കേരളത്തിൽ '0' കളക്ഷൻ ! പക്ഷേ 7 ദിനത്തിൽ ബജറ്റ് തിരിച്ചെത്തി, മേക്കോവറിൽ കോടികൾ വാരിക്കൂട്ടി ആ താരം

ശിവകുമാർ മുരുകേശൻ സംവിധാനം ചെയ്ത തമിഴ് ചിത്രമാണ് 'തായ് കിഴവി'. രാധിക ശരത് കുമാർ കേന്ദ്രകഥാപാത്രത്തെ അവതരിപ്പിക്കുന്ന സിനിമയ്ക്ക് മികച്ച നിരൂപക പ്രശംസ ലഭിച്ചു. ബോക്സ് ഓഫീസിൽ വലിയ വിജയമായി മാറി.

വില്ലേജ് കോമഡി സിനിമകൾ. ഈ ജോണറിൽ തമിഴ് സിനിമയിൽ പലപ്പോഴും സിനിമകൾ റിലീസ് ചെയ്തിട്ടുണ്ട്. ജീവ നായകനായി എത്തിയ തലൈവർ തമ്പി തലൈമേൽ അടക്കം നിരവധി ഉദാഹരണങ്ങളുണ്ട്. സാധാരണ ഒരു ​ഗ്രാമത്തെ ചുറ്റിപ്പറ്റി അവരുടെ ജീവിത യാഥാർത്ഥ്യങ്ങൾ പ്രേക്ഷകർക്ക് മുന്നിൽ എത്തിക്കാൻ ഇത്തരം സിനിമകൾക്ക് സാധിക്കും. അത്തരത്തിലൊരു സിനിമ കൂടി ഇപ്പോൾ തിയറ്ററിൽ എത്തിയിരിക്കുകയാണ്. രാധിക ശരത് കുമാർ കേന്ദ്ര കഥാപാത്രത്ത അവതരിപ്പിച്ച തായ് കിഴവി ആണ് ആ പടം.

ഫെബ്രുവരി 27ന് തിയറ്ററിൽ എത്തിയ ചിത്രമാണ് താഴ് കിഴിവി. റിലീസിന് മുൻപ് തന്നെ രാധിക ശരത് കുമാറിന്റെ മുത്തശ്ശിയായുള്ള മേക്കോവർ ഏറെ ശ്രദ്ധപിടിച്ചു പറ്റിയിരുന്നു. ഒടുവിൽ ചിത്രം തിയറ്ററിൽ എത്തിയപ്പോൾ ആ ശ്രദ്ധ സിനിമയിലേക്കും എത്തി. മികച്ച നിരൂപക പ്രശംസ അടക്കം നേടിയ ചിത്രം ബോക്സ് ഓഫീസിലും വെന്നിക്കൊടി പാറിക്കുകയാണ്. ട്രാക്കിം​ഗ് സൈറ്റായ സാക്നിൽക്കിന്റെ റിപ്പോർട്ട് പ്രകാരം 34.25 കോടി രൂപയാണ് ചിത്രം നേടിയിരിക്കുന്നത്. ഏഴ് ദിവസത്തെ കളക്ഷനാണിത്. 10 കോടിയാണ് സിനിമയുടെ ബജറ്റ്.

ഇന്ത്യ നെറ്റ് 23.25 കോടി, ​ഗ്രോസ് 27.40 കോടി, ഓവർസീസ്‍ 6.85 കോടി എന്നിങ്ങനെയാണ് കണക്ക്. കേരളത്തിൽ നിന്നും 7 ദിവസം വരെ ഒന്നും കളക്ട് ചെയ്തിട്ടില്ലെന്നാണ് സാക്നിൽക്കിന്റെ റിപ്പോർട്ട്. തമിഴ്നാട്ടിൽ നിന്നും 24.85 കോടിയും കർണാടകയിൽ നിന്നും 1.88 കോടിയും ചിത്രം കളക്ട് ചെയ്തപ്പോൾ 25 ലക്ഷം രൂപ ആന്ധ്രാ-തെലുങ്കാന പ്രദേശങ്ങളിൽ നിന്നും നേടിയിട്ടുണ്ട്. തമിഴിലെ ഗ്രാമീണ അന്തരീക്ഷത്തിൽ ഉള്ള കഥാപരിസരവും, അവിടുത്തെ പച്ചയായ ആളുകളുടെയും കഥ പറഞ്ഞ ചിത്രത്തിലെ പ്രകടനം രാധികയുടെ കരിയർ ബെസ്റ്റാണെന്നാണ് പ്രേക്ഷകർ ഒന്നടങ്കം പറയുന്നത്. ശിവകുമാർ മുരുകേശൻ ആണ് സംവിധാനം. ശിവകാർത്തികേയൻ ആണ് നിർമാണം.