സിനിമയിലെ സര്‍വ മേഖലയിലും കൈവച്ച താരമാണ് ചിമ്പു. ബാലതാരമായി സിനിമയിലെത്തിയ താരം ഹിറ്റുകളുടെ നീണ്ടനിര തന്നെ സമ്മാനിച്ചു. 2010ല്‍ പുറത്തിറങ്ങിയ വിണ്ണൈതാണ്ടി വരുവായ എന്ന ഹിറ്റ് ചിത്രത്തിന് ശേഷം ചിമ്പുവിന്‍റെ സിനിമാ ലോകത്ത് മികച്ച പ്രതികരണമാണ്. സിനിമകള്‍ ഹിറ്റുകളാകുന്നതിനിടയില്‍ വിവാദങ്ങളും ചിമ്പുവിനെ വേട്ടയാടിയിരുന്നു. നയന്‍താരയുമായുള്ള പ്രണയ ഗോസിപ്പുകളില്‍ തുടങ്ങി നിരവധി വിവാദങ്ങള്‍ അദ്ദേഹത്തെ തേടിയെത്തി. ചില സംവിധായകരും ചിമ്പുവിനെതിരെ എത്തിയതോടെ ചിമ്പുവിന്‍റെ സിനിമയിലെ സുവര്‍ണകാലം മങ്ങി.
തുടര്‍ന്ന് പുറത്തിറങ്ങിയ ചിത്രങ്ങളെല്ലാം ബോക്സ് ഓഫീസില്‍ പരാജയം ഏറ്റവാങ്ങിയപ്പോള്‍ ചിമ്പു സിനിമയില്‍ നിന്ന് മാറിനിന്നു. എന്നാല്‍ ടെലിവിഷന്‍ പരിപാടികളില്‍ ചിമ്പു സജീവമായിരുന്നു. നീണ്ട കാലത്തെ ഇടവേളയ്ക്ക് ശേഷം മണിരത്നത്തിന്‍റെ സെക്ക സെവന്ത വാനം എന്ന ചിത്രത്തില്‍ വീണ്ടും ചിമ്പു എത്തുന്നുണ്ട്.
അടുത്തിടെ ഒരു റിയാലിറ്റി ഷോയുടെ പരിപാടിയില്‍ അതിഥിയായി എത്തിയതാണ് ചിമ്പുവിനെകുറിച്ചുള്ള പുതിയ വാര്‍ത്ത. സംസാരശേഷി നഷ്ടപ്പെട്ട ഒരു കുട്ടിയുടെ ചികിത്സാ ചെലവ് നേരത്തെ ചിമ്പു ഏറ്റെടുത്തിരുന്നു. ആ കുട്ടിയെയാണ് റിയാലിറ്റി ഷോ അധികൃതര്‍ മുഖ്യാതിഥിയായി എത്തിയ ചിമ്പുവിന് സര്‍പ്രൈസ് നല്‍കാന്‍ വേദിയിലെത്തിച്ചത്. ആ കുട്ടി സിമ്പു മാമാ എന്ന് വിളിച്ച് കയറി വരുമ്പോള്‍ കരഞ്ഞുകൊണ്ടാണ് സിമ്പു പ്രതികരിച്ചത്. കുട്ടിയെ കെട്ടിപ്പിടിച്ച ചിമ്പു കുട്ടി നല്‍കിയ ഐസ്ക്രീം കഴിച്ച സമയം ചെലവഴിച്ചു.