നിങ്ങളില് സിങ്കിന്റെ കുറവുണ്ടോ? ശരീരം കാണിക്കും ഈ ലക്ഷണങ്ങള്...
Synopsis
മുറിവുണക്കൽ പ്രക്രിയയെ ത്വരിതപ്പെടുത്താനും ഹൃദയം, കണ്ണ്, ചര്മ്മം, തലമുടി എന്നിവയുടെ ആരോഗ്യത്തിനും സിങ്ക് സഹായിക്കും. അതിനാല് സിങ്ക് ധാരാളം അടങ്ങിയ ഭക്ഷണങ്ങള് ഡയറ്റില് ഉള്പ്പെടുത്തേണ്ടത് ഏറെ പ്രധാനമാണ്.
ശരീരത്തിന് അത്യാവശ്യമായ ഒരു ധാതുവാണ് സിങ്ക്. ശരീരത്തിന്റെ രോഗപ്രതിരോധ സംവിധാനം നിലനിർത്തുക, ദഹനം, നാഡികളുടെ പ്രവര്ത്തനം, ശാരീരിക വളര്ച്ച എന്നിവയ്ക്ക് സിങ്ക് ആവശ്യമാണ്. മെറ്റബോളിസം നിരക്ക് ഉയര്ത്താനും സിങ്ക് സഹായിക്കും. അതുപോലെ തന്നെ, മുറിവുണക്കൽ പ്രക്രിയയെ ത്വരിതപ്പെടുത്താനും ഹൃദയം, കണ്ണ്, ചര്മ്മം, തലമുടി എന്നിവയുടെ ആരോഗ്യത്തിനും സിങ്ക് സഹായിക്കും. അതിനാല് സിങ്ക് ധാരാളം അടങ്ങിയ ഭക്ഷണങ്ങള് ഡയറ്റില് ഉള്പ്പെടുത്തേണ്ടത് ഏറെ പ്രധാനമാണ്.
സിങ്കിന്റെ കുറവു മൂലം ശരീരം കാണിക്കുന്ന ചില ലക്ഷണങ്ങളെ നോക്കാം...
ഒന്ന്...
ശരീരത്തില് സിങ്കിന്റെ അഭാവം മൂലം പ്രതിരോധശേഷി കുറയാനും എപ്പോഴും തുമ്മലും ജലദോഷവും, മറ്റ് അലര്ജികളും ഉണ്ടാകാനും സാധ്യത ഏറെയാണ്.
രണ്ട്...
മുറിവ് ഉണങ്ങാന് സമയമെടുക്കുന്നതും ചിലപ്പോള് സിങ്കിന്റെ അഭാവം മൂലമാകാം.
മൂന്ന്...
സിങ്കിന്റെ കുറവു ദഹനത്തെ മോശമായി ബാധിക്കാനും സാധ്യതയുണ്ട്. മലബന്ധത്തിനും ഇത് കാരണമാകും.
നാല്...
ശരീരത്തില് സിങ്കിന്റെ അഭാവം മൂലം വിശപ്പില്ലായ്മയും ശരീര ഭാരം കുറയാനും കാരണമാകും.
അഞ്ച്...
തലമുടി കൊഴിച്ചിലാണ് മറ്റൊരു സൂചന. തലമുടിയുടെ ആരോഗ്യത്തിന് ഏറെ പ്രധാനപ്പെട്ട ഒരു ധാതുവാണ് സിങ്ക്. സിങ്കിന്റെ കുറവു മൂലം തലമുടി കൊഴിച്ചില് ഉണ്ടാകാം.
ആറ്...
സിങ്കിന്റെ കുറവു മൂലം ചര്മ്മം വരണ്ടതാകാനും, ചര്മ്മത്തില് പാടുകളും കുരുവുമൊക്കെ ഉണ്ടാകാനും സാധ്യതയുണ്ട്. കാരണം ചര്മ്മത്തിന്റെ ആരോഗ്യത്തിനും സിങ്ക് അത്യാവശ്യമാണ്.
ഏഴ്...
സിങ്കിന്റെ കുറവു മൂലം ചിലരില് ഓര്മ്മക്കുറവ് ഉണ്ടാകാനുള്ള സാധ്യതയും ഉണ്ട്. കാരണം തലച്ചോറിന്റെ ആരോഗ്യത്തിനും സിങ്ക് പ്രധാനമാണ്.
എട്ട്...
സിങ്കിന്റെ കുറവ് കുട്ടികളിലും കൗമാരക്കാരിലും വിളര്ച്ചയ്ക്ക് കാരണമാകുന്നു.
ഇത്തരത്തിലുള്ള പ്രശ്നങ്ങളെ തടയാന് സിങ്ക് അടങ്ങിയ ഭക്ഷണങ്ങള് തെരഞ്ഞെടുത്ത് കഴിക്കാം. സിങ്ക് അടങ്ങിയിരിക്കുന്ന ചില ഭക്ഷണങ്ങളെ പരിചയപ്പെടാം...
പയറുവര്ഗങ്ങള്, നട്സ്, സീഡുകള്, പാലുൽപ്പന്നങ്ങള്, ചിക്കന്, പഴങ്ങള്, പച്ചക്കറികള് തുടങ്ങിയവയില് സിങ്ക് അടങ്ങിയിട്ടുണ്ട്.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില് മാറ്റം വരുത്തുക.
Also read: ഈ ആറ് ഭക്ഷണങ്ങള് മാത്രം മതി, ചീത്ത കൊളസ്ട്രോളിനെ കുറയ്ക്കാം...