചിത്രം കളക്ഷന് വര്ധിപ്പിക്കുമോ എന്നറിയാനുള്ള കാത്തിരിപ്പിലാണ് നിര്മ്മാതാവ്.