ദൃശ്യമികവിലും കളക്ഷന്‍ റെക്കോര്‍ഡിലും ഇന്ത്യന്‍ സിനിമയില്‍ ചരിത്രമായ സിനിമയാണ് ബാഹുബലി. ഇപ്പോഴിതാ ദൃശ്യവിരുന്നിന്റെ മികവുമായി മറ്റൊരു സിനിമയും കൂടി പ്രദര്‍ശനത്തിന് എത്താന്‍ ഒരുങ്ങുകയാണ്. ദീപികാ പദുക്കോണ്‍ നായികയാകുന്ന പദ്മാവതിയാണ് പ്രേക്ഷകരെ വിസ്മയിപ്പിക്കാന്‍ ഒരുങ്ങുന്നത്. ചിത്രത്തിന്റെ ട്രെയിലറിന് വന്‍ വരവേല്‍പ്പാണ് ലഭിച്ചിരിക്കുന്നത്. ബാഹുബലിയെ മറികടക്കുമോ പത്മാവതി എന്നാണ് പ്രേക്ഷകര്‍ ആലോചിക്കുന്നത്. ബാഹുബലിയുടെ അമരക്കാരന്‍ രാജമൗലിയും പദ്മാവതിയുടെ ട്രെയിലറിനെ പ്രശംസിച്ച് രംഗത്ത് എത്തിയിരിക്കുകയാണ്.
'അതിമനോഹരമായ സിനിമ. എല്ലാ ഫ്രെയിമുകളിലും സംവിധായകന്റെ മികവ് വ്യക്തമാണ്-- രാജമൗലി പറയുന്നു.
മുന്‍ നിര താരങ്ങള്‍ അണിനിരക്കുന്ന ബിഗ് ബഡ്ജറ്റ് ചിത്രം സംവിധാനം ചെയ്തത് സ‍ഞ്ജയ് ലീല ബന്‍സാലിയാണ്. ദീപിക പദുക്കോണിനു പുറമേ രണ്‍വീര്‍ സിംഗ്, ഷാഹിദ് കപൂര്‍ തുടങ്ങിയവരാണ് അഭിനേതാക്കള്‍.
അലാവുദ്ദീന്‍ ഖില്‍ജിക്ക് ചിറ്റോര്‍ രാജകുമാരിയായ പദ്മാവതിയോട് തോന്നുന്ന പ്രണയമാണ് ചിത്രത്തിന്റെ ഇതിവൃത്തം. ബാജിറാവു മസ്താനി തുടങ്ങിയ ചിത്രങ്ങള്‍ക്ക് ശേഷം രണ്‍വീര്‍ സിംഗ്, ദീപിക, സജ്ഞയ് തുടങ്ങിയവര്‍ ഒന്നിക്കുന്നു എന്നതും ചിത്രത്തിന് കൂടുതല്‍ പ്രതീക്ഷ തരുന്നു. ബോളിവുഡിലെ ഏറ്റവും ചെലവേറിയ ചിത്രങ്ങളിലൊന്ന് എന്നതും ചിത്രത്തിന് വാര്‍ത്താ പ്രാധാന്യം നേടികൊടുത്തിരുന്നു. ബാജിറാവു മസ്താനിക്ക് തിരക്കഥ എഴുതിയ പ്രകാശ് കപാഡിയ തന്നെയാണ് പദ്മാവതിക്കും പേന ചലിപ്പിച്ചത്. ട്രെയിലര്‍ എത്തിയെങ്കിലും വരുന്ന ഡിസംബര്‍ ഒന്ന് വരെ പ്രേക്ഷകര്‍ കാത്തിരിക്കേണ്ടി വരും.