ഇറാന് അമേരിക്കയുടെ ബി-2 വിമാനം വെടിവച്ചിട്ടിരുന്നോ? ചിത്രത്തിന്റെ സത്യം പുറത്ത്- Fact Check
Synopsis
ഫോര്ഡോ ആണവ നിലയത്തില് ജിബിയു-57 ബങ്കര് ബസ്റ്റര് ബോംബിട്ട ബി-2 ബോംബര് ഇറാന് തകര്ത്തുവെന്നാണ് ചിത്രം ഷെയര് ചെയ്യുന്നവര് അവകാശപ്പെടുന്നത്
നീണ്ട അനിശ്ചിതത്വങ്ങള്ക്കും ആശങ്കകള്ക്കുമൊടുവില് ഇസ്രയേല്-ഇറാന് സംഘര്ഷം വെടിനിര്ത്തലിന് വഴിമാറിയിരിക്കുകയാണ്. ഇറാനിലെ ആണവ സമ്പുഷ്ടീകരണ നിലയങ്ങള് ലക്ഷ്യമിട്ടുള്ള ഇസ്രയേല് ആക്രമണത്തിന്റെ രണ്ടാംഘട്ടത്തില് അമേരിക്ക ബങ്കര് ബസ്റ്റര് ബോംബുകള് വഹിച്ചുകൊണ്ടുള്ള ബി-2 ബോബര് (B-2 Bomber) വിമാനങ്ങളുമായി രംഗത്തെത്തിയിരുന്നു. ഇറാനിലെ ഏറ്റവും രഹസ്യ സ്വഭാവത്തിലുള്ള ഫോര്ഡോ ന്യൂക്ലിയര് കേന്ദ്രത്തില് ബി-2 ബോബറുകള് ജിബിയു-57 എന്ന് പേരുള്ള ബങ്കര് ബസ്റ്റര് ബോംബുകള് ഇടുകയും ചെയ്തു. ഇതിന് പിന്നാലെ യുഎസിന്റെ ബി-2 വിമാനം ഇറാന് വെടിവച്ചിട്ടിരുന്നോ?
പ്രചാരണം
ഇറാനിലെ ആണവ സമ്പുഷ്ടീകരണ നിലയങ്ങളില് ആക്രമണം നടത്തിയ യുഎസ് ബി-2 ബോബര് ഇറാന് വെടിവച്ചിട്ടു എന്നാണ് എക്സ് അടക്കമുള്ള സോഷ്യല് മീഡിയ പ്ലാറ്റ്ഫോമുകളില് ചിത്രം സഹിതമുള്ള പ്രചാരണം. കാഴ്ചയില് വവ്വാലിനെ പോലെ തോന്നുന്ന ബി-2 വിമാനം തകര്ന്നതിന്റെ ചിത്രമാണ് ഷെയര് ചെയ്യപ്പെടുന്നത്. #B2BomberDown പോലുള്ള ഹാഷ്ടാഗുകളും ഇതിനൊപ്പം കാണാം. ഈ ചിത്രം സത്യം തന്നെയോ എന്ന് പരിശോധിക്കാം.
വസ്തുതാ പരിശോധന
ഫോര്ഡോ ആണവ നിലയത്തില് ജിബിയു-57 ബങ്കര് ബസ്റ്റര് ബോംബുകളിട്ട യുഎസിന്റെ ബി-2 വിമാനങ്ങള് ദൗത്യം പൂര്ത്തിയാക്കി ഇറാന് വ്യോമമേഖലയില് നിന്ന് സുരക്ഷിതമായി തിരിച്ചിറങ്ങിയതായി നേരത്തെ യുഎസ് സ്ഥിരീകരിച്ചതാണ്. മാത്രമല്ല, വിമാനങ്ങള് മിസോറിയിലെ വൈറ്റ്മാന് എയര്ഫോഴ്സ് സ്റ്റേഷനില് തിരിച്ചെത്തുന്ന ദൃശ്യങ്ങള് വൈറ്റ് ഹൗസ് ഔദ്യോഗിക എക്സ് ഹാന്ഡിലില് പങ്കിടുകയും ചെയ്തു. ദൗത്യത്തിലുണ്ടായിരുന്ന ഒരു ബി-2 വിമാനം പോലും ഇറാന് ആക്രമിക്കുകയോ, അല്ലെങ്കില് തകര്ന്നുവീഴുകയോ ചെയ്തതായി അമേരിക്ക ഇതുവരെ സ്ഥിരീകരിച്ചിട്ടില്ല. അതിനാല് തന്നെ ബി-2 വിമാനം ഇറാന് തകര്ത്തതായുള്ള സോഷ്യല് മീഡിയ പ്രചാരണം സംശയാസ്പദമായി. ഈ ചിത്രം എഐ ടൂളുകളുടെ സഹായത്തോടെ നിര്മ്മിക്കപ്പെട്ടതാണ് എന്ന സംശയം ഇതോടെ ഉയര്ന്നു.
ഇതേത്തുടര്ന്ന് എഐ ഫോട്ടോ ഡിറ്റക്ഷന് ടൂളുകളുടെ സഹായത്തോടെ ചിത്രം വിശദമായി പരിശോധിച്ചു. ഈ പരിശോധനയില് ലഭിച്ച ഫലങ്ങളെല്ലാം പറയുന്നത് വൈറല് ചിത്രം എഐ നിര്മ്മിതമാണ് എന്നാണ്.
നിഗമനം
ഇറാന് അമേരിക്കയുടെ ബി-2 ബോംബര് വിമാനം വെടിവച്ചിട്ടതായി ഫോട്ടോ സഹിതമുള്ള പ്രചാരണം വ്യാജമാണ്. എഐ നിര്മ്മിത ഫോട്ടോയാണ് ഇതിനായി ഉപയോഗിക്കുന്നത്. ഇറാന് ബി-2 ബോംബര് വിമാനം വെടിവച്ചിട്ടെന്ന അവകാശവാദം സത്യമല്ല.
Fact Check, സോഷ്യൽ മീഡിയയിലും വാട്സ്ആപ്പിലും വേഗത്തിൽ പ്രചരിക്കുന്ന തെറ്റായ വിവരങ്ങൾ, വ്യാജ വാർത്തകൾ, തെറ്റിദ്ധരിപ്പിക്കുന്ന പോസ്റ്റുകൾ തുടങ്ങിയവയുടെ പിന്നിലെ സത്യങ്ങൾ പരിശോധിച്ച് പ്രേക്ഷകർക്ക് യഥാർത്ഥ വസ്തുതകൾ Asianet News Malayalam ത്തിലൂടെ എത്തിക്കുന്നതാണ് ഇതിന്റെലക്ഷ്യം.