‘വെർണ’ക്കെതിരായ വിലക്ക്; പാക് നടി മഹിറാഖാന്​ പിന്തുണയുമായി ദീപിക പദുകോൺ

പാകിസ്​ഥാൻ നടി മഹിറാഖാ​ന്‍റെ വിവാദ ചിത്രം ‘വെർണ’ക്കെതിരായ വിലക്കിൽ പ്രതിഷേധവുമായി ബോളിവുഡ്​ സുന്ദരി ദീപിക പദുകോൺ. ദീപിക നായികയായ സ​ഞ്ജ​യ് ലീ​ല ബ​ൻ​സാ​ലി ചിത്രം ‘പത്മാവതി’ വിവാദങ്ങളിൽ അകപ്പെട്ടതിന്​ പിന്നാലെയാണ്​ പാകിസ്​ഥാനി താരത്തിനുണ്ടായ സമാന അനുഭവത്തിൽ പിന്തുണയുമായി ഇന്ത്യൻ താരം എത്തിയത്​.

ബലാത്സംഗവുമായി ബന്ധപ്പെട്ട പ്രശ്​നം പ്രമേയമാകുന്ന ചിത്രമാണ്​ ​വെർണ. സിനിമയുടെ ശക്​തി അറിയാത്തവരാണ് ഒരു ചെറിയ വിഭാഗമെന്നായിരുന്നു ദീപികയുടെ പ്രതികരണം. 

അതേസമയം പത്മാവതിക്ക് പ്രദര്‍ശനാനുമതി നല്‍കും മുമ്പ് ചിത്രത്തിനെതിരെ ഉയരുന്ന പൊതു കാഴ്ചപ്പാടും വിയോജിപ്പും കൂടി പരിഗണിക്കണമെന്നാവശ്യപ്പെട്ട് ഉത്തര്‍പ്രദേശ് സര്‍ക്കാര്‍ കേന്ദ്ര വാര്‍ത്താ വിതരണ പ്രക്ഷേപണ മന്ത്രാലയത്തിന് കത്തയച്ചു.രജ്​പുത്​ സേന ഉൾപ്പെടെയുള്ള വിഭാഗങ്ങളിൽ നിന്നാണ്​ പതമാവതിക്കെതിരെ എതിർപ്പുയരുന്നത്​. ചരിത്രത്തെ വളച്ചൊടിക്കുന്നുവെന്നാരോപിച്ചാണ്​ എതിർപ്പ്​.

ദീപിക പദുക്കോണ്‍, രണ്‍വീര്‍ സിംഗ്, ഷാഹിദ് കപൂര്‍ തുടങ്ങിയവരാണ് ചിത്രത്തിലെ അഭിനേതാക്കള്‍. അലാവുദ്ദീന്‍ ഖില്‍ജിക്ക് ചിറ്റോര്‍ രാജകുമാരിയായ പദ്മാവതിയോട് തോന്നുന്ന പ്രണയമാണ് ചിത്രത്തിന്‍റെ ഇതിവൃത്തം. ഡിസംബര്‍ ഒന്നിനാണ് ചിത്രത്തിന്‍റെ റിലീസ് നിശ്ചയിച്ചിരിക്കുന്നത്.