'വീട്ടിലെ അന്തരീക്ഷം പ്രശ്നം'; വാടകവീട്ടിലേക്ക് മാറാൻ ആലോചിക്കുകയാണെന്ന് തൻവി

അമ്മൂമ്മയെ തറവാട്ടിൽ നിർത്തി പുതിയ വീട്ടിലേക്ക് മാറാൻ ആലോചിക്കുന്നുവെന്ന് തന്‍വി.

സിന്ധു കൃഷ്ണയുടെ സഹോദരിയുടെ മകൾ തൻവി സുധീർ ഷോഷിന്റെ പുതിയ സോഷ്യൽ മീഡിയ പോസ്റ്റ് സമൂഹമാധ്യമങ്ങളിൽ ചർച്ചയാകുന്നു. അമ്മൂമ്മയെ സംരക്ഷിക്കുക എന്ന ചുമതല താൻ ഏറ്റെടുത്തെന്ന് തൻവി പറഞ്ഞിരുന്നു. എന്നാൽ മകളുടെ ആരോഗ്യം പരിഗണിച്ച് തങ്ങൾ പുതിയ വീട്ടിലേക്ക് താമസം മാറുന്നത് ആലോചിക്കുകയാണെന്നും അമ്മൂമ്മയെ നോക്കാൻ പുതിയൊരാളെ ജോലിക്ക് വെയ്ക്കുകയുമാണെന്നാണ് തൻവി പുതിയ വീഡിയോയിൽ പറയുന്നത്.

''മൂന്ന് മാസം മാത്രം പ്രായമുള്ള മോൾക്ക് ശരീരമാകെ കടുത്ത അലർജിയും ഇൻഫെക്ഷനും വന്ന് വലിയ ബുദ്ധിമുട്ടിലാണ്. കൊതുകോ വണ്ടോ കടിക്കുന്നത് പോലെ ദേഹം മുഴുവൻ തടിച്ചു വരികയും പസ് പോലെ അസ്വസ്ഥതകൾ ഉണ്ടാകുകയുമാണ്. കഴിഞ്ഞ രണ്ടാഴ്ചയായി ഞങ്ങൾ ഉറക്കമില്ലാതെ കഷ്ടപ്പെടുകയാണ്. പല ആശുപത്രികളിലും മാറിമാറി കാണിച്ചു. മരുന്നുകളും ക്രീമുകളും മാറിമാറി പരീക്ഷിച്ചു. വീട് പരമാവധി വൃത്തിയാക്കിയിട്ടു. പക്ഷേ, ഒരു കുറവുമില്ല. കയ്യിൽ നിന്ന് താഴെ വെക്കാന്‍പോലും പറ്റാത്തത്ര‌ അവസ്ഥയിലാണ് കുഞ്ഞുള്ളത്.

വീട്ടിലെ അന്തരീക്ഷം തന്നെയാണ് പ്രശ്നമെന്നാണ് ഞാൻ സംശയിക്കുന്നത്. എത്ര വൃത്തിയാക്കിയിട്ടാലും സാധനങ്ങൾ കുറച്ചുദിവസം വെച്ചാൽ തന്നെ പൂപ്പലും ഫംഗസും പിടിക്കുന്ന അവസ്ഥയാണ്. ചിതലിന്റെ ശല്യവുമുണ്ട്. മറ്റാർക്കും ഈ പ്രശ്നമില്ല. പക്ഷേ, ഇത്രയും ചെറിയൊരു കുഞ്ഞിന് ദിവസവും ആന്റിബയോട്ടിക്കും പാരസെറ്റമോളും നൽകേണ്ടി വരുന്നത് ഒരു അമ്മയെന്ന നിലയിൽ എന്നെ മാനസികമായി തളർത്തുന്നുണ്ട്. വീടിന്റെ പ്രശ്നമാണോ എന്ന് ഉറപ്പാക്കാൻ ഞങ്ങൾ രണ്ടു ദിവസം താൽകാലികമായി പുറത്ത് മാറിനിൽക്കാൻ തീരുമാനിച്ചിരിക്കുകയാണ്. കുഞ്ഞിന് മാറ്റമുണ്ടെങ്കിൽ, ഉടൻ തന്നെ ഒരു വാടകവീട്ടിലേക്ക് മാറേണ്ടി വരും.

അമ്മൂമ്മ ഈ തറവാട് വിട്ട് വാടകവീട്ടിലേക്ക് വരില്ല. അതുകൊണ്ട് അമ്മൂമ്മയെ നോക്കാനായി മുഴുവൻ സമയവും കൂടെനിൽക്കുന്ന ഒരു ഹെൽപ്പറെ ഞങ്ങൾ ഏർപ്പാടാക്കിയിട്ടുണ്ട്. അമ്മൂമ്മയെ നോക്കാൻ വന്നിട്ട് ഒടുവിൽ ഉപേക്ഷിച്ചു പോയി എന്നു പറഞ്ഞ് കുറ്റം പറയാൻ കുറേപ്പേർ വരുമെന്ന് എന്നെനിക്കറിയാം. ആളുകൾ എന്ത് വേണമെങ്കിലും പറഞ്ഞോട്ടെ, എനിക്കിപ്പോൾ എന്റെ കുഞ്ഞിന്റെ ആരോഗ്യമാണ് പ്രധാനം'', എന്നാണ് തൻവി വീഡിയോയിൽ പറയുന്നത്. വീഡിയോ പുറത്തുവന്നതിനു പിന്നാലെ, അഹാന പറഞ്ഞതൊക്കെ ഇപ്പോൾ സത്യമായില്ലേ എന്നാണ് പലരും ചോദിക്കുന്നത്.