വിമാനത്താവളത്തിൽ ആദിത്യ നാരായണന്‍റെ 'താളം തെറ്റിയ ഷോ’, വൈറൽ

ബോളിവുഡ്​ ഗായകൻ ഉദിത്​ നാരായണ​ന്‍റെ മകൻ ആദിത്യ നാരായൺ റായ്​പൂർ വിമാനത്താവളത്തിൽ എയർലൈൻ ജീവനക്കാരോട്​ അപമര്യാദയായി പെരുമാറുന്നതി​ന്‍റെ ദൃശ്യങ്ങൾ പുറത്ത്​. യുവഗായകൻ കൂടിയായ ആദിത്യ അസഭ്യം പറയുന്നതാണ്​ ദൃശ്യങ്ങളിൽ. എയർലെൻ ജീവനക്കാർ ഇതിന്​ മറുപടിയും പറയുന്നുണ്ട്​. ഒരു മിനിറ്റോളം ദൈർഘ്യമുള്ള വീഡിയോ ഇതിനകം സാമൂഹിക മാധ്യമങ്ങളിൽ വൈറൽ ആയി​.

തന്നെ വിമാനത്തിൽ നിന്ന്​ ഇറക്കിയാൽ മുംബൈയിൽ വെച്ചുകണ്ടോളാം എന്ന്​ ആദിത്യ എയർലൈൻ ജീവനക്കാരനോട്​ ഭീഷണി മുഴക്കുന്നുണ്ട്​. ലഗേജുമായി ബന്ധപ്പെട്ട തർക്കമാണ്​ വാക്ക്​ തർക്കത്തിലേക്കും ഭീഷണിയിലേക്കും വഴിവെച്ചത്​. അനുവദിനീയമായതിൽ കൂടുതൽ കാബിൻ ല​ഗേജിന് ചാര്‍ജ് നല്‍കാന്‍ ആവശ്യപ്പെട്ടതാണ് ആദിത്യയെ ചൊടിപ്പിച്ചത്​.  വീഡിയോ വൈറൽ ആയതോടെ വിശദീകരണ ട്വീറ്റുമായി ഇൻഡിഗോ അധികതൃരും രംഗത്ത്​ വന്നു.

റായ്​പൂർ-മുംബൈ റൂട്ടിലുള്ള യാത്രക്കിടെയാണ്​ ഇൻഡിഗോ എയർ​ലൈന്‍ ജീവനക്കാരുമായി ആദിത്യ പ്രശ്​നമുണ്ടായത്​. ആദിത്യയും അഞ്ചംഗ സംഘവുമാണ്​ അധിക ഭാരമുള്ള ബാഗേജുമായി യാത്രക്കെത്തിയത്​. അധിക ബാഗേജിന്​ 13000രൂപ അടക്കണമെന്ന്​ എയർലൈൻ അധികൃതർ ആവശ്യപ്പെട്ടു. എന്നാൽ ഇത്​ അടക്കാനാകില്ലെന്ന്​ ചെക്ക്​ ഇൻ ജീവനക്കാരിയോട്​ ആദിത്യ പറഞ്ഞു. പതിനായിരം രൂപയിൽ കൂടുതൽ അടക്കാനാകില്ലെന്ന്​ പറയുകയും അസഭ്യഭാഷ ഉപയോഗിക്കുകയും ചെയ്​തെന്നാണ്​ പരാതി.

ഡ്യൂട്ടി മാനേജറോടും മോശമായി പെരുമാറുന്നതും ദൃശ്യങ്ങളില്‍ ഉണ്ട്​.  മോശം പെരുമാറ്റം തുടർന്നപ്പോൾ യാത്ര അനുവദിക്കാനാകില്ലെന്ന്​ എയർലൈൻ അധികൃതർ വ്യക്​തമാക്കി. തുടർന്ന്​ ക്ഷമാപണം നടത്തുകയും തുടർന്ന്​ ബോർഡിങ്​ പാസ്​ നൽകുകയും ചെയ്​തുവെന്നുമാണ്​ ഇൻഡിഗോ അധികൃതർ ട്വീറ്റ്​ ചെയ്​തത്​.