രണ്ട് ഗോളിന് മുന്നില് നിന്ന ശേഷം തോല്വി വഴങ്ങി സെനഗല്; ബെല്ജിയം അവസാന പതിനാറില്
Synopsis
ഫിഫ ലോകകപ്പ് 2026-ൽ സെനഗലിനെതിരെ രണ്ട് ഗോളിന് പിന്നിൽ നിന്ന ശേഷം 3-2ന് ബെൽജിയം നാടകീയ ജയം സ്വന്തമാക്കി പ്രീ ക്വാർട്ടറിൽ പ്രവേശിച്ചു. യൂറി ടൈലെമാൻസിന്റെ ഇരട്ട ഗോളുകളും റൊമേലു ലുക്കാക്കുവിന്റെ ഗോളുമാണ് ബെൽജിയത്തിന് വിജയം സമ്മാനിച്ചത്, അധിക സമയത്തെ പെനാൽറ്റിയിലൂടെയാണ് വിജയഗോൾ പിറന്നത്.
അറ്റ്ലാന്റ: ഫിഫ ലോകകപ്പ് 2026-ല് ആവേശകരമായ ഗോളടി മത്സരത്തിനൊടുവില് സെനഗലിനെ വീഴ്ത്തി ബെല്ജിയം പ്രീ ക്വാര്ട്ടറില് പ്രവേശിച്ചു. അറ്റ്ലാന്റയില് നടന്ന റൗണ്ട് ഓഫ് 32 പോരാട്ടത്തില് 3-2 എന്ന സ്കോറിനാണ് ബെല്ജിയം വിജയം പിടിച്ചെടുത്തത്. അധിക സമയത്തായിരുന്നു ബെല്ജിയത്തിന്റെ ജയം. യൂറി ടൈലെമാന്സിന്റെ ഇരട്ട ഗോളുകളും റൊമേലു ലുക്കാക്കുവിന്റെ ഒരു ഗോളുമാണ് ബെല്ജിയത്തിന് തുണയായത്. മറുഭാഗത്ത് സെനഗലിന് വേണ്ടി ഹബീബ് ഡിയാറയും ഇസ്മായില സാറും സ്കോര് ചെയ്തെങ്കിലും ടീമിനെ വിജയത്തിലെത്തിക്കാന് അത് മതിയാകുമായിരുന്നില്ല. 2-0ത്തിന് മുന്നില് നിന്ന ശേഷമാണ് സെനഗല് തോല്വി സമ്മതിച്ചത്.
മത്സരം തുടങ്ങിയത് മുതല് ആക്രമണത്തിന് മുന്തൂക്കം നല്കിയ സെനഗല്, ബെല്ജിയന് പ്രതിരോധത്തെ വിറപ്പിക്കുന്ന കാഴ്ചയാണ് കണ്ടത്. 24-ാം മിനിറ്റില് സെനഗല് ആദ്യമായി മുന്നിലെത്തി. സെനഗല് നടത്തിയ മികച്ചൊരു നീക്കത്തിനൊടുവില് വന്ന ഹെഡര്, ബെല്ജിയത്തിന്റെ സ്റ്റാര് ഗോള്കീപ്പര് തിബോ കുര്ട്ടോവ വളരെ സാഹസികമായി തന്നെ തടഞ്ഞു. എന്നാല് പന്ത് നേരെ എത്തിയത് കൃത്യമായി പൊസിഷന് ചെയ്തിരുന്ന ഹബീബ് ഡിയാറയുടെ കാലുകളിലേക്കാണ്. യാതൊരു സമ്മര്ദ്ദവുമില്ലാതെ ഡിയാറ പന്ത് വലയിലേക്ക് തട്ടിയിട്ടു. ആദ്യ പാതിയില് പിന്നീട് ഗോളൊന്നും പിറന്നില്ല.
51-ാം മിനിറ്റില് സെനഗല് ലീഡ് രണ്ടാക്കി ഉയര്ത്തി. സെനഗലിന്റെ ആക്രമണനിരയുടെ കൃത്യത വിളിച്ചോതുന്നതായിരുന്നു ഈ ഗോള്. സൂപ്പര് താരം സാദിയോ സാനെ നല്കിയ ഒരു പാസ് നെഞ്ചില് സ്വീകരിച്ച ഇസ്മായില സാര്, അവിശ്വസനീയമായ പവര് ഷോട്ടിലൂടെയാണ് പന്ത് വലയിലെത്തിച്ചത്. ബെല്ജിയന് ഗോള്കീപ്പര് തിബോ കുര്ട്ടോവയ്ക്ക് പന്ത് തടുക്കാന് ഒരവസരവും നല്കാതെ അത് വലയുടെ കോണിലേക്ക് കുതിക്കുകയായിരുന്നു. മത്സരം സെനഗല് സ്വന്തമാക്കുമെന്ന് കരുതിയിരിക്കെയാണ് ബെല്ജിയം തിരിച്ചടിക്കുന്നത്. 86-ാം മിനിറ്റിലായിരുന്നു ലുക്കാക്കുവിന്റെ ഗോള്. മൂന്ന് മിനിറ്റുകള്ക്ക് ശേഷം ടൈലെമാന്സ് ബെല്ജിയത്തെ ഒപ്പമെത്തിച്ചു. മത്സരം അധിക സമയത്തേക്ക്. ഷൂട്ടൗട്ടിലേക്ക് നീങ്ങുമെന്ന് തോന്നിക്കെ ഇഞ്ചുറി സമയത്ത് ലഭിച്ച പെനാല്റ്റി ടൈലെമാന്സ് ലക്ഷ്യത്തിലെത്തിക്കുകയായിരുന്നു.
അടുത്തത് അമേരിക്കയോ ബോസ്നിയയോ?
ഈ വിജയത്തോടെ ലോകകപ്പിന്റെ പ്രീ-ക്വാര്ട്ടറില് ബെല്ജിയം സ്ഥാനം ഉറപ്പിച്ചു. റൗണ്ട് ഓഫ് 16-ല് അമേരിക്കയും ബോസ്നിയ ആന്ഡ് ഹെര്സഗോവിനയും തമ്മിലുള്ള മത്സരത്തിലെ വിജയികളാണ് ബെല്ജിയത്തിന്റെ അടുത്ത എതിരാളികള്.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!