പുല്‍വാമയില്‍ കൊല്ലപ്പെട്ട സൈനികരോടുള്ള ആദരസൂചകമായി ചിത്രം മണികര്‍ണ്ണികയുടെ വിജയാഘോഷം കങ്കണ ഉപേക്ഷിച്ചു
മുംബൈ: മുപ്പത്തിയൊമ്പത് സൈനികരുടെ ജീവനെടുത്ത പുല്‍വാമയിലുണ്ടായ ഭീകരാക്രമണത്തിനെതിരെ സിനിമാ ലോകത്തെ പലരും സമൂഹമാധ്യമങ്ങളിലൂടെ പ്രതിഷേധിച്ചിരുന്നു. ഇപ്പോളിതാ ഭീകരാക്രമണത്തിന്‍റെ പശ്ചാത്തലത്തില്‍ തന്‍റെ ചിത്രത്തിന്റെ വിജയാഘോഷം മാറ്റി വച്ചിരിക്കുകയാണ് നടിയും സംവിധായികയുമായ കങ്കണ റണാവത്ത്.
കങ്കണയുടെ ചിത്രം 'മണികര്‍ണ്ണിക: ക്വീന്‍ ഓഫ് ഝാന്‍സി'ക്കെതിരെ ആദ്യ സംവിധായകന്‍ കൃഷും നടി മിഷ്തി ചക്രവര്‍ത്തിയും രംഗത്തെത്തിയതോടെ ചിത്രം വിവാദമായിരുന്നു. എന്നാല്‍ എല്ലാ വിവാദങ്ങള്‍ക്കിടയിലും ചിത്രം വിജയ പ്രദര്‍ശനം തുടരുകയാണ്. നാളെ നടത്താനിരുന്ന ആഘോഷമാണ് കൊല്ലപ്പെട്ട സൈനികരോടുള്ള ആദര സൂചകമായി കങ്കണ ഉപേക്ഷിച്ചത്.
ബോളിവുഡ് താരങ്ങളായ ഷാരൂഖ് ഖാന്‍, ആമിര്‍ ഖാന്‍, ആലിയ ഭട്ട്, രണ്‍വീര്‍ സിംഗ്, അക്ഷയ് കുമാര്‍, അജയ് ദേവ്ഗണ്‍ തുടങ്ങിയവര്‍ പുല്‍വാമയിലുണ്ടായ ഭീകരാക്രമണത്തിനെതിരെ ശക്തമായ രീതിയില്‍ അപലപിച്ചിരുന്നു.